تاكتيكالىق قاتەلىك نەمەسە مەسسيدىڭ كوز جاسى

الەم فۋتبول جانكۇيەرلەرى ءتورت جىل بويى كۇتىپ تاماشالاعان ءالەم چەمپيوناتى دا ءوز مارەسىنە جەتىپ، جەڭىمپاز كوماندانىڭ دا ەسىمى بەلگىلى بولدى. فۋتبول دەسە ىشكەن اسىن جەرگە قوياتىن الا دوپتىڭ جانكۇيەرلەرى ءبىر ايدا استام ۋاقىت بويى اقش، كانادا جانە مەكسيكادا 48 مەملەكەتتىڭ قاتىسۋىمەن وتكەن الامان دوپ دوداسىن ۇزبەي كورىپ، قىزىعىنا قانىق بولدى. ءيا، 2026 جىلعى الەم چەمپيونى يسپانيا قۇراماسى اتاندى. ارگەنتينا كۇمىس جۇلدەنى مىسە تۇتتى. ال ەندى  الەم چەمپيوناتى قانداي اسەر قالدىرعانى تۋرالى از-كەم ساراپتامالىق وي جۇرگىزە كەتسەك.

«اق بولدى كوك بولدى، كوڭىلگە تۇسكەن داق بولدى»، دەمەكشى الەم چەمپيوناتىنىڭ قىزىعى مەن شىجىعى كوپ بولعانى راس. ءيا، افريكا، ازيا ەلدەرىنەن كەلگەن كوماندالارى دا ازۋىن كورسەتىپ، الەم چەمپيوناتىندا اسەرلى ويىندارىمەن ەستە قالعانىن ۇمىتا الماسپىز. سونىمەن قاتار ات توبەلىندەي كولەمى، 600 مىڭعا تارتا حالقى عانا بار كابو-ۆەردە ەلىنىڭ الەم فۋتبول كوشىن باستاعان الاپاۋىت ەلدەرگە قارسى قايسارلىق كورسەتىپ، ساستىرعان تارتىستى ويىندارى ارقىلى جۇرتشىلىقتى تاڭ قالدىرعانىن قالاي ۇمىتار ەكەنبىز. اسىرەسە، 44 جاستاعى قاقپاشىسى ۆازينيانىڭ قاقپاداعى جانكەشتى، شەبەر ويىندارىن كورگەن كورەرمەن كۇنى بۇگىنگە دەيىن اۋىزدارىنان تاستاماي اسەرلەتە ايتىپ كەلەدى. ودان بولەك بىلىكتى مامان ديك ادۆوكات جاتتىقتىراتىن ات توقىمىنداي عانا كيۋراساو قۇراماسىنىڭ جانكەشتى ويىنىن سىرا، جۋىق ارادا ۇمىتۋ مۇمكىن ەمەس شىعار. سونىمەن اتتارى اڭىزعا اينالعان نەيمار باستاعان برازيليا، اتىنان ات ۇركەتىن كريشتيانۋ رونالدۋداي سۇڭعىلا  ويىنشىسى بار پورتۋگاليا، حارري كەيندەي كوشباسشىسى بار انگليا، مۇحاممەد سالاحتاي سۇرپىل شەبەر ويىشىسى بار مىسىر قۇراماسى، ەدگار حوللاندتاي گولەودورى جاسىنداي جارقىلداعان نورۆەگيا قۇرامالارى مەن كيليان مباپپە سەكىلدى 10 گول سالعان سارا ويىنشىلاردىڭ كومانداسىنىڭ جارىستان شىعىپ قالۋى ميلليونداعان جانكۇيەردىڭ جانىنا كۇيزەلىس اكەلگىنىن دە جاسىرا الماسپىز.

ءيا، بۇل فۋتبول. الەم حالقى قۇرمارتىپ كوز جازباي  كورەتىن سپورتتىڭ شىڭىندا تۇرعان بۇل ويىندا ءاربىر ادامنىڭ ءوز جانكۇيەرى ءوزى تاڭداپ العان سۇيىكتى كومانداسى بولارى حاق. جەڭىس بولعان جەردە جەڭىلىس تە بولاتىنى زاڭدىلىق.

