ۇلتتىق وليمپيادا كوميتەتىنىڭ باسشىلىعىنا داۋلەت تۇرلىحانوۆ لايىق! – سادىق مۇستافا

بەلگىلى سپورت مامانى، دزيۋدو، قازاق كۇرەسى، اۋىر اتلەتيكادان قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى،  «قۇرمەت» جانە «پاراسات» وردەنىنىڭ يەگەرى سادىق مۇستافا ۇلتتىق وليمپيادا كوميتەتىنىڭ پرەزيدەنتى قىزمەتىنە اتاقتى بالۋان، گرەك-ريم، ەركىن جانە ايەلدەر كۇرەسى فەدەراتسياسىنىڭ پرەزيدەنتى، ازيا كۇرەسى فەدەراتسياسىنىڭ باسشىسى داۋلەت تۇرلىحانوۆتىڭ لايىق ەكەنىن ايتىپ، كوپشىلىكتەن ايگىلى سپورتشىعا تاڭداۋ جاساۋدى ءوتىنىپ، ۇندەۋ جولدادى.

ۇلتتىق وليمپيادا كوميتەتىنىڭ پرەزيدەنتى تيمۋر ق ۇلىباەۆتىڭ ورنىنا اۋەسقوي جانە كاسىپقوي بوكستان الەم چەمپيونى گەننادي گولوۆكين كەلەدى دەگەن اڭگىمە ايتىلعالى ءبىراز بولدى. ءيا، گەننادي گولوۆكين رەسپۋبليكا سپورتىنداعى بەلگىلى تۇلعالاردىڭ ءبىرى. ونىڭ رينگتەگى جەڭىستەرى ميلليونداعان جانكۇيەرلەرگە قۋانىش سىيلادى. بىراق گولوۆكيننىڭ ۇلتتىق وليمپيادا كوميتەتىن باسقارۋعا شاماسى جەتە مە؟ ول وسى ۋاقىتقا دەيىن وبلىستىق نەمەسە رەسپۋبليكالىق مەكەمە باسقارىپ كورگەن جوق. گەننادي وسىعان دەيىن بوكسشى بولدى. جەكە بيزنەسپەن شۇعىلداندى. مۇنداي ادامعا تەك اتاعىنا قاراپ ۇلتتىق وليمپيادا كوميتەتىن قالاي سەنىپ تاپسىرۋعا بولادى؟! ۇلتتىق وليمپيادا كوميتەتىن باسقارۋ ءۇشىن سپورتتىق اتاق ازدىق ەتەدى. قازاق ەلىنىڭ حالىقارالىق وليمپيالىق قاۋىمداستىقتاعى بەدەلىن كوتەرىپ، ابىرويىن ارتتىرۋعا رەسپۋبليكالىق جانە حالىقارالىق دەڭگەيدە قىزمەت اتقارعان، ابدەن ىسىلعان، ۇيىمداستىرۋ قابىلەتىمەن تانىلعان ءىرى تۇلعانى تاڭداۋعا ءتيىسپىز، — دەدى ول.

وسى رەتتە سپورت مامانى گەننادي گولوۆكيننىڭ ۇوك باسقارۋعا شاماسى كەلمەيتىنىن، .ويتكەنى ول ەشقاشان وبلىستىڭ نەمەسە رەسپۋبليكالىق ماڭىزى بار ۇلكەن قالانىڭ سپورتىنا جەتەكشىلىك ەتىپ كورمەگەنىن، ال جاتتىقتىرۋشىلار مەن ادىسكەرلەردىڭ بىرەۋىمەن دە ارالاسىپ، جۇمىس ىستەمەگەنىن اتاپ ءوتتى.

گولوۆكين مۇنداي بيىك لاۋازىمعا ۇمتىلماس بۇرىن اۋەلى ءبىر وبلىستىڭ نەمەسە رەسپۋبليكالىق ماڭىزى بار ۇلكەن قالانىڭ سپورتىن باسقارىپ، مەكتەپتەر مەن وليمپيالىق ءىزباسارلار ورتالىعىنىڭ تىرشىلىگىن ىشىنەن زەرتتەپ، ءبىلۋى كەرەك ەدى. جاتتىقتىرۋشىلارمەن، ادىسكەرلەرمەن ارالاسىپ، ولاردىڭ جۇمىستارىنا زەر سالسا، ارتىق بولماس ەدى.

ءبىزدىڭ جوعارى لاۋازىم يەلەرى سپورت سالاسىنا باسشى تاعايىندار كەزدە ۇمىتكەردىڭ ىسكەرلىگىنە، تاجىريبەسىنە جانە جۇرت اراسىنداعى بەدەلىنە جەتە ءمان بەرمەيدى. ىقپالدى توپتاردىڭ سۇيرەۋىمەن قالاعان ادامىن رەسپۋبليكا سپورتىنىڭ باسشىسى ەتىپ قويا سالادى. وسىنداي جانى اشىماستىقتىڭ، نەمقۇرايلىلىقتىڭ كەسىرىنەن توكيو وليمپياداسىندا 83-ورىنعا، بىلتىرعى ازيا ويىندارىندا 11-ورىنعا ءبىر-اق قۇلدىرادىق، — دەدى سادىق شوڭمۇرىن ۇلى.

