SportPress.kz Qazaqstan sport jańalyqtary
Almatyda bokstan KSRO sport sheberi, Qazaqstannyń eńbek sińirgen jattyqtyrýshysy Amalbek Qozybaquly Tshanovtyń halyqaralyq týrnıri altynshy márte jalaýyn jelbiretti.
Jastar arasyndaǵy dodaǵa elimizdiń sportshylarynan basqa Mońǵolııa, О́zbekstan, Qyrǵyzstan men Túrkmenstannan boksshylar qatysty. 2001-2002 jyly týǵan jastar apta boıy respýblıkalyq sport kolledjiniń manejine tigilgen sharshy alańnyń shańyn kóterip, kórermenniń qanyn qyzdyratyn jekpe-jekter ótkizdi. 100-den asa jýan judyryq jigitter on salmaqta júldelerdi bóliske saldy.
Qazaq boksynyń ardagerleri AIBA tóreshisi bolǵan Serik Ábdinálıev, AQSh-KSRO matchynyń chempıony, dańqty boksshy Jandos Kókimov, Eýropa chempıony, bilikti bapker Kárimjan Ábdirahmanov, Sıdneı Olımpıadasynyń chempıony Ermahan Ybyraıymov, Mıhaıl Iýrchenko, álem chempıony Galıb Jafarov syndy sportshylar týrnırdiń qurmetti qonaǵy bolyp, bozbala boksshylardyń sheberligin baıqady.
Sıdneı Olımpıadasynyń chempıony Ermahan Ybyraıymov bul týrnır talaı talanttardyń tomaǵasyn sypyrar tuǵyr bolǵanyn, bolashaqta da bokstyń shoq juldyzdaryn shyǵaratyn dodaǵa aınalatynyn jetkizdi.
–Bıyl altynshy márte uıymdastyrylǵan týrnırge jyl saıyn qatysýshy komandalardyń sany da artyp, boksshylardyń sheberligi de shyńdalyp keledi. Basqa elderden de tańdaýly boksshylar kelip, sharshy alańda shıyrshyq atyp aıqasýy týrnırdiń básiniń joǵary eken aıǵaqtaıdy. Amalbek Qozybaquly basqaratyn respýblıkalyq sport kolledji olımpıadalyq sporttyń birneshe túrinen talantty da, talapty balalardy ósirip, qanatyn qataıtyp, órisin ashyp berýde. Basqalardy aıtyp maqtanbaı-aq kúni keshe Taılandta ótken Azııa chempıonatynda qola júlde alǵan Sanatáli Toltaev osy kolledjdiń stýdenti. Osyndaı bilim ordasynda oqı júrip, ulttyq qurama sapyna qosylyp, el namysyn abyroımen qorǵap júr. Bul týrnır jyl saıyn jańa juldyzdardyń jaryqqa shyǵýyna baspaldaq bolatyny anyq, – deıdi E.Ybyraıymov.
Alty kúnge ulasqan dodanyń fınaldyq jekpe-jekterinde úzdik shyǵyp, chempıondyq ataqty 49 kıloda Almaty oblysynan qatysqan Qaırat Ernur jeńip aldy. 52 kıloda qyzylordalyq Núrken Qanjardyń qanjyǵasy maılanyp, altyn medal oljalady. 60 kg salmaqta ózbekstandyq Haırýlla Almıatov, 64 kıloda almatylyq Begzat Boranbaev, 75 kg salmaqta astanalyq Ábdikerim Bekbolat, 81 kıloda qyrǵyzstandyq Islam Abdykadyr ýlýý, asa aýyr salmaqta aqtóbelik Ernar Naýryzov chempıon atandy.
Respýblıkalyq sport kolledjiniń úsh stýdenti halyqaralyq týrnırde oza shaýyp, jankúıerlerin jelpintip, altynnan alqa taǵyndy. Olar: 56 kıloda Mıras Qanabek. 69 kg salmaqta Arna Qýanov men 91 kıloda Begzat Tańatar.
«Shańyraq» sport mektebiniń boksshysy Baltabaı Muhametkárim «jeńiske degen jigeri úshin» atalymymen marapattaldy.
Týrnırdiń úzdik boksshysy ataǵyn Begzat Tańatar ıelendi. Ádil tóreligimen tánti etken ózbekstandyq Qambar Dúısenovke «úzdik tóreshiniń» syı-sııapaty berildi.
Respýblıkalyq sport kolledjiniń dırektory, qoǵam qaıratkeri, pedagogıka ǵylymdarynyń doktory, professor Amalbek Tshanov týrnırdiń dúrkirep ótýine qoldaý kórsetip, muryndyq bolǵan Mádenıet jáne sport mınıstrligine, Almaty qalasynyń ákimdigine jáne uıymdastyrýshy komıtet múshelerine zor alǵysyn bildirdi.
N. RAHMET,
Fotolardy túsirgen Q.SAPAROV
ALMATY
