«ەرتىس» كلۋبىنىڭ ەكس-ءفۋتبوليسى مەسسيدىڭ كومانداسىمەن وينادى

گونكونگتا اقش-تىڭ «ينتەر مايامي» مەن جەرگىلىكتى فۋتبولشىلاردان جاساقتالعان كوماندانىڭ اراسىنداعى جولداستىق ماتچتا پاۆلوداردىڭ «ەرتىس» كلۋبىندا ويناعان تۇركىمەنستاننىڭ لەگيونەرى رۋسلان مينگازوۆ الاڭعا شىقتى.

رۋسلان مينگازوۆ 2019-2020 جىلدارى پاۆلوداردىڭ «ەرتىسى» كلۋبىندا ويناعان. ال قازىر گونكونگتىڭ «كيتچي» كومانداسىمەن كەلىسىمشارت جاساپ، وسى جاساقتىڭ جەيدەسىندە جاسىل الاڭعا شىعىپ ءجۇر.

ماتچتا  گونكونگتىڭ فۋتبولشىلارى ليونەل مەسسيدىڭ كومانداسىنان 1:4 ەسەبىمەن جەڭىلدى. مينگازوۆ ماتچتىڭ باسىنان باستاپ سوڭىنا دەيىن وينادى.

وكىنىشكە قاراي، «ينتەر ءماياميدىڭ» ساپىندا ليونەل مەسسي، حوردي البا، لۋيس سۋارەس پەن سەرحيو بۋسكەتس سىندى ويىنشىلار بولعان جوق. ارگەنتينالىق فۋتبوليست بۇكىل ويىن بويى قوسالقى قۇرامنىڭ ورىندىعىندا وتىرىپ شىقتى. بۇل جەرگىلىكتى جانكۇيەرلەردىڭ كوڭىلىنەن شىقپاي، امەريكالىق كوماندانىڭ باس جاتتىقتىرۋشىسى حەراردو مارتينوعا رەنىشىن ءبىلدىردى.

جانكۇيەرلەر «ينتەر ءماياميدىڭ» باسشىلىعىنان ساتىپ العان بيلەتتەرىنىڭ اقشاسىن قايتارۋدى تالاپ ەتتى. حەراردو مارتينو الەم چەمپيونىنىڭ الاڭعا شىقپاعانىنا شىعارىپ سالما جاۋاپ بەردى.

مەسسي الاڭدا بولسا جاراقات الاتىن ەدى. ونىڭ جاراقات العانى بىزگە كەرەك ەمەس. سىزدەر وسى جەردە قالاسىزدار. ال ءبىز ەرتەڭ قايتىپ كەتەمىز. جاراقاتپەن كەتكىمىز كەلمەيدى، –  دەدى ول.

رۋسلان مينگازوۆ بولسا، «ينتەر ماياميدە» وينايتىن فۋتبول جۇلدىزدارىنىڭ بارىمەن فوتوعا ءتۇسىپ، جاسىل الاڭعا شىققانى ءۇشىن گونكونگقا العىس ايتتى.

جارتىلاي قورعاۋشى «ەرتىس» ساپىندا 13 ماتچ ويناپ، ەكى گول سوققان ەدى. ول 2020 جىلى مامىردا «ەرتىس» پرەمەر-ليگادان شەتتەتىلگەن كەزدە كلۋبپەن كەلىسىمشارتى اياقتالماعانىنا قاراماستان  پاۆلوداردان كەتۋگە اسىققان بولاتىن.

داستان كەنجالين،

استانا

 

View this post on Instagram

 

A post shared by Ruslan Mingazov (@ruslan_mingazov9)