چەمپيوندار ۇستاحاناسى

«بولار بالا بەسىگىندە بۇلقىنار»، دەمەكشى، دارىندى بالانىڭ قاتارلاس قۇربى-قۇرداستارىنان وزگەشىلىگى اركەزدە ءبىر قادام الدا ءجۇرىپ، وزىق ويلاۋىندا بولادى –دەيدى عالىمدار. ءيا، بۇعان قوسىلماسقا داۋا جوق. بالانىڭ جاستايىنان ءار سالاعا قابىلەتتىلىگى بايقالا باستاعاننان باستاپ، ونى دۇرىس ارناعا باعىتتاي ءبىلۋ اتا-انانىڭ مىندەتى. بالانىڭ جۇرەك قالاۋى نە قالاسا سوعان بەيىمدەۋدىڭ ورنىنا كوپتەگەن اتا-انالار وزدەرىنىڭ قالاۋى بويىنشا وقۋعا نەمەسە سپورتقا بەرىپ جاتادى. ارينە، ول دۇرىس ەمەس. قازاقتا «تالاپتى بالا-تالپىنعان قۇستاي، قۇمارى قانباس اسپانعا ۇشپاي»، دەگەن قاناتتى ءسوز بار. تالاپتى بالا قالايدا ءبىر جەردەن تەسىپ شىعارى ءسوزسىز. تەك دۇرىس قاناتتانا بىلسە بولعانى. ول دەگەنىمىز «بۇلاق كورسەڭ كوزىن اش»، دەمەكشى سول تالاپتى دا تالانتتى بالالاردى تاني بىلەتىن اكە-شەشەدەن بولەك باپكەرلەرگە ۇلكەن جاۋاپكەرشلىك ارتىلادى. كوپ ىشىنەن تالانتتى بالانى سۋىرىپ الىپ قاناتىن قامداپ، ۇلكەن بيىككە سامعاپ ۇشۋىنا باعىت بەرەر بىلىكتى باپكەرلەر كوبىنەسە دارىندى جاستارعا ارنالعان مەكتەپ وشاقتارىندا سپورت مەكتەپتەرىندە بولادى.

بۇگىنگى ءبىزدىڭ اڭگىمە ارناسى كوپتەگەن تالانتتى جاستاردىڭ قاناتىن قومداپ، ۇلكەن سپورتقا ۇشىرىپ شىعارىپ جاتقان  الماتى قالاسىنىڭ ماڭىنداعى «شاڭىراق» شاعىن اۋدانىنداعى «وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات كوللەدجىنە ارنالماق. بۇل سپورت مەكتەبىنىڭ ىرگەتاسى 2007 جىلى قالانعالى بەرى الەم، ازيا جارىستارىندا جۇلدە سالعان كوپتەگەن سپورتىشالردىڭ قاتارى تولىعا تۇسۋدە. مىسالى، جۇزۋدەن رەكورد جاڭارتقان ازيا ويىندارى مەن الەم چەمپيونى ەلميرا ايعاليەۆا مەن بوكستان الەم چەمپيوندارى ەسىمدەرگە ەلگە تانىلعان جانىبەك ءالىمحان ۇلى مەن نازىم قىزايبايلار ايتۋلى مەكتەپتىڭ تۇلەكتەرى.

