مانەرلەپ سىرعاناۋشى ميحايل شايدوروۆ پەن ونىڭ جاتتىقتىرۋشىسى الەكسەي ۋرمانوۆتىڭ اراسىنداعى كەلىسىمشارت توقتاتىلدى. بۇل تۋرالى تۋريزم جانە سپورت ءمينيسترى ەربول مىرزابوسىنوۆ ايتتى، دەپ حابارلادى SportPress.kz.
ءمينيستردىڭ ايتۋىنشا، وليمپيادا چەمپيونىنىڭ جاڭا سپورتتىق تسيكلى باستالدى. ەندى ميحايل شايدوروۆ الداعى جارىستارعا دايىندالاتىن باپكەرلەر قۇرامى مەن كومانداسىن ءوزى تاڭداي الادى.
ەربول مىرزابوسىنوۆ الەكسەي ۋرمانوۆقا العىس ايتىپ، ماماننىڭ سوڭعى جىلدارى اتقارعان ەڭبەگىن باعالادى. مينيستر الداعى ۋاقىتتا رەسەيلىك باپكەر قازاقستاننىڭ جاس مانەرلەپ سىرعاناۋشىلارىن دايىنداۋعا ۇلەس قوساتىنىنا ۇمىتتەنەدى.
الەكسەي ۋرمانوۆتىڭ جەتەكشىلىگىمەن ميحايل شايدوروۆ 2026 جىلعى ميلان وليمپياداسىندا التىن مەدال جەڭىپ الىپ، قازاقستان تاريحىنداعى مانەرلەپ سىرعاناۋدان تۇڭعىش وليمپيادا چەمپيونى اتاندى. سونداي-اق ول 2025 جىلعى ءتورت قۇرلىق چەمپيوناتىندا توپ جارىپ، الەم چەمپيوناتىندا كۇمىس جۇلدەگە يە بولدى.
SportPress.kz قازاقستان سپورت جاڭالىقتارى