جەتىسۋدا جۋرناليستەر جارىسىنىڭ جالاۋى جەلبىرەدى

تالدىقورعاندا شاعىن فۋتبولدان تۇڭعىش رەت بۇقارالىق اقپارات قۇرالدارى اراسىندا وتكەن «BAQ JETISU LEAGUE» بىرىنشىلىگى ءوز مارەسىنە جەتتى. وعان 6 كوماندا قاتىستى.

ءۇش پەنتا-تريك

قاي سالادا دا تۇرەن سالاتىن قالامى جۇيرىك جۋرناليستەر ەكى اي بويى وڭىرىمىزدەگى №25 ورتا مەكتەپ پەن پوليتەحنيكالىق كوللەدجدىڭ سپورت زالىنا جينالىپ، الا دوپتى ۇرشىقشا ءيىردى. جارىس ون تۋرعا سوزىلدى. ياعني، التى كوماندا ءبىر-بىرىمەن ەكى كەزدەسۋ وتكىزدى. پۋبليتسيستيكا شەبەرلەرى تۋرنيرگە تىڭعىلىقتى دايىندىقپەن كەلگەنى بىردەن كورىندى.

العاشقى اينالىمنان-اق الما-كەزەك شابۋىلعا شىققان كوماندالار ادەمى ويىن ورنەگىن كورسەتىپ، قارشا بوراتقان سوققىلارىمەن تانىلدى. ايتسە دە: «كوپ ويناماعاننىڭ كەسىرىنەن شارشاپ قالىپ جاتىرمىز، ەندى تۇراقتى دايىندىقتى قولعا الۋ كەرەك»، – دەپ جاتقاندار دا بولدى. ءسويتىپ، العاشقى تۋردا «Qalamger» «Sport Media» كومانداسىنان 4:7 ەسەبىمەن جەڭىلسە، «ءVىر Press» «Baq United» كومانداسىنان 12:6 ەسەبىمەن باسىم ءتۇستى. ال «Taldy Paris» «7su News» كومانداسىن 8:1 ەسەبىمەن ۇتتى. ءبىرىنشى تۋردىڭ ەرەكشەلىگى 3 ويىندا ءۇش پەنتا-تريك كوردىك. اتاپ ايتساق، ارسەن بەسەتاەۆ («Sport Media»)، الماس مىرزاحمەتوۆ («Vip Press»)، ازامات شەدىمباي قارسىلاستار قاقپاسىنا ءتورت دوپ سالىپ، مەرگەندىگىمەن تانىلدى.

ويىن ۋاقىت وتكەن سايىن قىزا ءتۇستى. ءتىپتى، ءار كوماندا جەڭىستىڭ جەلكەنىن كوتەرۋ ءۇشىن جەكە دايىندىق جاساۋعا كوشتى. كىل جۇرىكتەن كىم جۇيرىك ەكەنىن انىقتاۋ قيىنعا سوقتى. بىراق التى كەزەڭ بويى «Sport Media» كومانداسىن وكشەلەپ كەلە جاتقان «Vip Press» پەن «Taldy Paris» سوڭعى ويىنداردا بىلگەندەرىنەن جاڭىلدى.

ءبىرى «7su News» كومانداسىنا جول بەرسە، ەكىنشىسى چەمپيونداردان ايلاسىن اسىرا المادى. ءسويتىپ، ءتۋرنيردىڭ سەگىزىنشى تۋرىندا «Sport Media» مەرزىمىنەن بۇرىن جەڭىمپاز اتاندى. ايتا كەتەيىك، «7su News» كومانداسى — ۇزدىك ءۇش كوماندانى دا تىزە بۇكتىرگەن جالعىز كوماندا. ال «Qalamger» ويىننىڭ ءبىرىنشى بولىگىندە ۇتىلمادى. «Baq United» سوڭعى تۋرلاردا تاماشا ويىن ۇلگىسىن كورسەتتى.

 قولدا تۇرعان كۇمىس جۇلدە

باق ليگانىڭ سوڭعى تۋرى. چەمپيون انىق. كۇمىس جۇلدە ءبىر قاراعاندا «Taldy Paris» كومانداسىندا. ولار «Vip Press» كومانداسىنان سوققان گولى دا كوپ، ۇپايمەن دە الدا. كۇمىس مەدالدى جەڭىپ الۋ ءۇشىن تەڭ ويىن دا جەتكىلىكتى. ال «Vip Press» كۇمىس جۇلدەگەر اتانۋ ءۇشىن چەمپيونداردى ءىرى ەسەپپەن ۇتىپ قانا قويماي، ەكىنشى ورىندا تۇرعان قارسىلاستارى دا كوپ دوپ جىبەرىپ، جەڭىلۋى كەرەك ەدى.

باق ليگاداعى ويىنشىلاردىڭ دوپ ويناۋعا ىسىلعانىنان بولار، سوڭعى تۋردا سەنساتسيا ورىن الدى. «Taldy Paris» «Baq United» كومانداسىنان 10:1 ەسەبىمەن تاس-تالقان بولىپ جەڭىلدى. «Vip Press» «Sport Media» كومانداسىن 9:4 ەسەبىمەن ۇتىپ، كۇمىسپەن كۇپتەلدى. ال «7su News» (13 ۇپاي)، «Baq Unaited»  (10 ۇپاي)، «Qalamger» (6 ۇپاي) كوماندالارى كەلەسى ورىندارعا جايعاستى.

جەڭىمپازدار مەن جۇلدەگەرلەردى ماراپاتتاۋ ءراسىمى جۋرناليستەر ۇيىندە ءوتتى. شاراعا وبلىستىق دەنە شىنىقتىرۋ جانە سپورت باسقارماسىنىڭ باسشىسى نۇرباقىت تەڭىزباەۆ، «جەتىسۋ» گازەتى باس رەداكتورىنىڭ ورىنباسارى جۇماتاي وسپان ۇلى، «جەتىسۋ» تەلەارناسى ديرەكتورىنىڭ ورىنباسارلارى سەرىك ابىكەن مەن دوسان اتانتەلوۆ كەلىپ، ماقتاۋ قاعازى، مەدال مەن كۋبوكتاردى تابىستادى.

ەرەكشە ويىنىمەن كوزگە تۇسكەن اياقدوپشىلار ماراپاتتان تىس قالمادى. اتاپ ايتساق، دۋمان التىنبەك ۇلى «ۇزدىك قورعاۋشى»، ايدوس قاليەۆ «ۇزدىك قاقپاشى»، مەدەت جۇماباي «ۇزدىك ويىنشى» جانە 36 گولدىڭ اۆتورى اتانعان الماس مىرزاحمەتوۆ «ۇزدىك سۇرمەرگەن» بولىپ العا شىقتى. سونىمەن قاتار، بىرقاتار ويىنشىعا «ۇزدىك گول»، «ارداگەر ويىنشى»، «ۇزدىك جاس ويىنشى»، «شابۋىلدى ۇزدىك ۇيلەستىرۋشى»، «ۇزدىك قورعاۋشى»، «ۇزدىك جارتىلاي قورعاۋشى»، «ۇزدىك كاپيتان»، «ۇزدىك شابۋىلشى» سىندى نوميناتسيالار تابىس ەتىلدى.

ايدار قاليەۆ

الماتى وبلىسى