قازىرگى تاڭدا سپورتتىڭ 14 تۇرىنەن 440 وقۋشى بىلىممەن سپورتتى قوساقتاپ شىڭدالۋدا. قازىر ايتۋلى سپورت مەكتەبىندە ءتالىم الىپ جاتقان تالانتتاردىڭ جەتىپ جاتقان جەتىستىكتەرى دە اۋىز تولتىرىپ ايتارلىقتاي. مىسالى، اقتاۋ كالاسىندا بيىلعى جىلدىڭ 11-17 شىلدە  ارالىعىندا قىزدار بوكسىنان جاستار جانە ءجاسوسپىرىم اراسىندا قازاقستان چەمپيوناتى بولىپ وتكەن ەدى. سول سىندا مەكتەپتىڭ اتىنان 15 قىز قاتىسىپ، 4 التىن، 7 كۇمىس، 4 قولا مەدالمەن ورالعان. ال، چەمپيوناتتىڭ ەڭ ۇزدىك بوكسشىسى سەيدىش باقىت اتانسا، بۋراباي مەرۋەرت قازاقستان رەسپۋبليكاسىنىڭ سپورت شەبەرى اتاعىن ورىنداپ، مەكتەپتىڭ مەرەيىن وسىرگەن. التىن جۇلدەنى مەرۋەرت بۋراباي، ايگەرىم قابدولدا، ارۋجان جاڭاباەۆا، باقىت سەيدىش جەڭىپ السا، كۇمىس جۇلدەنى شاحناز تايىرجانوۆا، ارۋزا بالعابەك، ارۋزا بالعابەك، ۇلدانا تاۋباي، اقجان تۇركىستانوۆا، شۇعىلا رىسبەك، ءۇمىت ابىلقايىر، پانار سەيىتحانكىزىنىڭ مويىندارىنا تاعىلعان. ال، جۇلدەلى ءۇشىنشى ورىندى انار ءسالىمباي، ءمادينا ماناتقىزى، ليا ابدۋللاەۆا مەن نۇرسۇلۋ سۇيەنالى سىندى گۇرزى جۇدىرىقتى بىلعارى قولعاپ شەبەرلەرى يە بولعان ەكەن. بىلايشا ايتقاندا، قىزدار اراسىندا وتكەن ەل بىرىنشىلىگىنە تىگىلگەن جۇلدەنىڭ باسىم بولىگىن ايتۋلى ءبىر عانا سپورت مەكتەبىنىڭ بىلعارى قولعاپ كيگەن تالانتتى قىزدارى جيىپ الىپ قايتسا كەرەك. سونىمەن قاتار، بيىلعى جىلدىڭ 2-10 تامىز ارالىعىندا باحرەين مەملەكەتىنىڭ ماناما قالاسىندا ەركىن كۇرەستەن جالاۋىن كوتەرگەن U-20 جاستار اراسىنداعى ازيا چەمپيوناتىندا 125 كگ سالماق دارەجەسىندە بەلدەسكەن بالۋانىمىز بەكزات ءتاجى قولا جۇلدەگەر اتانسا، 16 تامىز كۇنى بولگاريانىڭ استاناسى سوفيا قالاسىندا ەركىن كۇرەستەن جاستار اراسىندا (U20) وتكەن كەزەكتى الەم چەمپيوناتىنىڭ ەكىنشى كۇنى ەل قورجىنىنا مەرەي بازارباەۆ 57 كيلو سالماقتا فينالعا شىعىپ، كۇمىس مەدال يەلەندى. مەرەيدىڭ كۇمىس مەدالى وسى الەم چەمپيوناتىنداعى ەركىن كۇرەس شەبەرلەرى العان جالعىز جۇلدە بولعانىنى باسا ايتامىز. ال، سول جۇلدە وسى مەكتەپتىڭ ۇجىمى، ديرەكتورى مەدەت تورعاي ۇلى، ەركىن كۇرەس جاتتىقتىرۋشىلارى مەن باس باپكەرى رولان كەشۋباەۆتىڭ جۇمىلا جۇمىس جاساپ توككەن تەرلەرىنىڭ جەمىسى ەكەنىن ايتپاسقا بولماس. جەڭىس – تىنباي جاساعان جاتتىعۋلار مەن تاباندى ەڭبەڭتىڭ ارقاسىندا كەلەدى. سونىمەن قاتار، قامقورلىق پەن جاعداي جاقسى قاراستىرىلعان جەردە تابىستا كوپ كۇتتىرمەيدى. ەندەشە، دارىندى جاستاردى توبىمەن شىعارىپ جاتقان چەمپيوندار ۇستاحاناسى اتانعان مەكتەپ ۇجىمى مەن ەل نامىسى ءۇشىن تابىستى ونەرلەرىمەن مەكتەپ ماقتانىشتارىنا اينالعان سپورشىلارعا الداعى ۋاقىتتا دا بيىكتەن كورىنۋلەرىنە تىلەكشىمىز.

اقىن ورداباي ۇلى،

الماتى