توپ-5: قازاقستان كۇرەستەن ۇزدىك بەس ەلدىڭ قاتارىندا

ازەربايجاننىڭ استاناسى باكۋ قالاسىندا 17 جاسقا دەيىنگى سپورتشىلار اراسىندا وتكەن الەم چەمپيوناتىنىڭ قورىتىندىسى بويىنشا قازاقستان قۇراماسى كۇرەستەن الەمنىڭ ۇزدىك ەلدەرىنىڭ قاتارىنا قوسىلدى.

قازاقستان كۇرەس فەدەراتسياسىنىڭ حابارلاۋىنشا، ۇلتتىق قۇرامانىڭ بالۋاندارى گرەك-ريم، ەركىن جانە ايەلدەر كۇرەسىنىڭ ناتيجەسى بويىنشا 225 ۇپاي جينادى.

قولدا بار مالىمەتكە قاراعاندا، رەسەي سپورتشىلارى جالپى ەسەپتە 305 ۇپايمەن ءبىرىنشى ورىن السا، اقش 294 ۇپايمەن ەكىنشى، ءۇندىستان 250 ۇپايمەن ءۇشىنشى، يران 231 ۇپايمەن ءتورتىنشى ورىندى يەلەندى.

-قازاقستان 225 ۇپايمەن بەسىنشى ساتىدان كورىنىپ، وزبەكستان، ۋكراينا، جاپونيا، ازەربايجان مەن تۇركيا قۇرامالارىن ارتتا قالدىردى. بۇل كورسەتكىش قازاقستاندى ازيانىڭ ۇزدىك ءۇش قۇراماسىنىڭ قاتارىنا قوستى. قۇرلىق ەلدەرى اراسىندا ۇلتتىق قۇراما كوماندا ءۇندىستان مەن يراننان كەيىنگى ءۇشىنشى ناتيجەنى كورسەتتى. ال ورتالىق ازيا مەملەكەتتەرى اراسىندا ءبىرىنشى ورىنعا يە بولدى، — دەلىنگەن كۇرەس فەدەراتسياسىنىڭ حابارلاماسىندا.

باكۋ بوزكىلەمىندە قازاقستان بالۋاندارى 2 التىن، 2 كۇمىس جانە 4 قولا مەدال جەڭىپ الدى. اتاپ ايتقاندا، ديار ءامانالى (55 كگ) مەن باقداۋلەت اعابەك (48 كگ) الەم چەمپيونى اتانسا، ءالي الماس (48 كگ) پەن ايشا ابدىمالىك (65 كگ) كۇمىس جۇلدەگە يە بولدى. ال ءالينۇر تولەۋعالي (71 كگ)، ءىنجۋ باققوجا (46 كگ)، ماردان ورىنباسار (60 كگ) مەن ادىلەت رىسباي (71 كگ) قولا مەدال يەلەندى.

قازاقستان قۇراماسىنىڭ العاشقى التىن جۇلدەسىن گرەك-ريم كۇرەسىنەن 55 كيلوعا دەيىنگى سالماقتا كۇش سىناسقان ديار ءامانالى جەڭىپ الدى. ول فينالعا دەيىن ءتورت قارسىلاسىن جولدان شىعارىپ، فينالدا ماجارستاننىڭ وكىلى كەۆە ۆازۋل كوۆاچپەن بەلدەستى. بۇل بەلدەسۋدە ءار ۇپايدىڭ سالماعى ارتىپ، كۇرەس 1:1 ەسەبىمەن اياقتالدى.

بوزكىلەمدە قازاق بالۋانى ءبىرىنشى بولىپ ناتيجەلى ءادىس ىستەدى. ءسويتىپ، ول UWW ەرەجەسىنە سايكەس، جەڭىسكە جەتتى. ونىڭ فينالعا دەيىنگى جولىندا دا وسال بەلدەسۋ بولعان جوق. ديار ءامانالى ىرىكتەۋ كەزەڭىندە گرەكيانىڭ وكىلىن 8:0 ەسەبىمەن جەڭىپ، ودان كەيىن رەسەي مەن گرۋزيا بالۋاندارىنان 3:1 جانە 2:1 ەسەبىمەن باسىم ءتۇستى.

جارتىلاي فينالدا بولگاريالىق دانيمير يوردانوۆتى 8:1 ەسەبىمەن جەڭىپ، التىن جۇلدە ءۇشىن كۇرەسۋگە مۇمكىندىك الدى.

الەم چەمپيوناتىنداعى ەكىنشى التىن مەدال ەركىن كۇرەستەن بۇيىردى. 48 كيلوعا دەيىنگى سالماقتا سىنعا تۇسكەن باقداۋلەت اعابەك بەس رەت كۇرەسىپ، سونىڭ بارلىعىن جەڭىسپەن اياقتادى. ول جارتىلاي فينالدا وزبەكستاننىڭ وكىلى فاررۋح ماحمۋدوۆتى 7:3 ەسەبىمەن جەڭىپ، فينالدا ۇندىستاننىڭ بالۋانمەن ااريانمەن كۇرەستى.  باقداۋلەت اعابەك فينالداعى ەسەپتى 10:0-گە جەتكىزىپ، بەلدەسۋدى مەرزىمىنەن بۇرىن اياقتادى.

