ءسۇيىنشى! ءلاززات ءجۇسىپوۆا پارا-كاراتەدەن تاريحي جۇلدە جەڭىپ الدى

بۇگىن مىسىردىڭ استاناسى كاير قالاسىندا پارا-كاراتەدەن (WKF) الەم چەمپيوناتى اياقتالدى، دەپ حابارلادى قازاقستان كاراتە فەدەراتسياسىنىڭ ءباسپاسوز قىزمەتى.

بيىلعى دودادا قازاقستان قۇراماسىنىڭ قورجىنىنا 1 قولا جۇلدە ءتۇستى. ك10 كاتەگورياسىندا (زاعيپ/كوزى ناشار كورەتىن سپورتشىلار) سىنعا تۇسكەن وتانداسىمىز ءلاززات ءجۇسىپوۆا ۇزدىك ۇشتىككە كىردى. جاتتىقتىرۋشىسى — مەيرامگۇل دۋكۋەۆا.

سپورتشى 2017 جىلدان بەرى الەمدىك دوداعا قاتىسىپ كەلەدى. بۇل — قازاقستان قورجىنىنا پارا-كاراتەشىلەر اراسىندا تۇسكەن العاشقى جۇلدە.

جالپى، كايردەگى باسەكەگە پارا-كاراتەدەن قازاقستان كومانداسى ساپىندا 3 سپورتشى جولداما الىپ، ونەر كورسەتتى.

ولار:

نازگۇل ىزماعامبەتوۆا (K30، تىرەك-قيمىل جۇيەسى زاقىمدانعان سپورتشىلار)

ديدار مۇحامەدجانوۆ (K30، تىرەك-قيمىل جۇيەسى زاقىمدانعان سپورتشىلار)

ءلاززات ءجۇسىپوۆا (K10، سوقىر/كوزى ناشار كورەتىن سپورتشىلار)

بيىل كوكتەمدە تاشكەنت قالاسىندا وتكەن پارا-كاراتەدەن IV ازيا چەمپيوناتىندا قازاقستان كومانداسى 2 التىن، 1 كۇمىس، 4 قولا مەدال يەلەنىپ، كەرەمەت ناتيجە كورسەتكەن. ول كەزدە ءلاززات ءجۇسىپوۆا مەن نازگۇل ىزماعامبەتوۆا التىن، ديدار مۇحامەدجانوۆ قولا جۇلدەگەر اتانعان.

پارا-كاراتەدەن الەم چەمپيوناتى 2014 جىلدان باستاپ حالىقارالىق كاراتە فەدەراتسياسىنىڭ (WKF) باعدارلاماسىنا قوسىلىپ، سودان بەرى تۇراقتى ءوتىپ كەلەدى.

پارا سپورتشىلار بارلىق جارىستا تەك كاتا، ياعني جەكپە-جەكسىز، تەك جەكەلەي جاتتىعۋلار جيىنتىعىن كورسەتۋ ديستسيپليناسىندا سىنعا تۇسەدى.