ازيادا جۇلدەگەرى — مەنىڭ اۋىلىمنىڭ تۇلەگى!!!

…نۇرشاتىنان، نۇرلى ۇلدان اينالدىم!!!

…نۇرشات تولەۋقاسىمنىڭ پارا ازياداداعى قوس مەدالى (كۇمىس جانە قولا)  ەڭ اۋەلى قازاقستانعا تيەسىلى، ونان سوڭ جەتىسۋ وبلىسىنا تيەسىلى، ونان سوڭ وبلىستىڭ قاراتال اۋدانىنا تيەسىلى، ال سونان سوڭ، مەنىڭ تۋعان اۋىلىم — «كوپبىرلىككە» تيەسىلى!                                                     

… نۇرشاتتىڭ اتاسى تولەۋقاسىم اعانىڭ قۇشاعىندا وستىك ءبىز.  ول اعا مەنىڭ تۋعان اعام جاپاربەكپەن ءبىر كلاستا وقىدى. كەيىن بالىقشى بولدى. ودان سوڭ اۋ-سايمان قوياتىن قويمانىڭ مەڭگەرۋشىسى بولىپ ەڭبەك ەتتى. بويى 190-200 سم. يىقتى، بىلەكتى، باتىر تۇلعالى اعا ەدى.  بىراق ءجۇزى جىلى، كۇلكىسى ادەمى، سۇيكىمدى كىسى بولاتىن.

تولەۋقاسىم اعانىڭ تۋعان باۋىرى ەرقاسىم ەكەۋمىز ءبىر كلاستا وقىدىق.  ول دا جاۋىرىنى قاقپاقتاي، ناعىز «كەلسەڭ كەلدىڭ» ءوزى ەدى.  مەنىڭ ەڭ جاقىن دوسىم بولدى.  سودان دا مەنىڭ شىعارمالارىمداعى كوپ كەيىپكەرىمنىڭ اتى ەرقاسىم…

…نۇرشات بالۋان ەدى. ەلدەگى قۇمدا بولعان ءبىر كۇرەستە ومىرتقاسىن سىندىرىپ، مۇگەدەك بوپ قالدى…وزى اتاسىنا تارتقان، بويى 180 سم جوعارى، يىقتى جىگىت بوپ ءوستى.  ادام تالانتتى بولسا بار نارسەگە تالانتتى بولادى عوي.  باياعىدا، باياعىدا دەيمىن-اۋ، نۇرشاتتىڭ ءالى مەكتەپكە بارماعان كەزىندە مەن اۋىلعا ءوزىم اينالىساتىن توعىزقۇمالاقتى تاقتاسىن اپارىپ ۇيرەتتىم. سول جولى اتالاس ءىنىم، ءىزباسارىم، جولىمدى قۋشى، بۇگىندە جەتىسۋ وبلىسىنىڭ اقپارات ورتالىعىن باسقاراتىن ريشاد تۇرعانباي وسى نۇرشاتتى ەرتىپ كەلىپ، توعىزقۇمالاق ويناتتى. ول كەزدە نۇرشاتتىڭ ەكى اقبوز اتىن ەكى قولىمەن كەزەك سۇرتەتىن كەزى، بىراق توعىزقۇمالاقتى تەز قاعىپ الدى.

بىردە ريشاد ونى وبلىستىق جارىسقا الا كەتىپ، ادام جەتپەگەن سوڭ، كومانداعا ويناتا سالعان عوي. بەس جاسار نۇرشات ۇلكەندەردىڭ ءبارىن دەرلىك ۇتىپ تاستاعان. بىراق باس تورەشى جاسى جەتپەگەن بالا دەپ، ونىڭ جەڭىستەرىن ەسەپتەمەي قويعان. كەيىنگى تاريح جوعارىدا ايتقانداي…

…وسىدان 4-5 جىل بۇرىن سوڭىنا ءتۇسىپ ءجۇرىپ، اۋىلدا سپورت كەشەنىن سالدىردىم. سونداعى ارمانىم مەن قيالىم — «وليمپيادا چەمپيونى مەنىڭ اۋىلىمنان نەگە شىقپايدى؟!»، دەگەن قايسارلىق ەدى.  مىنە، تاعدىر تاۋقىمەتىن تارتسا دا بۇگىلمەگەن بالىقشى اۋىلدىڭ العاشقى تۇلەگى ازيادادا ەكى جۇلدە الدى! ول جۇلدەلەر ءالى-اق كوپ بولادى. ويتكەنى قارت بالقاش ءوز جاعاسىنداعى ەرجۇرەك جاندارعا بالىعىن عانا بەرىپ جاتقان جوق — ەرلىگىن، ورلىگىن، تاككاپارلىعىن دا سىيلاپ جاتىر، ءسىڭىرىپ جاتىر. ازيادا جۇلدەگەرى شىققان مەنىڭ تۋعان اۋىلىم «كوپبىرلىكتەن» ءالى-اق وليمپيادا چەمپيونى دا شىعادى! وسى ءسوزىمدى ۇمىتپاڭىزدار:  ونى مەن كورمەسپىن، سىزدەر كورەسىزدەر، بىراق مەنىڭ رۋحىم سەزىپ جاتاتىن بولادى…

…ال، بۇگىن وتانىنا ازيادانىڭ قوس جۇلدەسىن سىيلاعان نۇرشاتتاي نۇرلى ۇلىما باسىمدى ءيىپ العىس ايتامىن دا، ۇلى جۇرتقا «بۇل ۇل مەنىڭ تۋعان اۋىلىم «كوپبىرلىكتىڭ» تۇلەگى» دەپ  جار سالامىن.

نەسىپ جۇنىسباي ۇلى،

قازاقستاننىڭ ەڭبەك سىڭىرگەن قايراتكەرى،

سپورت ءجۋرناليسى، جازۋشى، سپورت قايراتكەرى