سىرتقى ىستەر مينيسترلىگىندە «ىزگى نيەت ەلشىلەرى» جوباسى باستالدى

Cىرتقى ىستەر مينيسترلىگىندە «قازاقستاننىڭ ىزگى نيەت ەلشىلەرى» جوباسى باستالدى. وسىعان بايلانىستى ۆەدومستۆودا سالتاناتتى ءىس-شارا بولىپ، وعان پرەمەر-ءمينيستردىڭ ورىنباسارى – سىرتقى ىستەر ءمينيسترى مۇرات نۇرتىلەۋدىڭ قاتىستى، دەپ حابارلادى ۆەدومستۆو.

«ىزگى نيەت ەلشىلەرى» جوباسى مەملەكەت باسشىسىنىڭ باستاماسىمەن قولعا الىنىپ وتىر. ول مادەنيەتتەر پەن حالىقتار اراسىنداعى ديالوگتى دامىتۋعا جانە ەلىمىزدىڭ جەتىستىكتەرىن شەت ەلدەردە دارىپتەۋ ماقساتىندا تانىمالدىلىعىن ارتتىرۋعا باعىتتالعان.

مينيستر ءوز العى سوزىندە بىرىككەن ۇلتتار ۇيىمىنىڭ جارعىسى مەن حالىقارالىق قۇقىق نەگىزىندەگى كوپۆەكتورلى جانە سىندارلى سىرتقى ساياساتقا ايقىن بالاما جوق ەكەنىن اتاپ ءوتتى.

بۇرىن-سوڭدى بولماعان گەوساياسي جاعدايدا، حالىقتىق جانە مادەني-گۋمانيتارلىق ديپلوماتيانىڭ الار ورنى بولەك. «الەمدىك ساحنالاردا، ارەنالاردا جانە كونفەرەنتسيالاردا سىزدەردىڭ جەڭىستەرىڭىز بەن تاماشا ونەر كورسەتۋلەرىڭىزدىڭ ارقاسىندا ەلىمىزدىڭ كوك تۋى الەمنىڭ تۇكپىر-تۇكپىرىندە كوتەرىلىپ، مەملەكەتتىك ءانۇران سالتاناتتى تۇردە شىرقالادى، – دەدى ءسىم باسشىسى.

بۇل جوباعا حالىقارالىق قوعامداستىقتا قازاقستان تۋرالى وڭ پىكىر قالىپتاستىرۋعا زور ۇلەسىن قوسىپ جۇرگەن ەلىمىزدىڭ قوعام قايراتكەرلەرى شاقىرىلدى. ولاردىڭ اراسىندا – سكريپكاشى-ۆيرتۋوز، ديريجەر، ازيا-تىنىق مۇحيتى ءوڭىرى وركەسترلەرى اليانسىنىڭ ديرەكتورى مارات بيسەنعاليەۆ، وليمپيادا چەمپيونى، ۆەلوشاباندوز الەكساندر ۆينوكۋروۆ، سۋرەتشى جانە انتيادرولىق قوزعالىس بەلسەندىسى كارىپبەك كۇيىكوۆ، University Medical Center كورپوراتيۆتىك قورىنىڭ باسقارما توراعاسى، كارديوحيرۋرگ يۋري پيا، ساياساتتانۋ عىلىمىنىڭ دوكتورى جانە تاريحي كارتالاردى زەرتتەۋشى مۇحيت-ارداگەر سىدىقنازاروۆ، ن. تىلەنديەۆ اتىنداعى مەملەكەتتىك اكادەميالىق فولكلورلىق-ەتنوگرافيالىق «وتىرار سازى» وركەسترىنىڭ باس ديريجەرى دينارا تىلەنديەۆا; Adam لاقاپ اتىمەن الەمدىك تانىمالدىلىققا يە بولعان ەسترادا ءانشىسى ميرحيداي ميرفارۋح پەن الەم رەكوردىن جاڭارتقان الىپ كۇش يەسى، گيننەس كىتابىنىڭ رەكوردشىسى سەرگەي تسىرۋلنيكوۆ بار.

ءوز سوزىندە الەكساندر ۆينوكۋروۆ جوباعا Astana Qazaqstan Team كومانداسىنىڭ بارلىق مۇشەلەرى قاتىساتىنىن، «ىزگى نيەت ەلشىسى» مارتەبەسىن الۋ پاريج وليمپياداسى قارساڭىندا رۋحتى كوتەرىپ، جەڭىسكە دەگەن سەنىم-كۇشتى ارتتىراتىنىن ايتتى.

شىعارماشىلىق ينتەلليگەنتسيا اتىنان ءسوز سويلەگەن دينارا تىلەنديەۆا ارتىلعان سەنىم ءۇشىن العىسىن ءبىلدىرىپ، ەلىمىزدىڭ مادەنيەتتى شەتەلدىك جۇرتشىلىق الدىندا ناسيحاتتاۋ ارقاشان ماڭىزدى جۇمىس بولا بەرەتىنىن اتاپ ءوتتى.

ونەر، سپورت، عىلىم، مەديتسينا جانە باسقا دا سالالاردا جەتىستىكتەرگە جەتكەن وتانداستارىمىزدى تارتۋ ارقىلى قازاقستانداعى ىزگى نيەت ەلشىلەرى قىزمەتىنىڭ ءساتتى حالىقارالىق تاجىريبەسىن ەڭگىزۋ ەلىمىزدىڭ بەدەلىن نىعايتىپ، بەيبىتشىلىك، دوستىق جانە حالىقارالىق ىنتىماقتاستىقتىڭ نەگىزى بولاتىن مادەني-گۋمانيتارلىق بايلانىستى ارتتىرۋعا ىقپال ەتەدى.