-قازاقستان ەركىن كۇرەسىنەن U17 الەم چەمپيوناتىندا 2022 جىلدان بەرى التىن جۇلدەنى الا الماي كەلگەن ەدى. باقداۋلەت اعابەك ءتورت جىلدان كەيىن قازاق كۇرەسىنە التىن مەدال سىيلادى. ول بىلتىر  الەم چەمپيوناتىندا بەسىنشى ورىن السا، بيىل جاس بالۋان جاڭا سالماقتا بەس بەلدەسۋدىڭ بارلىعىن جەڭىپ، الەم چەمپيونى اتاندى.

قالعان التى جۇلدە دە قۇرامانىڭ جالپىكوماندالىق ەسەبىنە ۇلەس قوستى. گرەك-ريم كۇرەسىنەن ءالي الماس (48 كگ) كۇمىس، ءالينۇر تولەۋعالي (71 كگ) قولا جۇلدە الدى. ايەلدەر كۇرەسىندە ايشا ابدىمالىك (65 كگ) فينالعا دەيىن جەتىپ، كۇمىس مەدال يەلەنسە، ءىنجۋ باققوجا (46 كگ) الەم بىرىنشىلىگىندە ەكىنشى جىل قاتارىنان جۇلدەگەر اتاندى. ەركىن كۇرەستەن ماردان ورىنباسار (60 كگ) مەن ادىلەت رىسباي (71 كگ) قولا جۇلدەگە قول جەتكىزدى، — دەپ حابارلادى قازاقستان كۇرەس فەدەراتسياسى.

ستاتيستيكاعا قاراعاندا، بىلتىر قازاقستان قۇراماسىنىڭ ەسەبىندە ءبىر التىن، ەكى كۇمىس جانە جەتى قولا مەدال بولعان ەدى. ال بيىل كۇرەستەگى ناتيجە جاقسارىپ، قازاقتىڭ ءتورت بالۋانى فينالعا شىقتى.

قازاقستاننىڭ كۇرەس فەدەراتسياسىنىڭ توراعاسى ەركىن وقاسوۆتىڭ ايتۋىنشا، ەركىن كۇرەستە بىلتىرعى ءۇش قولا جۇلدەنىڭ ورنىنا بيىل ءبىر التىن مەن ەكى قولا بۇيىردى. ايەلدەر كۇرەسىندە ەكى جۇلدەلىك كورسەتكىش ساقتالىپ، ونىڭ ءبىرى كۇمىس مەدالعا اينالدى. ال گرەك-ريم قۇراماسى ءبىر التىن، ءبىر كۇمىس جانە ءبىر قولا مەدال يەلەنىپ، جۇلدەنىڭ ءۇش تۇرىنەن دە ناتيجە كورسەتتى.

بۇل جەتىستىكتەر جاسوسپىرىمدەر قۇراماسىن جۇيەلى دايارلاۋ مەن سپورتشىلارعا قاجەتتى جاعداي جاساۋ باعىتىنداعى جۇمىستىڭ ناتيجەسى ەكەنى ءسوزسىز.  بز بالۋاندار باكۋگە اتتانعالى جاتقان كەزدە دە جاستار قۇراماسىنىڭ دايىندىعىن كۇشەيتۋ مەن ولاردىڭ الەۋەتىن تولىق اشۋ فەدەراتسيا جۇمىسىنىڭ نەگىزگى مىندەتتەرىنىڭ ءبىرى ەكەنىن ايتتىق.

-ۇلتتىق قۇرامانىڭ حالىقارالىق دودالارعا جاقسى دايىندالۋىنا فەدەراتسيا تاراپىنان تۇراقتى قولداۋ كورسەتىلىپ كەلەدى. U17 الەم چەمپيوناتى اياسىندا دا وقۋ-جاتتىعۋ جيىندارىن وتكىزۋگە، مەديتسينالىق قولداۋعا جانە سپورتشىلارعا قاجەتتى جاعداي جاساۋعا باسىمدىق بەرىلدى. ءار جۇلدەنىڭ ارتىندا بالۋانداردىڭ تاباندى ەڭبەگى، جاتتىقتىرۋشىلاردىڭ ماڭداي تەرى مەن جۇيەلى دايىندىق تۇر. ءبىز جاس سپورتشىلاردى قولداۋدى، ولاردىڭ شەبەرلىگىن شىڭداۋعا قاجەتتى مۇمكىندىكتەر جاساۋدى جانە حالىقارالىق ارەناداعى باسەكەگە قابىلەتىن ارتتىرۋدى جالعاستىرامىز، – دەگەن ەدى بالۋاندارعا ءسات ساپار تىلەگەن كەزدە ەركىن قادىرعالي ۇلى.

جالپى ايتقاندا، ازەربايجانداعى الەم چەمپيوناتى قازاقستان جاسوسپىرىمدەر قۇراماسىنىڭ جەكەلەگەن سالماقتاردا عانا ەمەس، ءۇش كۇرەس ءتۇرىنىڭ جيىنتىق ناتيجەسى بويىنشا دا الەمدىك باسەكەگە دايىن ەكەنىن كورسەتتى.

-قوس التىن مەدال، ءتورت فينال مەن جالپىكوماندالىق ەسەپتەگى بەسىنشى ورىن اتقارىلعان جۇمىستىڭ ناقتى ناتيجەسى. ەندىگى مىندەت – وسى قارقىندى ساقتاپ، التىن جۇلدەگە تالاساتىن سالماقتاردىڭ قاتارىن ارتتىرۋ، — دەپ حابارلادى قازاقستان كۇرەس فەدەراتسياسى.