ترياتلونشىلار ون جىلدان بەرى وليمپياداعا جولداما العان جوق — مينيستر

تۋريزم جانە سپورت ءمينيسترى ەرمەك مارجىقپاەۆ ترياتلون فەدەراتسياسىنىڭ باسشىلارى جانە جاتتىقتىرۋشىلار شتابىمەن كەزدەستى، دەپ حابارلادى ۆەدومستۆو.

جيىندا فەدەراتسيا وكىلدەرى ترياتلوننان ۇلتتىق قۇرامانىڭ 2023 جىلعى ناتيجەلەرىن قورىتىندىلاپ، الداعى باسەكەلەرگە دايىندىق جوسپارىن تانىستىردى.

ترياتلوننان قازاقستان قۇراماسى بىلتىر حالىقارالىق جارىستاردا ءتاۋىر ناتيجە كورسەتكەنىمەن، قىتايداعى ازيا ويىندارىندا باسەكە الدىنداعى ءوز مىندەتتەمەلەرىن ورىنداي المادى. ياعني، ۇلتتىق قۇرامانىڭ باس جاتتىقتىرۋشىسى ازيادانىڭ الدىندا 1 كۇمىس مەدال جەڭىپ الۋعا ۋادە بەرگەنىمەن، ءىس جۇزىندە تەك 1 قولا جۇلدەگە يە بولدى.

قازاقستان ترياتلونىنىڭ حالىقارالىق ارەنادا جەڭىسپەن ورىلگەن جاقسى ءداستۇرى بار. اتاپ ايتار بولساق، ەلىمىزدىڭ داڭقتى ترياتلونشىسى گااگ دميتري 1999 جىلى الەم چەمپيوناتىندا توپ جارىپ، سيدنەي وليمپياداسىندا ونەر كورسەتتى. وكىنىشكە قاراي، جاسىل قۇرلىقتاعى الاماندا وتانداسىمىز ءتورتىنشى ورىندى قاناعات تۇتۋعا ءماجبۇر بولدى. سونىمەن قاتار وتاندىق سپورتشىلاردان ميحايل كۋزنەتسوۆ سيدنەي وليمپياداسىنا، دانيل ساپۋنوۆ افينا وليمپياداسىنا قاتىسقان ەدى. الايدا، ولار دا جۇلدەلى ورىنداردان كورىنە المادى. 2012 جىلدان بەرى سپورتشىلار ترياتلوننان وليمپيادا ليتسەنزياسىن جەڭە الماي كەلەدى. سوندىقتان الداعى ۋاقىتتا وتاندىق ترياتلوندى جانداندىرىپ، ناتيجەگە جۇمىس ىستەۋ كەرەك، — دەدى ەرمەك مارجىقپاەۆ.

سونىمەن قاتار مينيستر وليمپيالىق ويىنداردىڭ قارساڭىندا ترياتلون فەدەراتسياسىنا وليمپيادا جولداماسىن يەلەنۋگە مۇمكىندىگى بار ۇلتتىق قۇراما كوشباسشىلارىن جەكە جوسپار بويىنشا دايىنداۋ، 2024 جىلعا ارنالعان سپورتتىق-بۇقارالىق ءىس-شارالاردىڭ كۇنتىزبەسىن ساپالى جاساۋ، حالىقارالىق ۇيىمدارداعى وكىلدەرىمىزدىڭ سانىن ارتتىرۋ جانە حالىقارالىق دەڭگەيدەگى تورەشىلەردى دايارلاۋ جونىندەگى جۇمىستى جالعاستىرۋ سياقتى بىرقاتار تاپسىرما بەردى.