قازاقستان قورجىنىنا تاعى ەكى التىن جۇلدە ءتۇستى

جاپونيانىڭ ايچي پرەفەكتۋراسى مەن ناگويا قالاسىندا جالاۋى كوتەرىلگەن V ازيا پارا ويىندارىنىڭ ءۇشىنشى جارىس كۇنىندە قازاقستان ۇلتتىق قۇراماسىنىڭ سپورتشىلارى پارا ساداق اتۋدان، پارا وق اتۋدان، پارا ۇستەل تەننيسىنەن، پارا دزيۋدودان، پارا ۆەلوسپورتتان (ترەك)، پارا جۇزۋدەن، پارا پاۋەرليفتينگتەن، ارباداعى تەننيستەن، پارا تاەكۆوندودان، بوچچادان، ۆولەيبولدى وتىرىپ ويناۋدان جانە پارا جەڭىل اتلەتيكادان سىنعا ءتۇستى.

پارا وق اتۋدان ەركىن عابباسوۆ 10 مەتر قاشىقتىققا پنەۆماتيكالىق ۆينتوۆكامەن نىسانا كوزدەۋ (R1) سايىسىندا 249،1 ۇپاي جيناپ، التىن مەدال العاننان كەيىن پارا پاۋەرليفتينگتەن قازاقستان قۇراماسىنىڭ سپورتشىلارى ءبىر التىن، ەكى كۇمىس جانە ەكى قولا مەدال يەلەندى.

ەرلەر اراسىندا 54 كەلىگە دەيىنگى سالماق دارەجەسىندە داۆيد دەگتيارەۆ 192 كەلىنى باسىنان اسىرىپ، ازيا پارا ويىندارىنىڭ چەمپيونى اتاعىن جەڭىپ الدى. سونىمەن بىرگە ول ازيا پارا ويىندارىنىڭ رەكوردىن جاڭارتتى. ال ايەلدەر اراسىندا 41 كەلىگە دەيىنگى سالماق دارەجەسىندە تۇرسىناي قابىل 104 كەلىنى  كوتەرىپ، جارىستىڭ كۇمىس جۇلدەگەرى اتاندى.

45 كەلىگە دەيىنگى سالماق دارەجەسىندە الينا سولودۋحينا 103 كەلى ناتيجەمەن كۇمىس مەدالدى جەڭىپ السا، ايجان بەرىمقۇلوۆا 101 كەلىنى كوتەرىپ، قولا جۇلدەگە يە بولدى. سونداي-اق ستانيسلاۆ شاكيەۆ 59 كەلىگە دەيىنگى سالماق دارەجەسىندە 181 كەلىنى كوتەرىپ، جارىستىڭ قولا مەداليسى اتاندى. وسىلايشا، پارا پاۋەرليفتينگتەن بەس سپورتشىمىز جەڭىس تۇعىرىنان كورىندى. ەربولات كارىباي ەربولات پەن فارحات مۋتۋنوۆ جۇلدەگەرلەر قاتارىنا ىلىگە المادى.

پارا دزيۋدودان جارىستىڭ العاشقى كۇنىندە تاتاميگە جەتى سپورتشى شىقتى. ونىڭ تورتەۋى جۇلدەگە تالاستى. سونىڭ ىشىندە J2 ساناتىندا 70 كەلىگە دەيىنگى سالماقتا سىنعا تۇسكەن يبراگيم نۇرماحان ۇلى فينالدا وزبەكستاندىق سپورتشىنى جەڭىپ، التىن مەدال يەلەندى. ال ءالفيا تىلەكقابىل جارىستىڭ قولا جۇلدەگەرى اتاندى. J1 ساناتىندا 52 كەلىگە دەيىنگى سالماقتا سىنعا تۇسكەن وتانداسىمىز  قىرعىزستان وكىلىنەن باسىم ءتۇستى.

ايعانىم جاناتبەك (J1، 60 كگ) قولا جۇلدە ءۇشىن بەلدەسىپ، يندونەزيالىق سپورتشىدان جەڭىلسە، ەلنارا ابدينازاروۆا (J1،60 كگ) وزبەكستاندىق سپورتشىعا ەسە جىبەردى.

ودان باسقا دينارا قۇجىلوۆا (J1 -70 كگ )، باۋىرجان ارىستانبەكوۆ (J1 -81 كگ )، دايانا فەدوسوۆا (J2 -60 كگ ) مەن  عالىمجان سماعۇل ۇلى (J2-81 كگ) دا جۇلدە الۋعا ءالى دە مۇمكىندىك بار. بۇل سپورتشىلار قولا مەدال ءۇشىن سىنعا تۇسەدى. ال پارا ۆەلوشاباندوزدار دا جاراپ تۇر. ولار جارىستا ەكى جۇلدەگە يە بولدى.