ال ەندى فينالدا كەزدەسكەن وسى الەم چەمپيوناتىنداعى بىرىنە ءبىرى ساي ارگەنتينا مەن يسپانيا كوماندالارىنىڭ ويىنىن وي شەرتە كەتەيىك. بۇل ماتچتى ناعىز ارىستاندار ايقاسى دەسە بولعانداي ەدى. قاقپاسىنا بۇكىل الەم چەمپيوناتى كەزىندە بىر عانا گول جىبەرىپ العان يسپانيا قۇراماسى باس كۋبوكتەن ءۇمىتتى كوماندانىڭ ءبىرى بولعانىن باق وكىلدەرى جارىسا جازىپ جاتتى. دەگەنمەندە ەكى دۇركىن الەم چەمپيونى، قاتارىندا مەسسيدەي الەم مويىنداعان ۇلى فۋتبولشىسى بار ارگەنينانى وسال دەۋدىڭ ءوزى قاتەلىك ەدى. ءيا، ارگەنتينانى كورە المايتىن كوپشىلىك تە  الەم اقپارات جەلىسىنەن “فيفا سۇيرەپ الىپ شىعىپ كەلەدى”، دەگەن پىكىرلەردى دە جابىلا جازىپ كەلگەنىن بىلەمىز. بىراق وسى جەردە ءبىر ايتا كەتەر ماسەلە، ارگەنتينا فيفا سۇيرەۋىنە مۇقتاج ەمەس ەكەنىن مىسىر مەن انگلياعا قارسى ويىندا دالەلدەپ بەردى ەمەس پە دەگەن ويى تۋادى.

بۇل ەكى ماتچتا دا مەسسيدىڭ ۇلى فۋتبولشى ەكەنىنە تاعى كوز جەتكىزگەندەي بولدىق. نەگىزى ۋاقىتتىڭ سوڭىندا جەڭىستى ج ۇلىپ الىپ كەتكەن مۇنداي كوماندا فينالدا ويناۋعا لايىقتى ەكەنىن اتويلاپ تۇرىپ كورسەتتى. ال فينالدا  ارگەنتينا كوز ءتيدى مە ءسوز ءتيدى مە ايتەۋىر بىلگەندەرىنەن جاڭىلىپ، تاكتيكالىق قاتەلىك جىبەرگەنى انىق ەدى. كوماندا تۇگەلدەي قورعانىسقا كوشىپ الدى. نە تۇلەن تۇرتكەنىن بىلمەدىك دوپتى قارسىلاستارىنىڭ يەلىگىنە تولىقتاي بەرىپ قويدى. سوسىن شابۋىل دەگەندى مۇلدەم ۇمىتتى. ونىڭ ۇستىنە جىعىلعانعا جۇدىرىق بولىپ ەنتسو ەرناندەس تە ەرەجە بۇزىپ، ەكىنشى سارى قاعاز ارتىنان قىزىل قاعازبەن جازالانىپ ويىننان قۋىلدى. ون ويىنشىمەن ازۋىن ايعا بىلگەن جاس پەرىلەردەن جاساقتالعان جالىندى كومانداعا قارسى ويناۋ وتە قيىن بولعانى ءسوز جوق. اتتەڭ، فينالعا دەيىن  كەرەمەت جول ءجۇرىپ كەلىپ سوڭعى ويىندا اياقتارى شالىس كەتىپ،شابان ويىن كورسەتكەن ارگەنتينا قۇراماسىنىڭ ەش قاۋقارسىز، بەيشارا قالپىن كورۋ وتە ايانىشتى ەدى.

مەسسي تۇلعا تالانت قوي عاسىردا ءبىر تۋاتىن. ماراپاتتاۋ كەزىندە كوزىنەن اققان جاستارى بارلىعىن بىراق ايتىپ تۇرعانداي ەدى. فۋتبول دەگەن وسى ءبىر قۋانىش ءبىر كۇيىنىشتەن تۇراتىن ۇلى ويىن. الدىن الا كىم جەڭەتىنىن كەسىپ تۇرىپ بولجام ايتا المايتىن سپورت ءتۇرى وسى فۋتبول شىعار، بالكىم. دەگەنمەندە ارگەنتيناعا الەم فۋتبول جانكۇيەرلەرى ءدان ريزا.

تارتىستى، تاماشا ويىن ورنەكتەرىمەن ميلليونداعان فۋتبول قۇمار حالىقتى وزىنە قاراتىپ، فۋتبولدىڭ ۇلى ونەر ەكەنىن كورسەتىپ كەتتى.
تورەشىنىڭ جۇمىسىنا فيفا ءوز باعاسىن بەرە جاتار. بىراق تا وسى فينالداعى ويىندا سارى قاعازدى ءبالىش تارتقانداي اياماي تاراتقانى كورەرمەن ەسىندە ۇزاق ۋاقىت قالاتىنى ءبىر انىق.

