Para jeńil atlet Aısulý Súleımenova Azııa rekordyn jańartty

Japonııanyń Nagoıa qalasynda ótip jatqan V Azııa Para oıyndarynda Aısulý Súleımenova 100 metrge júgirýden Azııanyń jańa rekordyn jańartty.

Aısulý Súleımenova jarystarǵa eki aıaqtyń zaqymdanýyna baılanysty arnaıy júgirý protezderin paıdalanatyn sportshylarǵa arnalǵan T62 sanatynda qatysyp júr. Alaıda óz sanatynda basqa adamdar bolmaǵandyqtan, ol bir aıaqtyń zaqymdanýyna baılanysty protez paıdalanatyn sportshylar baq synaıtyn T64 sanatynyń ókilderimen birge jarysty.

Fınalda ol 100 metrdi 16,18 sekýndta júgirip, jalpy esepte besinshi orynǵa ıe boldy. Sonymen qatar, bul nátıje onyń T62 sanatynda Azııanyń jańa rekordy retinde tirkeldi.

Osylaısha, Aısulý Súleımenova birikken jarysta besinshi oryn alǵanymen, óz sanatynda qurlyqtyq rekord jasap, mańyzdy jetistikke jetti.

Aısulý Súleımenova Astanada turady. Osy jerde jattyǵyp, jarystarǵa qatysady.

Dastan KENJALIN,

ASTANA