Mıra MUHAMADIEVA: «Aqtaý Ýnıversıadasynyń jeńimpazdary Qytaıda ótetin Dúnıejúzilik Ýnıversıadaǵa joldama alady»

Aqtaýda HII jazǵy Ýnıversıada oıyndary bastaldy. Osyǵan oraı  Oqý-aǵartý mınıstrligi Sporttyq is-sharalar, statıstıka jáne taldaý basqarmasynyń basshysy Mıra Muhamadıevaǵa habarlasyp suhbat aldyq.

– Mıra Bekqazyqyzy, Mańǵystaý oblysyna qosh keldińiz!

Búgin bastalǵan Aqtaý ýnıversıadasynda jeńiske jetken sportshylar Qytaıdyń Chendý qalasynda ótetin Búkilálemdik jazǵy ýnıversıada oıyndaryna qatysa ala ma?

– Iá, Esenov ýnıversıteti uıymdastyryp jatqan osy HII jazǵy Ýnıversıada oıyndarynda birinshi oryn alǵan sportshylar 28 shilde men 8 tamyz aralyǵynda Qytaıdyń Chendý qalasyna ótetin Dúnıejúzilik Ýnıversıadaǵa joldama alady. Chendý qalasyna baratyndar jeńil atletıka, taekvondo, ústel tennısi, júzý jáne dzıýdo sııaqty sport túrleri boıynsha irikteledi. Bıylǵy Ýnıversıadanyń bir ereksheligi Olımpıada sııaqty barlyq oıyndar bir-aq qalada ótedi. Bir qalada 20 sporttyq oıyn túrinen bir aı boıy ótedi jáne osy saıystarda sportshylar túrki Ýnıversıadasy men Búkilálemdik Ýnıversıadaǵa irikteledi.

– Jazǵy Ýnıversıadada jeńiske jetken jeńimpazdar men júldegerlerdi qalaı marapattaısyzdar? Qarjylaı ma álde «Sport sheberi» ataǵy berile me?

– Jeńimpazdarǵa medal, dıplom beriledi jáne komandalyq esepte oryn alǵandar kýbokpen, dıplommen marapattalady. Sondaı-aq birinshi orynǵa ıe bolǵan stýdentter Búkilálemdik jazǵy Ýnıversıadaǵa joldama alady.

– Kelesi ýnıversıada qaıda ótýi múmkin?

– Almaty qalasynda ótedi dep josparlanýda. Ol jaqta Ál-Farabı atyndaǵy QazUÝ ótkizemiz dep usynys bildirip otyr. Ol boıynsha máseleler sheshilip jatyr. Bir-eki kúnde naqtylanady. Osy oıyndardyń sońynda Esenov Ál-Farabıge Ýnıversıada jalaýyn tapsyratyn bolady.

– Ýnıversıadaǵa negizinen ýnıversıtet stýdentteri qatysady. Ýnıversıtetter Ǵylym jáne joǵary bilim mınıstrligine qaraıdy. Al sizdiń basqarmańyz – Oqý-aǵartý mınıstrligine qarasty qurylym. Sáıkessizdikter jumystaryńyzǵa kedergi emes pe?

– Negizi ortalyǵymyz 2000 jyly ashylǵan bolatyn. 2001 jyldan bastap bizdiń ortalyq jazǵy jáne qysqy Ýnıversıadany ótkizip keledi. Ol kezde bir mınıstrlik boldy. Keıin ekige bólingen soń biz osy Ýnıversıadany Ǵylym jáne joǵary bilim mınıstrligimen kelisimshartqa otyryp ótkizip júrmiz. Negizi bizdiń ortalyq ǵylym baǵytynda jáne muǵalimder arasynda biliktilikti arttyrý kýrstaryn, sondaı-aq sport sharalaryn ótkizedi. Biz tek stýdentter arasynda emes, oqýshylar arasynda da, kolledj stýdentteri arasynda da jarystar uıymdastyramyz. Oqýshylar arasynda gımnazıada ótkizip, olardy iriktep, halyqaralyq jarystarǵa aparamyz.

Mysaly, byltyr oqýshylardy Franııaǵa apardyq. Búkilálemdik gımnazıadada jeńimpaz bolǵan oqýshylarymyz grantqa ıe boldy. Qazaqstan boıynsha ózderi tańdaǵan joǵary oqý oryndaryna UBT tapsyrmaı-aq grantqa tústi. О́tken jyldary bitirgen oqýshylar qazir grantta oqyp jatyr. Bıyl 11-synypty bitiretin oqýshylarymyz da grant ıelenedi. О́ıtkeni granttar úsh jylǵa berilgen bolatyn. Sebebi gımnazıadaǵa qatysqandar toǵyzynshy, onynshy, on birinshi synyp oqýshylary boldy. Sondyqtan ony úsh jylǵa dep berdik. Osyndaı jumystarymyzdy jalǵastyra beremiz.

– Shaǵyn aqparatyńyzǵa raqmet! Alda Ýnıversıada boıynsha keńinen suhbat quramyz dep senemiz.

Aıbek MUHANOV,

Qazaqstan Jýrnalıster Odaǵynyń múshesi