ايەلدەر اراسىندا 4000 مەترگە جەكەلەي قۋ جارىسىندا كالاۋس اناستاسيا (ستوكەر) مەن پولينا براتچيكوۆا (پيلوت) كۇمىس جۇلدەگەر اتاندى. ال ەرلەر اراسىندا ءدال وسى قاشىقتىقتا كيريلل يليۋكەۆيچ (ستوكەر) پەن گلەب برۋسسەنسكي (پيلوت) قولا مەدال يەلەندى.

ازىرگە ەل قورجىنىندا جەڭىل اتلەتيكادان ءبىر مەدال بار. يادرونى سەرپۋدەن F35 كلاسسىندا ونەر كورسەتكەن ەلامان جولامان 12.09 م ناتيجەسىمەن كۇمىس جۇلدە الدى. ونىڭ قارسىلاسى وزبەكستاندىق حۋسنيددين نۋربەكوۆ 15.43م كورسەتكىشىمەن ءبىرىنشى ورىنعا يە بولدى. ال داستان ورداباي  ت20 كلاسسىندا 400 م  جۇگىرۋدە 58.10 ناتيجە كورسەتىپ، فينالعا شىقتى.

(پارا ازيادانىڭ كۇمىس جۇلدەگەرى — يادرو لاقتىرۋشى ەلامان جولامان)

پارا  جەڭىل اتلەتيكادان 14 پارا سپورتشى ەل نامىسىن قورعاۋدا. جارىستا ازيا ەلدەرىنەن 600-گە جۋىق پارا اتلەت قاتىسۋدا.

جۇزۋدەن دياس كەنجەبەك S10 ساناتىندا 100 مەترگە ەركىن ستيلدە جۇزۋدەن كۇمىس مەدال جەڭىپ الدى. سونداي-اق ۇلتتىق قۇراما 20 ۇپايلىق ساناتتا 4ح50 مەترگە كەشەندى جۇزۋدەن ارالاس كوماندالىق سايىستا ەكىنشى ورىن الدى.

رومان پوتاپوۆ S11 ساناتى بويىنشا 100 مەترگە شالقالاي جۇزۋدەن ءۇشىنشى ورىنعا جايعاستى. ۆيكتور ۆولكوۆ تە S13 ساناتى بويىنشا 100 مەترگە ەركىن ستيلدە جۇزۋدەن ۇزدىك ۇشتىكتى تۇيىندەدى.

اناستاسيا كالاۋس ايەلدەر اراسىندا 4000 مەترگە جەكەلەي ءىز كەسۋ جارىسىندا كۇمىس جۇلدەگە يە بولدى. ءدال وسى قاشىقتىقتا ەرلەر اراسىندا كيريلل يليۋكەۆيچ قولا مەدالعا يە بولدى.

پارا تاەكۆوندودان قازاقستان قۇراماسىنىڭ اتىنان ميلانا كراساۆتسەۆا ك44 كلاسسىندا 52 كەلىگە دەيىنگى سالماق دارەجەسىندە سىنعا ءتۇستى. ول العاشقى جەكپە-جەكتە وزبەكستان وكىلى ۋميدا مامارادجابوۆاعا ەسە جىبەردى. جۇبانىش جۇلدەسى ءۇشىن وتكەن جەكپە-جەكتە ميلانا كراساۆتسەۆا يراننىڭ وكىلى روزا يبراحيميگە 0:2 ەسەبىمەن جەڭىلدى. وسىلايشا، سپورتشىمىز V ازيا پارا ويىندارىنداعى جارىس جولىن اياقتادى. ال ك44 ساناتىندا 63 كەلىگە دەيىنگى سالماقتا سىنعا ءتۇسىپ جاتقان ايبەك جۇمانعالي جارىستى ءساتتى باستادى.
وتانداسىمىز اۋعان سپورتشىسى مۇحاممەد تامام شاريفيدەن 2:0 ەسەبىمەن باسىم ءتۇستى. كەلەسى جەكپە-جەكتە ايبەك جۇمانعالي موڭعوليالىق گانبات بولە-ەردەنمەن جارتىلاي فينال جولداماسىن ساراپقا سالادى.

بوچچادان جەكەلەي سىندا قۋانىش اسقاربەكوۆ قىتاي سپورتشىسى لو گۋانچجۋندى 4:3 ەسەبىمەن جەڭدى. ايەلدەر اراسىندا يتانا شىڭعىسحانوۆا گونكونگ وكىلى يۋ حيۋ لامعا 0:6 ەسەبىمەن ەسە جىبەردى. ەرلەر اراسىندا ەرحات المات گونكونگ سپورتشىسى چاۋ چانمەن كەزدەسىپ، 3:3 ەسەبىمەن تەڭ ءتۇستى. سونداي-اق ازامات ايازباەۆ تايلاند وكىلى پونچوك لاپەننەن 0:12 ەسەبىمەن جەڭىلسە، ەلميرا مۋسراليەۆا گونكونگ سپورتشىسى يۋەن چيونعا 0:11 ەسەبىمەن جول بەردى.