“نەگىزى ويىننىڭ جاقسى ءوتۋى تورەشىنىڭ كوزگە كورىنبەۋىنە قاتىستى”، دەپ جاتادى. بالكىم، بۇل دۇرىس تا بولار. ال بۇل سوڭعى فينالدا تورەشى ويىنشىلارمەن بىرگە كوزگە كوپ كورىنگەن جاننىڭ ءبىرى بولدى. ارگەنتينانىڭ قورعانىسقا كوشىپ بارىپ جاتىپ الىپ، 120 مينۋت بويى ءبىر رەتتە ۋناي سيموننىڭ قاقپاسىنا قاۋىپ توندىرمەگەنى ادام تاڭعالارلىق ءجاي دەسە بولادى. قورعانىستا قىمتانىپ الۋ ارگەنتينا ءۇشىن ورنى تولماس قاتەلىك بولعانى جاسىرۋ مۇمكىن ەمەس. بۇكىل چەمپيونات بويى ارسىل- دۇرسىل شابۋىلدارمەن قارسىلاستاردىڭ قورعانىسىندا وت بولىپ، قوعاداي جاپىرىپ كەلگەن كوماندا، فينالداعى ويىندا بىلگەندەرىنەن جاڭىلىپ، الاسۇرىپ-ابدىراپ قالعانى وسىنداي جەڭىلىسكە اكەلدى. قايتەيىك جانكۇيەرلەردىڭ  جانى كۇيىنگەنىمەن جەڭىمپاز بىرەۋ — ول يسپانيا.

دەگەنمەندە ارگەنتينا، ونىڭ ىشىندە مەسسي ءبارىبىر دە الەم حالقىنىڭ جۇرەگىندە ماڭگى قالادى. يسپانيا قانشا چەمپيون بولسا دا سول تيكي-تاكپەن ەستە قالار. سونىمەن قاتار كابو-ۆەردە سەكىلدى 600 مىڭعا تاياۋ حالقى بار ۇلتاراقتاي ەلدى جەڭە الماعانىن ەستەن شىعارمايىق. فۋتبول بۇل ۇجىمدىق ويىن. حوللاند، كەين، مباپپە سەكىلدى ۇشارعا قاناتى جوق، جۇيرىكتەردىڭ نەگە باعى تايىپ ەلىنە قايتتى؟ ويتكەنى،  كوماندالىق، ۇجىمدىق ويىندارى جۇرمەدى. سول سەكىلدى يسپانيا بۇل الەم چەمپيوناتىندا ۇجىمدىق ويىننىڭ ناعىز ۇلگىسىن كورسەتكەن سەكىلدى. يا، «جالعىز اعاش ورمان ەمەس»، ءتامسىلى دە بار.

جالعىز ءوزى بۇكىل چەمپيونات بويى كومانداسىن سۇيرەپ كەلگەن مەسسيگە بارلىعى جانىن سالىپ ويناپ كومەكتەسۋلەرى كەرەك ەدى. وكىنىشكە قاراي، ولاي بولمادى. دەسەك تە قۇرامىنداعى ۇجىمدىق ويىنعا بەيىم، قىسقا پاستارمەن دوپقا يەلىك ەتىپ الۋدىڭ حاس شەبەرلەرى يسپانيانىڭ بۇگىنگى كۇنى ءداۋىرى ءجۇرىپ تۇر.  الايدا مەسسي مەن مارادونانىڭ فۋتبول سۇيەر جاhان حالقىنىڭ ەسىندە، جۇرەگىندە ماڭگى ۇمىتىلماستاي قالىپ قالارىنا بەك سەنىمدەمىز. فيفا كەلەسى 2030 جىلى وتەتىن الەم دوداسىندا 64 كوماندا قاتىسادى دەگەن حابار تارتقان ەكەن. كىم ءبىلسىن سونشالىقتى كوپ كوماندا قاتىساتىن بولسا قازاقستان ۇلتتىق قۇراما كومانداسىن دا سول بايراقتى جارىستان كورىپ قالساق ارمانىمىز جوق ەدى.

اقىن ورداباي ۇلى،

الماتى