پارا جەڭىل اتلەت ايسۇلۋ سۇلەيمەنوۆا ازيا رەكوردىن جاڭارتتى

جاپونيانىڭ ناگويا قالاسىندا ءوتىپ جاتقان V ازيا پارا ويىندارىندا ايسۇلۋ سۇلەيمەنوۆا 100 مەترگە جۇگىرۋدەن ازيانىڭ جاڭا رەكوردىن جاڭارتتى.

ايسۇلۋ سۇلەيمەنوۆا جارىستارعا ەكى اياقتىڭ زاقىمدانۋىنا بايلانىستى ارنايى جۇگىرۋ پروتەزدەرىن پايدالاناتىن سپورتشىلارعا ارنالعان T62 ساناتىندا قاتىسىپ ءجۇر. الايدا ءوز ساناتىندا باسقا ادامدار بولماعاندىقتان، ول ءبىر اياقتىڭ زاقىمدانۋىنا بايلانىستى پروتەز پايدالاناتىن سپورتشىلار باق سىنايتىن T64 ساناتىنىڭ وكىلدەرىمەن بىرگە جارىستى.

فينالدا ول 100 مەتردى 16،18 سەكۋندتا جۇگىرىپ، جالپى ەسەپتە بەسىنشى ورىنعا يە بولدى. سونىمەن قاتار، بۇل ناتيجە ونىڭ T62 ساناتىندا ازيانىڭ جاڭا رەكوردى رەتىندە تىركەلدى.

وسىلايشا، ايسۇلۋ سۇلەيمەنوۆا بىرىككەن جارىستا بەسىنشى ورىن العانىمەن، ءوز ساناتىندا قۇرلىقتىق رەكورد جاساپ، ماڭىزدى جەتىستىككە جەتتى.

ايسۇلۋ سۇلەيمەنوۆا استانادا تۇرادى. وسى جەردە جاتتىعىپ، جارىستارعا قاتىسادى.

داستان كەنجالين،

استانا