ۆاحيد ماسۋدوۆ: «استانا» ەۋروپادا ويناپ، ەلىمىزدە ۇستەمدىك قۇرىپ وتىر

«اقجايىق» كومانداسىنىڭ باس باپكەرى ۆاحيد ماسۋدوۆ «استاناعا» قارسى ويىن تۋرالى وي ءبولىستى.

– وتە اۋىر ويىن وتكىزگەنىمىز بەلگىلى. كوماندالاردىڭ دەڭگەيى جەر مەن كوكتەي. «استانا» ەكى كۇن بۇرىن ويىن وتكىزگەنىنە قاراماستان، ءبىرىنشى مينۋتتان باستاپ قىسپاققا الۋمەن بولدى. ەكى گولدان دا كوبىرەك سوعاتىن مۇمكىندىكتەرى بولدى. ال ءبىز قارسى شابۋىل ارقىلى ويناۋعا ارەكەت ەتتىك، بىراق ول ويىمىز جۇزەگە اسپادى. قولىمىزدان كەلگەنشە قارسىلىق كورسەتتىك، بىراق اقىر سوڭىندا «استانانىڭ» دەڭگەيى ۇلكەن ءرول اتقاردى.

— «استانا» لايىقتى تۇردە چەمپيون اتاندى دەپ ويلايسىز با؟

— «استانانى» چەمپيوندىعىمەن قۇتتىقتايمىن، ال ءبىز ءوز قيىندىقتارىمىزدى شەشۋگە ءتيىسپىز. «اقجايىق» ءۇشىن ماۋسىم ءالى اياقتالعان جوق، 9 قاراشادا وتپەلى ويىندى وتكىزۋىمىز قاجەت.

— فۋتبولدا ءۇشىنشى كوماندانى ىنتالاندىرۋعا تىيىم سالىنباعان عوي، سىزگە «قايراتتان» بىرەۋ حابارلاسقان بولار؟!

— ءبىز ءوز ماسەلەلەرىمىزدى شەشۋىمىز كەرەك. بىراق ماعان ەشكىم حابارلاسپاعانىن ايتا كەتەيىن، ال فۋتبولشىلارعا بىرەۋ قوڭىراۋ شالعانىن بىلمەيدى ەكەنمىن. ول جاعىن وزدەرىنەن سۇراعان ءجون. جىگىتتەر قانشالىقتى قيىن جاعدايعا تاپ بولعانىن كوردىك، ءبىز «استاناعا» قارسىلىق كورسەتۋگە تىرىستىق. بىراق ءبارى دە ءبىز ويلاعانداي بولعان جوق.

— «استانا» قاتارىنان ءتورتىنشى رەت ەل چەمپيونى بولىپ وتىر، ەۋروكۋبوكتاردىڭ كوكتەمگى كەزەڭىنە شىعۋ مۇمكىندىگى دە بار. وسىعان قاراپ «استانا» ءدال قازىر ەلىمىزدىڭ ەڭ مىقتى كومانداسى دەۋگە بولا ما؟

— «استانا» ەۋروپادا جاقسى تاجىريبە جينادى. سول ءۇشىن قازاقستاندا ۇستەمدىك قۇرىپ وتىر. ءبىزدىڭ فۋتبولشىلارىمىزعا جەتپەي تۇرعان دۇنيە — مىنە، وسى.

ايتا كەتەيىك، «استانا» بۇگىن پرەمەر-ليگانىڭ سوڭعى تۋرىندا ورالدىڭ «اقجايىعىن» ءوز الاڭىندا 2:0 ەسەبىمەن ۇتىپ، ءتورتىنشى جىل قاتارىنان ەل چەمپيونى اتاعىنا قول جەتكىزدى.

تۇرار ەرمۇرات