قازاقستان قورجىنى تاعى ءبىر التىن جۇلدەمەن تولىقتى

جاپونيانىڭ ناگويا قالاسىندا ءوتىپ جاتقان V ازيا پارا ويىندارىندا جۇرقامىرزا شۇكىربەكوۆ پارا دزيۋدودان J2 ساناتىندا 95 كەلىدەن اسا cالماقتا يراندىق كحەيروللاحزادەن ۆارزي موحامماد رەزانى جەڭىپ، چەمپيونى اتاندى.

ودان باسقا ەل قورجىنىنا التىن جۇلدەلەردى پارا نىسانا كوزدەۋدەن ەركىن عابباسوۆ، پارا پاۋەرليفتينگتەن داۆيد دەگتيارەۆ، پارا دزيۋدودان يبراگيم نۇرماحان ۇلى، بەكسۇلتان قۇلمىرزا، اقتولقىن سەيىلبەكوۆا، زارينا رايفوۆا، پارا جۇزۋدەن دياس كەنجەبەك، پارا ۆەلوسپورتتان نايل ەرمۇحانبەت پەن اناستاسيا كالاۋس سالدى.

بۇعان دەيىن قازاقستان قۇراماسىنىڭ ەڭ جوعارى ناتيجەسى 2023 جىلى قىتايدىڭ حانچجوۋ قالاسىندا وتكەن IV ازيا پارا ويىندارىندا تىركەلگەن ەدى. ول كەزدە وتاندىق سپورتشىلار 8 التىن، 12 كۇمىس جانە 21 قولا مەدال يەلەنىپ، جالپى سانى 41 جۇلدە العان. وسىلايشا، بيىل ۇلتتىق قۇراما التىن مەدال سانى بويىنشا بۇرىنعى رەكوردتى جاڭارتىپ، ەل سپورتىنىڭ تاريحىندا جاڭا بەلەسكە كوتەرىلدى.

جارىستار ءالى اياقتالماعانىن جانە الدا بىرنەشە جارىس كۇنى بار ەكەنىن ەسكەرسەك، سپورتشىلاردىڭ جۇلدە قورجىنىن ودان ءارى تولىقتىرۋعا مۇمكىندىگى مول.

بۇل جەتىستىك ەلىمىزدە پارا سپورتتىڭ قارقىندى دامىپ كەلە جاتقانىن جانە سپورتشىلارىمىزدىڭ حالىقارالىق ارەناداعى باسەكەگە قابىلەتتىلىگىنىڭ ارتقانىن كورسەتەدى.

تاريحي ناتيجە سپورتشىلار مەن جاتتىقتىرۋشىلاردىڭ قاجىرلى ەڭبەگىنىڭ، سونداي-اق پارا سپورتتى دامىتۋعا باعىتتالعان جۇيەلى مەملەكەتتىك قولداۋدىڭ جەمىسى.

بيىلعى ازيا پارا ويىندارىندا قازاقستان نامىسىن 150 سپورتشى قورعاپ جاتىر. جارىس 24 قازانعا دەيىن جالعاسادى.

داستان كەنجالين،

استانا