Chempıondar ustahanasy

«Bolar bala besiginde bulqynar», demekshi, daryndy balanyń qatarlas qurby-qurdastarynan ózgeshiligi árkezde bir qadam alda júrip, ozyq oılaýynda bolady –deıdi ǵalymdar. Iá, buǵan qosylmasqa daýa joq. Balanyń jastaıynan ár salaǵa qabilettiligi baıqala bastaǵannan bastap, ony durys arnaǵa baǵyttaı bilý ata-ananyń mindeti. Balanyń júrek qalaýy ne qalasa soǵan beıimdeýdiń ornyna kóptegen ata-analar ózderiniń qalaýy boıynsha oqýǵa nemese sportqa berip jatady. Árıne, ol durys emes. Qazaqta «Talapty bala-talpynǵan qustaı, qumary qanbas aspanǵa ushpaı», degen qanatty sóz bar. Talapty bala qalaıda bir jerden tesip shyǵary sózsiz. Tek durys qanattana bilse bolǵany. Ol degenimiz «Bulaq kórseń kózin ash», demekshi sol talapty da talantty balalardy tanı biletin áke-shesheden bólek bapkerlerge úlken jaýapkershlik artylady. Kóp ishinen talantty balany sýyryp alyp qanatyn qamdap, úlken bıikke samǵap ushýyna baǵyt berer bilikti bapkerler kóbinese daryndy jastarǵa arnalǵan mektep oshaqtarynda sport mektepterinde bolady.

Búgingi bizdiń áńgime arnasy kóptegen talantty jastardyń qanatyn qomdap, úlken sportqa ushyryp shyǵaryp jatqan  Almaty qalasynyń mańyndaǵy «Shańyraq» shaǵyn aýdanyndaǵy «Olımpıada rezerviniń Respýblıkalyq mamandandyrylǵan mektep-ınternat kolledjine arnalmaq. Bul sport mektebiniń irgetasy 2007 jyly qalanǵaly beri álem, Azııa jarystarynda júlde salǵan kóptegen sportyshalrdyń qatary tolyǵa túsýde. Mysaly, júzýden rekord jańartqan Azııa oıyndary men álem chempıony Elmıra Aıǵalıeva men bokstan álem chempıondary esimderge elge tanylǵan Jánibek Álimhanuly men Nazym Qyzaıbaılar aıtýly mekteptiń túlekteri.

Qazirgi tańda sporttyń 14 túrinen 440 oqýshy bilimmen sportty qosaqtap shyńdalýda. Qazir aıtýly sport mektebinde tálim alyp jatqan talanttardyń jetip jatqan jetistikteri de aýyz toltyryp aıtarlyqtaı. Mysaly, Aqtaý kalasynda bıylǵy jyldyń 11-17 shilde  aralyǵynda qyzdar boksynan jastar jáne jasóspirim arasynda Qazaqstan chempıonaty bolyp ótken edi. Sol synda mekteptiń atynan 15 qyz qatysyp, 4 altyn, 7 kúmis, 4 qola medalmen oralǵan. Al, chempıonattyń eń úzdik boksshysy Seıdish Baqyt atansa, Býrabaı Merýert Qazaqstan Respýblıkasynyń sport sheberi ataǵyn oryndap, mekteptiń mereıin ósirgen. Altyn júldeni Merýert Býrabaı, Áıgerim Qabdolda, Arýjan Jańabaeva, Baqyt Seıdish jeńip alsa, kúmis júldeni Shahnaz Taıyrjanova, Arýza Balǵabek, Arýza Balǵabek, Uldana Taýbaı, Aqjan Túrkistanova, Shuǵyla Rysbek, Úmit Ábilqaıyr, Panar Seıithankyzynyń moıyndaryna taǵylǵan. Al, júldeli úshinshi oryndy Anar Sálimbaı, Mádına Manatqyzy, Lııa Abdýllaeva men Nursulý Súıenaly syndy gúrzi judyryqty bylǵary qolǵap sheberleri ıe bolǵan eken. Bylaısha aıtqanda, qyzdar arasynda ótken el birinshiligine tigilgen júldeniń basym bóligin aıtýly bir ǵana sport mektebiniń bylǵary qolǵap kıgen talantty qyzdary jıyp alyp qaıtsa kerek. Sonymen qatar, bıylǵy jyldyń 2-10 tamyz aralyǵynda Bahreın memleketiniń Manama qalasynda erkin kúresten jalaýyn kótergen U-20 jastar arasyndaǵy Azııa chempıonatynda 125 kg salmaq dárejesinde beldesken balýanymyz Bekzat Táji qola júldeger atansa, 16 tamyz kúni Bolgarııanyń astanasy Sofııa qalasynda erkin kúresten jastar arasynda (U20) ótken kezekti álem chempıonatynyń ekinshi kúni el qorjynyna Mereı Bazarbaev 57 kılo salmaqta fınalǵa shyǵyp, kúmis medal ıelendi. Mereıdiń kúmis medali osy álem chempıonatyndaǵy erkin kúres sheberleri alǵan jalǵyz júlde bolǵanyny basa aıtamyz. Al, sol júlde osy mekteptiń ujymy, dırektory Medet Torǵaıuly, erkin kúres jattyqtyrýshylary men bas bapkeri Rolan Keshýbaevtyń jumyla jumys jasap tókken terleriniń jemisi ekenin aıtpasqa bolmas. Jeńis – tynbaı jasaǵan jattyǵýlar men tabandy eńbeńtiń arqasynda keledi. Sonymen qatar, qamqorlyq pen jaǵdaı jaqsy qarastyrylǵan jerde tabysta kóp kúttirmeıdi. Endeshe, daryndy jastardy tobymen shyǵaryp jatqan chempıondar ustahanasy atanǵan mektep ujymy men el namysy úshin tabysty ónerlerimen mektep maqtanyshtaryna aınalǵan sporshylarǵa aldaǵy ýaqytta da bıikten kórinýlerine tilekshimiz.

Aqyn ORDABAIULY,

ALMATY