Aqtóbede V festıval ótedi

Ulttyq sport túrlerinen respýblıkalyq V festıval 18-25 qyrkúıek kúnderi Aqtóbe qalasynda ótedi. Tórt jylda bir ret uıymdastyrylatyn atalmysh básekege qatysýshylar ulttyq sporttyń on túrinen baq synaıdy, dep habarlady Qazaqstan ulttyq sport qaýymdastyǵy.

Atap aıtqanda, 18 qyrkúıekte bastalatyn V festıvalde kókpar, aýdaryspaq, teńge ilý, jamby atý, qusbegilik (búrkit, qarshyǵa, ıtelgi), báıge túrleri (at, qunan), toǵyzqumalaq, asyq atý, jekpe-jek (erler jáne áıelder arasynda), qazaq kúresi  (erler jáne áıelder arasynda) sport túrleriniń júldeleri sarapqa salynady.

V festıvaldiń ashylý (21 qyrkúıek) jáne jabylý (25 qyrkúıek) saltanattary Aqtóbe qalasyndaǵy «Jekpe-jek» sport saraıynda ótkiziledi. Festıvalge kelý kúni – at sporty túrleri boıynsha 17 qyrkúıekke, qazaq kúresi úshin – 19 qyrkúıekke, basqa sport túrleri úshin 20 qyrkúıekke josparlanýda. Elimizde ulttyq sport túrlerin damytý, salaýatty ómir saltyn qalyptastyrý, jastardy otansúıgishtikke jáne halyqtar arasynda dostyq pen tatýlyqty nyǵaıtý, eń bastysy ulttyq sport túrlerin damytýdaǵy eń myqty óńirdi anyqtaý maqsatynda ótkiziletin bıylǵy festıvalǵa respýblıkadaǵy barlyq óńirdiń komandalary qatyspaqshy.

Eske salyp ótsek,  Ulttyq sport festıvali  1999 jyly tuńǵysh ret Elorda tórinde jalaýyn kótergen. Al,  eki myńnan astam sportshy qatysqan IV Ulttyq sport festıvali 2015 jylǵy qazan aıynda Qyzylorda qalasynda ótkizilip, bas júldeni Qyzylorda oblysy, ekinshi oryndy Túrkistan oblysy, úshinshi oryndy Jambyl oblysy ıelengen bolatyn.