ءارى قاراي ول ءوزى ءومىر بويى سپورت سالاسىندا قىزمەت ەتىپ كەلە جاتقانىن، سپورتتى بەس ساۋساعىنداي بىلەتىن ادام رەتىندە سپورتتاعى سولاقاي ساياساتتىڭ كەسىرىنەن تالاي جاس جىشىتتەر مەن قىزداردىڭ قول-اياعى بايلانىپ وتىرعانىن اتاپ كورسەتتى.

مەن ءومىربويى سپورت سالاسىندا كەلە جاتىرمىن. قازاقستاندا دارىندى بالالار وتە كوپ. بىراق سپورتتاعى سولاقاي، ورەسكەل قاتە تىرلىكتىڭ سالدارىنان سول جاستاردىڭ قول-اياعىن ءوزىمىز بايلاپ وتىرمىز.

قۇرمەتتى اعايىن! تاعدىرىم سپورتقا بايلانعان ادام رەتىندە ۇلتتىق وليمپيادا كوميتەتىنىڭ پرەزيدەنتى قىزمەتىنە ءماجىلىس دەپۋتاتى داۋلەت تۇرلىحانوۆتى لايىق سانايمىن. داۋلەت بولات ۇلى — گرەك-ريم كۇرەسىنەن كەڭەس وداعىنىڭ جەتى دۇركىن چەمپيونى، الەم، ەۋروپا جانە ازيا چەمپيونى، ەكى وليمپيادانىڭ جۇلدەگەرى. حالىقارالىق كۇرەس اسسوتسياتسياسىنىڭ بيۋرو مۇشەسى، ازيا كۇرەس فەدەراتسياسىنىڭ پرەزيدەنتى.

التى جىلداي قازاقستان سپورتىنىڭ باسشىسى بولدى. شيرەك عاسىرداي ۋاقىت رەسپۋبليكانىڭ كۇرەس فەدەراتسياسىنىڭ تىزگىنىن ۇستادى. حالىقارالىق دەڭگەيدە مويىندالعان تۇلعا. ءىرى دەرجاۆالاردىڭ سپورت باسشىلارىمەن تەڭ دارەجەدە سويلەسەدى. حالىقارالىق دەڭگەيدەگى بەدەلىنىڭ ارقاسىندا قازاقستاندا بىرنەشە ازيا چەمپيوناتتارى مەن حالىقارالىق جارىستاردى ۇيىمداستىردى. ۇزاق جىل گرەك-ريم كۇرەسىنەن قازاقستان قۇراماسىن جاتتىقتىرىپ، الەم چەمپيوندارى مەن وليمپيادا چەمپيوندارىن دايىندادى.

1994 جىلدان باستاپ بىرنەشە رەت پارلامەنت دەپۋتاتى بولىپ سايلاندى. قىسقاسى، قازىر ناعىز تولىسقان، تاجىريبەسى ابدەن جەتىلگەن، كاسىبي دەڭگەيى وسكەن، كوزقاراسى قالىپتاسقان شاعى. ەڭ باستىسى، حالىقتىڭ قالاۋلى ۇلى. ەل ماقتانىشى. كەڭەس وداعىنىڭ وتارىندا بولعان كەزىمىزدە تاماشا جەڭىستەرىمەن ۇلتىمىزدىڭ رۋحىن كوتەرگەن ازامات، — دەدى سادىق مۇستافا.

سونىمەن بىرگە ول گولوۆكيننىڭ ۇوك پرەزيدەنتتىگىنە لايىقسىز ەكەن دەپ كەمسىتىپ وتىرماعانىن، كەرىسىنشە بوكسشىعا سپورت سالاسىندا بىرنەشە جىل جۇمىس ىستەپ، ىسىلۋ كەرەكتىگىن ەسكەرتتى.

ءبىز گەننادي گولوۆكيندى ۇلتى باسقا دەپ شەتتەتىپ وتىرعان جوقپىز.گەننادي سپورت سالاسىندا بىرنەشە جىل قىزمەت اتقارىپ، ءبىراز ىسىلسىن. ءوزىن مويىنداتسىن. قازاق ەلىنە ىسكەر ازامات، بىلىكتى باسشى رەتىندە تانىلسىن. سودان كەيىن بيىك لاۋازىمعا بارىپ جاتسا، ەشكىم قارسى بولمايدى. ال قازىرگى ۇمتىلىسى اسىعىس، قاتە شەشىم.

قادىرلى اعايىن! اتالارىمىز: «حالىق قالاسا، حان تۇيەسىن سويادى» دەگەن. ەلدىگىمىزدى تانىتىپ، اۋىزبىرلىگىمىزدى كورسەتىپ، وسىنداي كەزدە داۋلەت بولات ۇلىن ءبىر ادامداي قولدايىق، — دەدى ول ءسوزىنىڭ سوڭىندا.

بۇل ۇندەۋ سادىق مۇستافانىڭ الەۋمەتتىك جەلىدەگى پاراقشاسىندا جاريالادى. ونىڭ عالامتوردا شىققانىنا ءبىر ساعاتتاي ۋاقىت بولماسا دا سپورت مامانىنىڭ ۇسىنىسىن قولداپ جاتقان ادامنىڭ قاتارى كوبەيىپ جاتىر. «سادىق شوڭمۇرىن ۇلىنىڭ ءسوزىنىڭ جانى بار. بۇل قىزمەتكە داۋلەت بولات ۇلى ابدەن لايىق! جالپى، تۇرلىحانوۆ قاي قىزمەتكە، قاي جۇمىسقا بارسا دا توردەن كورىنۋگە ءتيىس تۇلعا»، دەگەن پىكىرلەر بار.