تۇركىستاندا ازيانىڭ تۇيە بالۋانى انىقتالدى

تۇركىستان قالاسىنداعى قازاق كۇرەسىنەن ەرەسەكتەر اراسىندا قاجىمۇقان مۇڭايتپاسوۆتىڭ جۇلدەسىنە ارنالعان ازيا كۋبوگى اياقتالدى.

«تۇيە بالۋان» اتانعان باتىس قازاقستان وبلىسىنىڭ وكىلى تەمىرلان كولباي باس جۇلدەگە يە بولىپ،  «نيۆا» اۆتوكولىگىن جەڭىپ الدى.

ەكى كۇنگە سوزىلعان ءدۇبىرلى دودادا وتانداستارىمىز ءوز مىقتىلىقتارىن كورسەتىپ، ازيا قۇرلىعى بويىنشا تەڭدەسسىز  ەكەندىگىن كورسەتتى.

كەزىندە حالقىمىزدىڭ اتاق-داڭقىن كۇرەس ارقىلى بۇكىل الەمگە تانىتقان قاجىمۇقان مۇڭايتپاسوۆ تا تالاي جەڭىستىڭ شىڭىنا جەتتى. بيىل كەڭ كولەمدە ۇيىمداستىرىلعان بۇل ازيا كۋبوگىندا «تۇيە بالۋان» اتانعان تالانتتى بالۋان تەمىرلان كولباي كوپشىلىكتىڭ ىستىق ىقىلاسىنا بولەندى.  ال الماتى وبلىسىنىڭ وكىلى مادي  ەدىلباەۆ كۇمىس جۇلدەگەر اتانسا، قولا جۇلدەنى اباي وبلىسىنىڭ ماقتانىشى اسەت احمەتجانوۆ قاناعات تۇتتى. جەڭىمپازدار مەن جۇلدەگەرلەردى تۇركىستان وبلىسىنىڭ دەنە شىنىقتىرۋ جانە سپورت باسقارماسىنىڭ باسشىسى قانات جولدىقاراەۆ پەن كۇرەستىڭ بىلىكتى مامانى قۋات بايحودجاەۆ، سونىمەن قاتار قازاق كۇرەسىنەن قازاقستان رەسپۋبليكاسىنىڭ مەملەكەتتىك جاتتىقتىرۋشىسى جەڭىس بيتكوزوۆتەر ماراپاتتاپ، تالانتتىلاردى تانىتتى. ايتا وتەرلىگى، الامان كۇرەس دوداسىنىڭ باس جۇلدەسىنە ورداباسى اۋدانىنىڭ  اكىمى نۇربەك بادىراقوۆ دەمەۋشى بولىپ،  ورداباسىلىقتار اتىنان اۆتوكولىكتى سىيعا تارتتى. وسىلايشا، قازاق كۇرەسىنىڭ جاڭعىرۋىنا ۇلەسىن قوستى.

قازاق كۇرەسى اسسوتسياتسياسى وكىلدەرىنىڭ ايتۋىنشا، قاجىمۇقان اتىنداعى ازيا كۋبوگىن جىل سايىن ءداستۇرلى تۇردە ۇيىمداستىرۋ جوسپارلانىپ وتىر.

عابيت ساپاربەك،

تۇركىستان

فوتو: تۇركىستان وبلىسى اكىمنىڭ ءباسپاسوز قىزمەتى