پارا ساداق اتۋدان W1 كلاسى بويىنشا جەكەلەي سايىستىڭ شيرەك فينالىندا نۇرشات تولەۋقاسىم وڭتۇستىك كورەيا وكىلى حام تەيدجيندى 7:3 ەسەبىمەن جەڭدى. ەندى ول الداعى كۇندەرى قولا جۇلدە ءۇشىن تالاسادى.

(ساداق اتۋشى نۇرشات تولەۋقاسىم)

W1 كلاسسىندا جەكەلەي سىندا تەمىرلان سەيتقامال دا شيرەك فينالعا شىقتى.

V ازيا پارا ويىندارىندا پارا ساداق اتۋدان ۇلتتىق قۇراما ساپىندا 9 سپورتشى ونەر كورسەتۋدە. ولار جەكەلەي، جۇپتىق جانە ارالاس جۇپتىق سايىستاردا باق سىنايدى. بۇل سپورت تۇرىنەن جارىسقا 19 ەلدەن 100-گە جۋىق سپورتشى قاتىسۋدا.

قازاقستان پارا ۇستەل تەننيسىنەن ازيا پارا ويىندارىنىڭ العاشقى مەدالدارىن الا باستادى.

ارداق نۇرماعامبەتوۆ ءۇندىستان سپورتشىسى سانديپ دانگيدى 3:0 ەسەبىمەن جەڭسە، ءالي ماحۋلبەكوۆ جارتىلاي فينالدا قىتاي گونكونگىنىڭ وكىلى چجاو شۋايعا 0:3 ەسەبىمەن ەسە جىبەرىپ، ءۇشىنشى ورىن الىپ قالدى. ءسويتىپ، ەكەۋى دە قولا جۇلدەنى قاناعات تۇتتى. بۇل – ەلىمىزدىڭ سپورتتىڭ وسى تۇرىنەن ازيا پارا ويىندارى تاريحىندا جەڭىپ العان العاشقى مەدالدارى.

V ازيا پارا ويىندارىندا پارا ساداق اتۋدان ۇلتتىق قۇراما ساپىندا 9 سپورتشى ونەر كورسەتۋدە. ولار جەكەلەي، جۇپتىق جانە ارالاس جۇپتىق سايىستاردا سىنعا ءتۇسىپ جاتىر. وكىنىشكە قاراي، جاسۇلان كىشەن، مارجان ءسابيت، ارلان اتەيبەكوۆ، جانات ءايتىموۆا، ايزادا سەيدان مەن تەمىرلان سەيىتقامال قارسىلاستارىنان جەڭىلىپ قالدى. ال تولەۋقاسىم نۇرشات ءۇشىنشى ورىن ءۇشىن باق سىنايدى.

بۇل سپورت تۇرىنەن جارىسقا 19 ەلدەن 100-گە جۋىق سپورتشى قاتىسۋدا.

ۆولەيبولدى وتىرىپ ويناۋدان قازاقستان قۇراماسى العاشقى ويىندا تايلاند كومانداسىن 3:0 ەسەبىمەن جەڭگەننەن كەيىن ەندى بۇگىن يران كومانداسىمەن وينايدى.

ارباداعى تەننيستەن قازاقستان قۇراماسىنىڭ سپورتشىلارى جارىستى ءساتتى باستادى.

ەرلەر اراسىنداعى جەكەلەي سىندا ەرداۋلەت قادىمبەرگەنوۆ قىتايلىق تايبەي وكىلى ۆان ۆەيسيۋاندى 7:5، 2:6، 6:3 ەسەبىمەن جەڭىپ، ەكىنشى اينالىمعا جولداما الدى. ەۆگەني بىكوۆ تا العاشقى كەزدەسۋىندە وڭتۇستىك كورەيا سپورتشىسى لي يونبەدەن 6:4، 6:2 ەسەبىمەن باسىم ءتۇستى. ەندى ول شيرەك فينالدا تايبەي وكىلى حۋان چۋ-ينمەن سىنعا تۇسەدى.

جالپى، جاپونيانىڭ ايچي پرەفەكتۋراسى مەن ناگويا قالاسىندا تىرەك-قيمىل اپپاراتى، كورۋ قابىلەتى زاقىمدانعان جانە زياتكەرلىك دامۋ ەرەكشەلىكتەرى بار سپورتشىلار اراسىندا ءوتىپ جاتقان V ازيا پارا ويىندارىنا 45 ەلدەن 4 مىڭعا جۋىق سپورتشى قاتىسىپ، سپورتتىڭ 18 تۇرىنەن 502 مەدالدى ساراپقا سالىپ جاتىر.

ەلىمىزدىڭ ۇلتتىق قۇراماسى ساپىنداعى 150 ويىنشى سپورتتىڭ 12 ءتۇرى بويىنشا كۇش سىناسۋدا.

 

داستان كەنجالين،

استانا