• Қазақ
  •   
  • Qazaq
  •   
  • قازاق
  •   
  • Рус
  •   

    Namysty urpaq ósip keledi

    Altyn kúz esik qaǵyp kelgeli beri elimizde sporttyń kóptegen túrlerinen álem deńgeıdegi baıraqty jarystar óte bastady. Sonyń ishinde erekshe ekshep aıtatyn jańalyqtyń biri ol  – qyrkúıek aıynda el astanasy Nur-Sultan qalasynda tuńǵysh ret kúres túrlerinen ótken álem chempıonaty. Qazaqstanda alǵash ret úzdik balýandardyń basyn qosqan beldesýler jankúıerlerge tamasha áser qaldyrdy. Sonymen birge ózekti órtegen ókinishter men kúıinishter  de boldy. Jalpy alǵanda jaman jetistik emes. Árıne, onyń bári jaqsy ǵoı, desek te týǵan jerimizde tuńǵysh ret kúres túrlerinen ótken  álem dodasynda altyn júldeden qur qol qalǵanymyz kóńilge kirbiń ákeletin sekildi. Degenmen de balýandarymyz baryn salyp kúmis pen qola medaldardy qorjynymyzǵa salýyn salyp-aq berdi. Biraq altynnyń orny bólek ekenin bilgenimizben amal neshik, barǵa qanaǵat ettik. Endi kelesi álem chempıonty 2021 jyly Norvegııanyń Oslo qalasynda jalaýyn kóteretin bolady.

    Elordadaǵy eresekter arasynda álem jarysy aıaqtala salyp,  Almatyda dzıýdodan kadetter arasynda álem chempıonaty bastalǵan bolatyn. Sol ǵalamdyq deńgeıdegi alamanda qazaq balýandary tamasha óner kórsetip, elimizdiń ánuranyn oınatyp, eńsemizdi bir kóterip tastady. Aǵalary ala almaǵan asýdy artynan ergen inileri baǵyndyryp, aǵalary ustamaǵan altyn júldeni inileri jeńip áperip, qazaq elin bir qýantty. Sonymen, álemniń 61 memleketinen kelgen 500 sportshy bir jeti boıy jeńis úshin jan alysyp, jan berisken jekpe-jekterin ótkizdi. Qazaqstan quramasynyń balýandary 1 altyn, 1 kúmis jáne 4 qola medaldardy jeńip alyp, jalpy komandalyq 4 oryndy ıelendi. Bul Qazaqstan úshin úlken tarıhı jetistik dep baǵa berýge bolady. Eske alsaq, 2017 jyly qazaq balýandary bir-aq qola júldemen shektelse, Almatydaǵy álem chempıonaty elimiz úshin óte tabysty boldy dep  tolyqtaı qýana aıta alamyz. Jarystyń alǵashqy kúninde 50 kg salmaqta kúresken Nurqanat Serikbaev  aıdy aspanǵa shyǵaryp, altyn medaldi atoılatyp jeńip ápergen edi. Bolashaǵynan zor úmit kúttiretin apaıtós balýanymyz fınalda Eýropa chempıony Roman Valdıoer Pıkarony alyp uryp jeńiske jetti. Qyzdar arasynda 70 kg salmaqta fınalǵa shyqqan jerlesimiz Madına Paragýlgova brazılııalyq balýanǵa ese jiberip, kúmis medaldi qanaǵat etti. Sondaı-aq, 40 kg salmaqta Álıma Jumaǵalıeva, 60 kg salmaqta Ádil Márlen,  Tilegen Tynarbaı (66 kg), Aıdar Arapovtar (81 kg)  qola júldelerdi jeńip  áperdi.

    Ásirese, Almatydaǵy K.Ahmetov atyndaǵy Olımpıada rezerviniń  respýblıkalyq mamandandyrylǵan mektep-ınternat-kolledjiniń balýandary erledi. Qazaqtyń boıynda qaınaǵan namysy bar jas jigitter Balýan Sholaq sport saraıyna kelgen óz jankúırelerin jerge qaratpady. Jas balýandarymyz  qarsylastyryna qazaqtyń qanyna sińgen qaısar minezin kórsetti. Aıtalyq, 60 jáne 66 kg salmaqtarda kúresken aıtýly mektep-ınternat-kolledjdiń  1 kýrs stýdentteri Ádil Marlen men  Tynarbaı Tilegender álem chempıonatynyń qola júldelerin ıelenip, halyqty qýanyshqa bóledi. Bir ǵana mektep-ınternat-kolledjdiń jasóspirim balýandarynyń osyndaı  tabysqa jetýine árıne, bilikti bapkerler men bilgir basshylyqtyń júıeli jumystarynyń jemisi dep bilemiz. Bul mektepte dzıýdodadan úlken sport saraıy bar ekenin talaı ret aıtylyp, jazylǵany bolatyn.   Jasóspirimderge zor kóńil bólgen jerde ǵana nátıje bolary ol zańdy. Aıtýly mektep-ınternat-kolledjiniń dırektory Seıilhan Baqtyǵalıuly Qaraqov myrzanyń belsendi jumysynyń nátıjesinde boı kótergen záýlim dzıýdo akademııasynda bilikti maman bapkerler toǵysqan. Bul dzıýdo kesheninde jattyǵatyn jasóspirim balýandar sheberlikterin  shyńdaı otyryp, tamasha nátıjelerge qol jetkizýde. Qamqorlyqtyń arqasynda jas órenderdiń alǵa qoıǵan maqsattary kún sanap oryndalyp keledi. «Bir kisi qazǵan qudyqtan myń kisi sý ishedi», – deıdi babalarymyz Seıilhan Baqtyǵalıulynyń tikeleı uıtqy bolýymen ashylǵan bul kúres akademııasy elimizde ǵana emes TMD keńistiginde teńdesi joq zor ǵımarattyń biri bolyp otyr.

