Bul qazaq júgirmeıtin bolǵan ba?!

Qandaı iri jarysqa barsam da onyń 100 metrlik básekesine bas suqpaı ketken emespin.  О́zim kórgen Olımpıadalarymda tap solaı.  Azııa oıyndarynda tap solaı.  Biraq, …nátıje de tap solaı.  Hanchjoýdaǵy 100 metrlik jarystyń fınalynda kim júgirmedi…  Vetnam qyzy da, Taıland qyzy da, Indonezııa qyzy da, Bahreın qyzy da, Iran qyzy da júgirdi  Tek qazaq qyzy ǵana júgirgen joq.  Tipti, qazaqstandyq jeńil atlet shyqpady.  Árıne, Qytaı qyzy jarysty.  Bas júldeni de sol aldy.

Jigitterdiń 100 metrlik fınalynda onsyz da túsken unjyrǵam odan ary tómendedi.  Jarys jolyna Bahreınniń balasy da, Taı eliniń qos balasy da, Indonezııanyń balasy da, Irannyń balasy da, Malaızııanyń balasy da, árıne, Qytaıdyń qos balasy da shyqty.  Qytaı ulany ozdy.  Nátıjesi óte táýir — 9,94 sekýnd! Ekinshi bolyp boıy bir qarys Taı eliniń balasy keldi.  Úshinshi bop (aıtsa senbeısiz!) Malaı eliniń júırigi keldi.  Bizdiń eldiń jelaıaǵy ozyp kelmek túgil qatysqan da joq!  Tórtinshi bop Iran bozbalasy keldi, besinshi — bahreındik júırik, altynshy — Indonezııa sportshysy kómbe syzyǵyn qıdy.

Qazaqstanda jeńil atletıkanyń eń qysqa qashyqtyǵyna júgirýden tamasha dástúr bar edi ǵoı.  Sonaý XX-ǵasyrdyń 60-jyly Rımde ótken Olımpıadalyq oıyndarda dańqty jerlesimiz  Ǵusman Qosanov bildeı Keńes Odaǵynyń qurama komandasy sapynda 4h100 metrge estafetalyq júgirýde ekinshi kelip, keýdesine búkil Qazaqstan halqy boıynsha tuńǵysh bop KÚMIS JÚLDE taqpap pa edi!  Odan keıin de Ǵusman Qosanov pen Ámın Tuıaqovtar Keńes Odaǵyn bylaı qoıyp sol kezde qatarynda bolǵan EÝROPAŃA ańyz bolyp, sol qurylyqtyń talaı rekordyn jańartpap pa edi?!  Ǵusman, Ámın aǵalardyń jelaıaqtyq ónerdegi dańqy beker ketken joq bolatyn.  Elimizde keıinnen V. Mýravev bastaǵan birneshe atlet Olımpıadalarda atoı saldy da.  Biraq, ókinishke qaraı, eki aǵasyn tirisinde qýantqan qazaq balasy bolmaı keledi.  Búginde Ǵusman aǵamyz baqılyq bolǵan, tipti kózi tiri Ámın aǵamyzdyń ózi 80-nen asyp, 90-dy betke alyp barady.  Sodan beri aıaǵyna tas baılap júgiretin JELAIaQ jaıly ertegi shyǵarǵan qazaq halqynan bir jelaıaq týmaı kele jatyr!  BUL QAZAQ sonda …JÚGIRMEITIN BOLǴAN BA?!  Sol jumsaq tósekke jantaıǵany jantaıǵan ba?  Ǵusman, Ámın aǵalarymyzdyń sporttaǵy uly jolyn jalǵar bir uldyń týmaǵany ma sonda?!  Álde týǵan uldardy taýyp, tańdap ala almaı jatyrmyz ba?!

Olımpıada oıyndary bolsa baıqap sóıler edik.  Al, myna Azııa oıyndary sekildi synda jarys jolyna bir qazaqstandyq jelaıaqtyń shyqpaýy baýyrdan uryp, nokaýtqa túsirgendeı bolady eken. Bahreın, Iran, Indonezııa, Taıland, Malaızııa júırikteri shapqan topqa ilese almaǵan soń bizdiń eldiń jeńil atletıkasynan ne úmit, ne qaıyr?!  Ǵusman, Ámın aǵalar álemdik rekordtardy parshalaı buzyp jatqan jyldary bul elder jeńil atletıkadaǵy jarys joly degendi bilmeýshi edi ǵoı.  Olar alǵa, biz artqa ketip baramyz ba sonda?

Jeńil atletıka Azııa oıyndaryndaǵy eń kóp medal úlestirtin sport túri.  Bul joly biz Hanchjoýǵa 18-aq sportshy ákeldik.  Bul shynyn aıtsaq — az! Tobymyzda 524 sportshy bolsa, medaldy kóp beretin sportty basty nazarda ustaý kerek edi.  Keshe osy delegaııamyzdy Hanchjoýǵa shyǵaryp salýǵa kelip, sportshylarǵa bata bergen Ámın Tuıaqov aǵamyz ishteı óz óneriniń jalǵasyn tappaǵanyna qınalmady deımisiz?

Bul aǵamyzǵa emes, elge,eldiń sportyn bastaǵan erlerine syn.  Sol aǵalarymyz kún saıyn el esinen shyǵyp ta bara jatyr.  Keshegideı jerge kelmese, Ámın Tuıaqov aǵamyzdyń ortamyzda tiri júrgenin de bilmeıtinder kóp.  Olardyń esimderin altyn taqtaǵa qashap jazyp qoısa da artyq emes edi!  Aıtpaıyn-aq deısiń: sol Shyǵys Qazaqstan oblysynyń quramynda uzaq turǵan Semeıdiń túlegi Ǵusman Qosanovtyń atynda sport saraıy joq, búgingi chempıondardyń attary saraı mańdaılaryna qashap jazylyp qoıylǵan… Ámın Tuıaqov aǵamyzdyń atynda Sport saraıy tursa nesi artyq?!  Bul jas urpaqty patrıotızmge tárbıeleýge úlesin qosatyn ǵana jaǵdaı emes pe?!.

…E, myna Azııa oıyndarynda kezinde qos aǵamyz jelge de jetkizbegen qashyqtyqtarda birde-bir qazaqstandyq, onyń ústine, qazaq balasy, shyqpaǵan soń kúıip jatqanym ǵoı!  Bul qazaq júgirmeıtin,júgiretin bala tappaıtyn bolǵan ba?! Surastyryńyzdarshy!!!   Aıtyńyzdarshy!!!   Úgitteńizdershi!!!   Jalynyńyzdarshy!!!

Tursyn jumsaq tósek — dıvannan!  Júgirsin!  Júgiretin bala tapsyn, taptyrsyn!

Nesip JÚNISBAIULY, — Hanchjoýdan