ازيادا: اۋىر اتلەتيكادان ۇلتتىق قۇراما جاساقتالدى

قازاقستان اۋىر اتلەتيكا فەدەراتسياسى جاپونيانىڭ ايچي پروۆينتسياسى مەن ناگويا قالاسىندا جالاۋى جەلبىرەيتىن XX جازعى ازيا ويىندارىنا قاتىساتىن سپورتشىلاردىڭ ءتىزىمىن جاريالادى.

دۇرمەكتى دوداسىندا ەل نامىسىن ەرلەر اراسىندا وتەپبەرگەن اليەۆ (60 كگ)، سايرامكەز اقمولدا (65 كگ)، بەكسۇلتان ايتباي (75 كگ)، الەكسەي چۋركين (85 كگ)، نۇرعيسا ادىلەت ۇلى (95 كگ) قورعايدى. ال ايەلدەردەن ەكاتەرينا الياكينا (57 كگ)، اراي نۇرلىبەكوۆا (69 كگ)، ايانات جۇماعالي (77 كگ)، ايعانىم جانبولات (86 كگ) پەن 86 كەلىدەن اسا سالماقتاعى ليۋبوۆ كوۆالچۋك سىنعا تۇسەدى.

ازيا ويىندارى 19 قىركۇيەك پەن 4 قازان ارالىعىندا بولادى.

وسىعان دەيىن بوكستان قازاقستان قۇراماسىنىڭ باس جاتتىقتىرۋشىلارى نۇرجان ناسانوۆ پەن ەلدوس سايدالين ەرلەر مەن ايەلدەر كومانداسىن جاساقتاپ، ازياداعا باراتىن سپولرتشىلاردىڭ ءتىزىمىن جاريا ەتكەن ەدى.

داستان كەنجالين،

استانا