    Búginde aıtýly dzıýdo akademııasynyń ishi jalyndy kúres qumar jasóspirimderden bir bosamaıtynyn kózim kórdi. «As – adamnyń arqaýy», deımiz. Bul mektepte jasóspirmderge ýaqtyly 3 mezgil as-taǵam beriledi. Maman aspazdyń qolynan ázirlenip dastarhanǵa qoıylǵan kalorııasy joǵary ári  dámdi as-dámder men túrli jemis-jıdekter oqýshylardyń sporttaǵy kúsh-qýatyn arttyrýyna zor áserin beretin kórinedi. Merekelik kúnderi oqýshylarǵa ulttyq  as-taǵamdar tartý etilip otyrady eken. О́ıtkeni, mektep  basshylyǵy balalardyń  bul jerde óz úıindegideı sezinýdi maqsat etipti. Al, 200 astam balaǵa dep turǵyzylǵan jatahanada búgingi kúngi zaman aǵymyna saı qajettiń bári barshylyq dese bolǵandaı. Munyń bárin tizip aıtyp otyrǵan sebebim, qamqorlyq bar jerde tabys ta bolary haq.

    Kútimi jaqsy alma aǵash jemisin molynan beretin sııaqty jaǵdaılary tolyqtaı kútimmen qoldaýǵa kózdelgen aıtýly mekteptiń jasóspirimderi senimdi aqtap, osylaısha álem saıystarynda júlde salyp, Qazaqstannyń mártebesin kóterýde. «Kóline qaraı qazy, jerine qaraı sazy», – deıdi babalarymyz. Jas talanttardy tomaǵasyn sypyryp, uly dúbirge qosyp jatqan berekeli bul mekteptiń bolashaǵynan zor úmit kútýge bolatynyna kózimizdi jetkizip keledi. Oǵan dálel naqty bir mysal, joǵaryda aıtyp ótken Almatydaǵy Balýan Sholaq sport saraıynda dzıýdo kúresinen kadetter arasynda  ótken álem chempıonaty dep aıtamyz. Sonymen birge jýyrda ǵana Úndistannyń Banglor qalasynda júzýden jasóspirimder arasynda ótken Azııa birinshiliginde aıtýly sport mektebiniń 8 synyp oqýshysy Tileýbek  Dııas brass baǵdarlamasy boıynsha 200 m  júzý jarysynda júldeli qola medaldi jeńip alǵan eken. Qarakóz qazaq balalarynyń sý sportynan da alǵa sýyrylyp shyǵa bastaǵanyna qalaı ǵana qýanbassyń. Sondaı-aq, Taraz qalasynda qyrkúıektiń 8-10 aralyǵynda dzıýdo kúresinen ul-qyzdar  arasynda KSRO sport sheberi Baqytjan Tashmetovty eske alýǵa arnalǵan halyqaralyq jarysta K.Ahmetov mektebiniń oqýshylary Arýjan Erejepova, Talǵat Daıana, Takıeva Karına altyn júldelerdi jeńip alsa, Zakır Ulan qola júldege ıe bolypty. Bul jeńis te bir mektep qana emes el abyroıyn asqaqatata túsý dep uǵamyz.

    Al, eń basty qýana jarııa etetin jańalyq, el sportynyń tarıhynda tuńǵysh ret aıtýly sport mektebiniń úılesimdi júzý bólimshesiniń oqýshylary 13-15 jas aralyǵynda ótken álem chempıonatyna qatysyp  chempıon atanyp otyr eken. Naqtyraq aıtsaq, Slovakııanyń Samorın qalasynda 28 tamyz ben 2 qyrkúıek aralyǵynda alǵash ret úılesimdi júzýden  álem chempıonaty ótken edi. Sol baıryqty jarysta elimizdiń namysyn qorǵaǵan Edýard Kım, Jaklın Iakımova men Valerııa Stolbýnova aralas dýet baǵdarlamasy boıynsha topjaryp altyn júldelerdi jeńip aldy.

    Jahandyq jarysta kók týymyzdy kókke kótertip, elimizdiń án uranyn oınatýǵa májbúr etken qos sańlaǵymyz K.Ahmetov atyndaǵy Olımpıadalyq rezervtegi respýblıkalyq mamandandyrylǵan mektep-ınternat-kolledjdiń oqýshylary. Mine, naǵyz erlik  dep aıtsaq durys shyǵar. Barlyq ataq-abyroı, qoshamet-qurmet, tókken ter talmaı etken eńbektiń arqasynda keledi.  «Sýly jer quraqsyz bolmas – taýly jer bulaqsyz bolmas», demekshi, qoldaý, qamqorlyq jasalyp jatqan jerde, mindetti túrde el namysyn abyroımen qorǵaıtyn batyr ul-qyzdar shyǵyp otyrýy zańdylyq. Bul mektepten áli de talaı halyqaralyq, álemdik, olımpıadalyq jarystarda elimizdiń mereıin asqaqtatyn qarymdy da alymdy sportshylar ósip shyǵatynyny nyq senimdemiz.

     

    Aqyn ORDABAIULY,

    ALMATY

    Pikir jazý

    Your email address will not be published. Required fields are marked *

    *