قازاق كوكپارشىلارى قارت قۇرلىقتان كەلدى

ۆەنگريانىڭ «OMEK EXPO» اتتى ايگىلى اگرومادەني كورمەسى اياسىندا 28-29 قىركۇيەكتە بۋداپەشت قالاسىنىڭ ىرگەسىندەگى بولوتون اتتى ەلدىمەكەندە كوكپاردان ديپلوماتيالىق كۋبوك ءوتتى. بۇل تۋرالى ۇلتتىق سپورت قاۋىمداستىعى حابارلادى.

بۇل جارىستا تۇركىستان وبلىسىنىڭ «قۇلاگەر» كوكپار كومانداسىنىڭ نەگىزگى مۇشەلەرى سايدۋللا اسلانبەك، سابىروۆ بايدىبەك، مىرزاباەۆ نۇرجىگىت، ايتباەۆ تەمىرحان،تولەپ نۇريسلام، ايتان داۋلەت، شىرىنقۇلوۆ باقتىباي ونەر كورسەتتى. كوماندانى باستاپ بارعان قازاقستان رەسپۋبليكاسى ۇلتتىق سپورت تۇرلەرىنەن باس جاتتىقتىرۋشى قۋانىشبەك قۇراماەۆ. قازاقستان مەن ۆەنگريا كوماندالارى اراسىنداعى جولداستىق كەزدەسۋدى ەۋروپا جۇرتشىلىعى قاتارىنان ەكى كۇن تاماشالادى.

جولداستىق كەزدەسۋدە 6:4 ەسەبىمەن جەڭىسكە جەتكەن قازاق كوكپارشىلارى ديپلوماتيالىق كۋبوكتى ولجالاپ قايتتى. سونداي-اق، ءبىزدىڭ كوكپارشىلار  كوكپاردان تۇڭعىش ۇيىمداستىرىلعان  ۆەنگريانىڭ  اشىق چەمپيوناتىنا قاتىسىپ، ماجارستاندىق 5 كوماندانى دا ايقىن باسىمدىلىقپەن ۇتقان. قازاقستان-ماجارستان جولداستىق كەزدەسۋدىڭ نەگىزگى ۇيىمداستىرۋشىسى، ۆەنگريا ەتنوسپورت فەدەراتسياسىنىڭ باسشىسى يشتۆان بەنتسزەنىڭ ايتۋىنشا،  ەۋروپا تورىندە وتكەن بۇل كوكپار ويىندارى 20-26 قاراشادا وزبەكستاندا بولاتىن كوكپاردان ءىى الەم چەمپيوناتىنا ماجارستان ۇلتتىق كوكپار كومانداسىنىڭ دايارلىعىن ارتتىرۋ ماقساتىندا ۇيىمداستىرىلعان.

ەسكە سالا وتەلىك، قازاق كوكپارشىلارىنىڭ ەۋروپا تورىندە كوكپار شابۋى وسىمەن ەكىنشى رەت. العاش رەت ءبىزدىڭ جىگىتتەرىمىز 1996 جىلى ماجارستاننىڭ كەشكەمەت قالاسىندا وتكەن ءى دۇنيەجۇزىلىك فەستيۆالدا كوكپار، اۋدارىسپاق، تەڭگە ىلۋدەن ۇزدىك ونەر كورسەتىپ، تۇڭعىش فەستيۆالدىڭ گران-پري جۇلدەسىن ولجالاپ ورالعان. سونداي-اق، قازاق كوكپارشىلارى تۇركيادا وتكەن باسەكەدە (2012، 2018) باس جۇلدەنى يەلەنىپ، وتكەن جىلدىڭ جەلتوقسان ايىندا كوكپاردان قازاقستان ۇلتتىق قۇراما كومانداسى ەكى اپتالىق وقۋ-جاتتىعۋ جيىنىن انتاليادا وتكىزدى.