اقجۇرەك تاڭاتاروۆ — الماتى وبلىسى دەنە شىنىقتىرۋ سپورت باسقارماسىنىڭ باسشىسى!

تۋريزم جانە سپورت مينيسترلىگى جانىنداعى وڭىرلىك سپورت باسقارمالارىنىڭ باسشىلارىن تاعايىنداۋ جونىندەگى كوميسسيانىڭ كەزەكتى وتىرىسى ءوتتى، دەپ حابارلادى اتالعان ۆەدومستۆونىڭ ءباسپاسوز قىزمەتى.

جيىندا الماتى وبلىسىنىڭ دەنە شىنىقتىرۋ جانە سپورت باسقارماسىنىڭ باسشىسى لاۋازىمىنا ۇسىنىلعان ۇمىتكەر قارالدى. وندا ەركىن كۇرەستەن لوندون وليمپياداسىنىڭ قولا جۇلدەگەرى اقجۇرەك تاڭاتاروۆتىڭ كانديداتۋراسى جان-جاقتى تالقىلاندى. سونىڭ ناتيجەسىندە وعان كوميسسيا مۇشەلەرى كەلىسىم بەردى، — دەلىنگەن حابارلامادا.

قازىرگى كەزدە اقجۇرەك تاڭاتاروۆ جامبىل وبلىسى اكىمدىگىنىڭ دەنە شىنىقتىرۋ جانە سپورت باسقارماسى №7 وبلىستىق مامانداندىرىلعان بالالار-جاسوسپىرىمدەر سپورت مەكتەبىنىڭ باسشىسى قىزمەتىن اتقارادى.

ۇمىتكەردىڭ سپورت سالاسىنداعى كاسىبي تاجىريبەسى، باسقارۋشىلىق قابىلەتى جانە وڭىردەگى سپورتتى دامىتۋعا قاتىستى ۇستانىمى كوميسسيا تاراپىنان جان-جاقتى زەردەلەنىپ، وڭ شەشىم قابىلداندى.

كانديداتتاردى جەرگىلىكتى اتقارۋشى ورگاندار ۇسىنادى. ال تاعايىنداۋ تەك تۋريزم جانە سپورت مينيسترلىگى جانىنداعى كوميسسيانىڭ ماقۇلداۋىنان كەيىن بولادى، — دەپ حابارلادى مينيسترلىك.

اقجۇرەك تاڭاتاروۆ 1986 جىلى تۋعان. 2012 جىلى لوندون وليمپياداسى مەن 2017 جىلى الەم چەمپيوناتىندا قولا جۇلدەگەر اتاندى. ال، 2017 جىلى ازيا چەمپيونى اتاعىن جەڭىپ الدى.

بىلتىرعى جەلتوقسان ايىندا بوكستان وليمپيادا چەمپيونى باقتيار ارتاەۆ قىزىلوردا وبلىسىنىڭ دەنە شىنىقتىرۋ، سپورت جانە تۋريزم باسقارماسىنا باسشى بولىپ تاعايىندالدى.