ءتول كۇرەسىمىزدىڭ تۋى افريكادا تىگىلەدى

18-19 مامىر كۇندەرى دۇنيەجۇزىلىك قازاق كۇرەسى فەدەراتسياسىنىڭ ۇيىمداستىرۋىمەن وڭتۇستىك افريكا رەسپۋبليكاسىنىڭ كەيپتاۋن قالاسىندا وسىمەن ەكىنشى رەت قازاق كۇرەسىنەن قۇرلىقتىق چەمپيونات وتەدى. وعان 15 ەلدىڭ پالۋاندارى قاتىسىپ، ءۇش سالماق (70، 80، +80 كگ) دارەجەسى بويىنشا كۇش سىناسادى.
بيىلعى چەمپيوناتتا تورەشىلەرگە ارنالعان سەمينار دا بولادى. دۇنيەجۇزىلىك قازاق كۇرەسى فەدەراتسياسىنىڭ ءبىرىنشى ۆيتسە-پرەزيدەنتى سەرىك توكەەۆتىڭ ايتۋىنشا، جيىندا ۇيىمنىڭ تورەشىلەرى افريكالىقتارعا ءتول كۇرەسىمىزدىڭ ەرەجەلەرىن ۇيرەتىپ، تاجىريبەلەرىمەن بولىسەدى.
-جاقىن كۇندەرى افريكادا ۇلتتىق كۇرەسىمىزدەن قۇرلىقتىق چەمپيونات وتكىزەمىز. بۇل — دۇنيەجۇزىلىك قازاق كۇرەسى فەدەراتسياسىنىڭ كەيپتاۋندا ەكىنشى رەت ۇيىمداستىرىپ جاتقان جارىسى. ءبىرىنشى چەمپيونات ەرەسەكتەر اراسىندا 2013 جىلدىڭ 26 اقپان مەن 3 ناۋرىز ارالىعىندا بولعان ەدى. سول كەزدە جارىسقا وڭتۇستىك افريكا رەسپۋبليكاسى، زيمبابۆە، بوتسۆانا، سۆازيلەند، گابون مەن نيگەريا مەملەكەتتەرىنىڭ پالۋاندارى قاتىسقان. ال بيىلعى دودادا 6 ەمەس، ەندى 15 ەلدىڭ وكىلدەرى باق سىناسادى. ونىڭ تاعى ءبىر ەرەكشەلىگى، چەمپيونات ەرلەر جانە ايەلدەر اراسىندا وتەدى. جاڭا ايتقان ەلدەردىڭ سپورتشىلارى جارىسقا تاعى دا قاتىسامىز دەپ بەلىن بۋىپ وتىر. ودان باسقا سەيشەل ارالدارى، ماۆريكي، كونگو دەموكراتيالىق رەسپۋبليكاسى، بەنين، مالاۆي، ناميبيا، ۋگاندا مەن وڭتۇستىك افريكا رەسپۋبليكاسىنىڭ گوتەنگ، شىعىس كەيپ، سولتۇستىك كەيپ جانە باتىس كەيپ پروۆينتسيالارى جەكە كوماندا بولىپ قاتىسادى، — دەيدى سەرىك توكەەۆ.

داستان كەنجالين