SportPress.kz Qazaqstan sport jańalyqtary
…Nurshatynan, nurly uldan aınaldym!!!
…Nurshat Tóleýqasymnyń Para Azıadadaǵy qos medali (kúmis jáne qola) eń áýeli Qazaqstanǵa tıesili, onan soń Jetisý oblysyna tıesili, onan soń oblystyń Qaratal aýdanyna tıesili, al sonan soń, meniń týǵan aýylym — «Kópbirlikke» tıesili!
… Nurshattyń atasy Tóleýqasym aǵanyń qushaǵynda óstik biz. Ol aǵa meniń týǵan aǵam Japarbekpen bir klasta oqydy. Keıin balyqshy boldy. Odan soń aý-saıman qoıatyn qoımanyń meńgerýshisi bolyp eńbek etti. Boıy 190-200 sm. Iyqty, bilekti, batyr tulǵaly aǵa edi. Biraq júzi jyly, kúlkisi ádemi, súıkimdi kisi bolatyn.
Tóleýqasym aǵanyń týǵan baýyry Erqasym ekeýmiz bir klasta oqydyq. Ol da jaýyryny qaqpaqtaı, naǵyz «kelseń keldiń» ózi edi. Meniń eń jaqyn dosym boldy. Sodan da meniń shyǵarmalarymdaǵy kóp keıipkerimniń aty Erqasym…
…Nurshat balýan edi. Eldegi qumda bolǵan bir kúreste omyrtqasyn syndyryp, múgedek bop qaldy…О́zi atasyna tartqan, boıy 180 sm joǵary, ıyqty jigit bop ósti. Adam talantty bolsa bar nársege talantty bolady ǵoı. Baıaǵyda, baıaǵyda deımin-aý, Nurshattyń áli mektepke barmaǵan kezinde men aýylǵa ózim aınalysatyn toǵyzqumalaqty taqtasyn aparyp úırettim. Sol joly atalas inim, izbasarym, jolymdy qýýshy, búginde Jetisý oblysynyń aqparat ortalyǵyn basqaratyn Rıshad Turǵanbaı osy Nurshatty ertip kelip, toǵyzqumalaq oınatty. Ol kezde Nurshattyń eki aqboz atyn eki qolymen kezek súrtetin kezi, biraq toǵyzqumalaqty tez qaǵyp aldy.
Birde Rıshad ony oblystyq jarysqa ala ketip, adam jetpegen soń, komandaǵa oınata salǵan ǵoı. Bes jasar Nurshat úlkenderdiń bárin derlik utyp tastaǵan. Biraq bas tóreshi jasy jetpegen bala dep, onyń jeńisterin eseptemeı qoıǵan. Keıingi tarıh joǵaryda aıtqandaı…
…Osydan 4-5 jyl buryn sońyna túsip júrip, aýylda sport keshenin saldyrdym. Sondaǵy armanym men qııalym — «Olımpıada chempıony meniń aýylymnan nege shyqpaıdy?!», degen qaısarlyq edi. Mine, taǵdyr taýqymetin tartsa da búgilmegen balyqshy aýyldyń alǵashqy túlegi Azıadada eki júlde aldy! Ol júldeler áli-aq kóp bolady. О́ıtkeni qart Balqash óz jaǵasyndaǵy erjúrek jandarǵa balyǵyn ǵana berip jatqan joq — erligin, órligin, tákkaparlyǵyn da syılap jatyr, sińirip jatyr. Azıada júldegeri shyqqan meniń týǵan aýylym «Kópbirlikten» áli-aq Olımpıada chempıony da shyǵady! Osy sózimdi umytpańyzdar: ony men kórmespin, sizder kóresizder, biraq meniń rýhym sezip jatatyn bolady…
…Al, búgin Otanyna Azıadanyń qos júldesin syılaǵan Nurshattaı nurly ulyma basymdy ıip alǵys aıtamyn da, uly jurtqa «BUL UL MENIŃ TÝǴAN AÝYLYM «KО́PBIRLIKTIŃ» TÚLEGI» dep jar salamyn.
Nesip JÚNISBAIULY,
Qazaqstannyń eńbek sińirgen qaıratkeri,
sport jýrnalısi, jazýshy, sport qaıratkeri
