SportPress.kz Qazaqstan sport jańalyqtary
At ústinen sadaq atýdan tuńǵysh uıymdastyrylǵan «Altyn jebe» álem chempıonatynyń bastalýyna sanaýly kúnder ǵana qaldy. Qazirgi kezde jarysqa onnan astam memlekettiń mergenderinen tapsyrys tústi. Al, sonda osy dúnıejúzilik mergender saıysyna qatysatyn qazaq mergenderi qatarynda kimder bolýy múmkin?
«Altyn jebe» ataýy álem mergenderine halyqaralyq týrnır retinde jaqsy tanys. Sebebi, 2017 jyly jáne 2018 jyly elorda tórinde «Altyn jebe» jarysy halyqaralyq týrnır deńgeıinde uıymdastyryldy. Alǵashqy jylǵy básekede 11 memlekettiń 19 mergeni, al, 2018 jylǵy «Altyn jebede» 11 eldiń 25 ókili baq synady. Qos týrnırdiń de bas júldesin rýmynııalyq surmergen Mıhaı Kozmeı jeńip aldy. Birinshi týrnırdiń kúmis medalin Aıtbek Sarybaı ıelengen-di. Ekinshi týrnırdiń qola júldesine Eralhan Aıkóz, qola medaline Abzal Týlybekov qol jetkizgen bolatyn.
Buǵan deıin «Altyn jebe» týrnırine Túrkııa, Vengrııa, Malaızııa, Polsha, Fınlıandııa, Rýmynııa, Reseı, Monǵolııa, Ońtústik Afrıka, Ońtústik Koreıa, Japonııa mergenderi qatysqan edi. Ataǵy osylaısha keń jaıylǵan «Altyn jebeni» dúnıejúzilik jarys deńgeıine kóterý maqsatynda Ulttyq sport qaýymdastyǵy bıyl jamby atýdan I álem chempıonatyn uıymdastyrýdy jón kórdi. Jamby atýdan I álem chempıonaty Mádenıet jáne sport mınıstrliginiń jyldyq kúntizbelik josparyna sáıkes ótkizilýde. Tuńǵysh álem chempıonatyna shet memleketterden eki sportshydan, uıymdastyrýshy el tarapynan bes sportshydan qatysady.
Sonda I álem chempıonatyna Qazaq eli atynan qatysý baqyty kimderge buıyrýy múmkin? Áli esimizde, jamby atýdan 2015 jyly alǵash uıymdastyrylǵan Qazaqstan chempıonatyna saýsaqpen sanarlyqtaı ǵana sportshy qatysqan. Arada ótken tórt jylda qazaq surmergenderiniń qatary kádimgideı qalyńdap qaldy. Mergenderimizdiń aldy Ońtústik Koreıada ótken álem chempıonatynyń jeńimpazy atanyp úlgerdi. Túrkııa, Vengrııa, Iordanııadaǵy halyqaralyq jarystarǵa qatysyp, tájirıbe jınaqtady. Bıylǵy elishilik chempıonatta respýblıkanyń ár óńirinen otyzǵa jýyq mergen baq synaýda.
Jamby atýdan V márte ótkizilgen Qazaqstan chempıonaty 26 mamyrda aıaqtalady. I álem chempıonatyna bizdiń elden kimderdiń qatysatyny elishilik chempıonat qorytyndysyna qaraı naqty aıtylady. Alaıda, biz búgin osy ýaqytqa deıin jamby atýda sýyrylyp kózge túsken úzdik mergenderimizdiń birnesheýin jankúıer nazaryna usynýdy jón kórdik.
I álem chempıonatyna qatysýy múmkin qazaq mergenderi
Sýrette: Jamby atýdyń ataqty mergenderi (ońnan solǵa qaraı) : At ústinen sadaq atýdan álem chempıony Abzal Týlybekov, jamby atýdan 2017 jylǵy Qazaqstan chempıonatynyń kúmis júldegeri jáne 2018 jylǵy Qazaqstan chempıony Talǵat Omarbekov, «Altyn jebe» halyqaralyq týrnıriniń kúmis, qola júldegeri, jastar arasyndaǵy I Azııa chempıonatynyń kúmis júldegeri Eralhan Aıkóz, «Altyn jebe» týrnıriniń kúmis júldegeri Aıtbek Sarybaı.
Abzal TÝLYBEKOV – Jambyl oblysy, Merke aýdanynda 1996 jyly týǵan. 2017 jylǵy jamby atýdan jastar arasyndaǵy Qazaqstan chempıony. Sport sheberi. QR qurama komandasynyń múshesi. II «Altyn jebe» halyqaralyq týrnıriniń qola júldegeri (2018), Vengrııada ótken halyqaralyq festıvalge qatysýshy. 2018 jylǵy Qazaqstan chempıonatynyń kúmis júldegeri, Ońtústik Koreıada at ústinen sadaq atýdan ótken álem chempıonatynyń jeńimpazy (2018).
Eralhan AIKО́Z (Túrkistan oblysy) – I «Altyn jebe» halyqaralyq týrnıriniń qola júldegeri (2017), II «Altyn jebe» halyqaralyq týrnıriniń kúmis júldegeri (2018), Qazaqstan chempıonatynyń birneshe dúrkin júldegeri, 2019 jyly ótken jastar arasyndaǵy I Azııa chempıonatynyń kúmis júldegeri.
Álııa KAMALOVA – 1997 jyly týǵan. Almaty oblysy Qarasaı aýdanynda turady. Jamby atýdan Qazaqstan qurama komandasynyń múshesi. Álııa eń alǵash jamby atýdy 2016 jyldan bastady. Almaty qalasynda 2016 jyly «Altyn mergen», 2017 jyly «Nurmaganbet expedition» týrnırin jeńip alǵan. Eresekter arasyndaǵy 2018 jylǵy Almaty qalalyq ashyq týrnıriniń jeńimpazy. Uly otan soǵysy ardagerlerine arnalǵan Almaty oblysynyń ashyq týrnıriniń júldegeri. Almaty qalasynda ótken «Uly dala kóshpendiler álemi oıyndarynyń» chempıony. 2018 jyly Qyrǵyzstanda ótken «Salbýýrýn» halyqaralyq jarysynyń kúmis júldegeri.
Aıtbek SARYBAI – Túrkistan oblysyndaǵy Tólebı aýdanynyń týmasy. Jamby atýdan jastar men eresekter arasyndaǵy elishilik chempıonattarda bas júldeni ıelenip, Qazaqstannyń birneshe dúrkin chempıony boldy. Sport sheberi. Jamby atýdan Qazaqstan qurama komandasynyń múshesi. Tuńǵysh ret uıymdastyrylǵan «Altyn jebe» halyqaralyq týrnıriniń kúmis júldegeri (2017). Tórt jylda bir ótkiziletin «Aqbıdaı» aýyl sporty oıyndary spartakıadasynyń chempıony (2017 jyl, Aqtóbe). Vengrııada ótken halyqaralyq ulttyq sadaq atý festıvaline qatysýshy (2017 jyl).
Talǵat OMARBEKOV (Qaraǵandy oblysy) – 2017 jylǵy Qazaqstan chempıonatynyń kúmis júldegeri, 2018 jylǵy el chempıony, II «Altyn jebe» týrnırine qatysýshy.
Baqdáýlet BABAJAN (Jambyl oblysy) – jastar arasyndaǵy 2019 jylǵy Qazaqstan chempıonatynyń kúmis júldegeri, jastar arasyndaǵy I Azııa chempıonatynyń jeńimpazy (2019).
Tólegen JÁKITAI
