• Қазақ
  •   
  • Qazaq
  •   
  • قازاق
  •   
  • Рус
  •   

    نامىستى ۇرپاق ءوسىپ كەلەدى

    التىن كۇز ەسىك قاعىپ كەلگەلى بەرى ەلىمىزدە سپورتتىڭ كوپتەگەن تۇرلەرىنەن الەم دەڭگەيدەگى بايراقتى جارىستار وتە باستادى. سونىڭ ىشىندە ەرەكشە ەكشەپ ايتاتىن جاڭالىقتىڭ ءبىرى ول  – قىركۇيەك ايىندا ەل استاناسى نۇر-سۇلتان قالاسىندا تۇڭعىش رەت كۇرەس تۇرلەرىنەن وتكەن الەم چەمپيوناتى. قازاقستاندا العاش رەت ۇزدىك بالۋانداردىڭ باسىن قوسقان بەلدەسۋلەر جانكۇيەرلەرگە تاماشا اسەر قالدىردى. سونىمەن بىرگە وزەكتى ورتەگەن وكىنىشتەر مەن كۇيىنىشتەر  دە بولدى. جالپى العاندا جامان جەتىستىك ەمەس. ارينە، ونىڭ ءبارى جاقسى عوي، دەسەك تە تۋعان جەرىمىزدە تۇڭعىش رەت كۇرەس تۇرلەرىنەن وتكەن  الەم دوداسىندا التىن جۇلدەدەن قۇر قول قالعانىمىز كوڭىلگە كىربىڭ اكەلەتىن سەكىلدى. دەگەنمەن دە بالۋاندارىمىز بارىن سالىپ كۇمىس پەن قولا مەدالداردى قورجىنىمىزعا سالۋىن سالىپ-اق بەردى. بىراق التىننىڭ ورنى بولەك ەكەنىن بىلگەنىمىزبەن امال نەشىك، بارعا قاناعات ەتتىك. ەندى كەلەسى الەم چەمپيونتى 2021 جىلى نورۆەگيانىڭ وسلو قالاسىندا جالاۋىن كوتەرەتىن بولادى.

    ەلورداداعى ەرەسەكتەر اراسىندا الەم جارىسى اياقتالا سالىپ،  الماتىدا دزيۋدودان كادەتتەر اراسىندا الەم چەمپيوناتى باستالعان بولاتىن. سول عالامدىق دەڭگەيدەگى الاماندا قازاق بالۋاندارى تاماشا ونەر كورسەتىپ، ەلىمىزدىڭ ءانۇرانىن ويناتىپ، ەڭسەمىزدى ءبىر كوتەرىپ تاستادى. اعالارى الا الماعان اسۋدى ارتىنان ەرگەن ىنىلەرى باعىندىرىپ، اعالارى ۇستاماعان التىن جۇلدەنى ىنىلەرى جەڭىپ اپەرىپ، قازاق ەلىن ءبىر قۋانتتى. سونىمەن، الەمنىڭ 61 مەملەكەتىنەن كەلگەن 500 سپورتشى ءبىر جەتى بويى جەڭىس ءۇشىن جان الىسىپ، جان بەرىسكەن جەكپە-جەكتەرىن وتكىزدى. قازاقستان قۇراماسىنىڭ بالۋاندارى 1 التىن، 1 كۇمىس جانە 4 قولا مەدالداردى جەڭىپ الىپ، جالپى كوماندالىق 4 ورىندى يەلەندى. بۇل قازاقستان ءۇشىن ۇلكەن تاريحي جەتىستىك دەپ باعا بەرۋگە بولادى. ەسكە الساق، 2017 جىلى قازاق بالۋاندارى ءبىر-اق قولا جۇلدەمەن شەكتەلسە، الماتىداعى الەم چەمپيوناتى ەلىمىز ءۇشىن وتە تابىستى بولدى دەپ  تولىقتاي قۋانا ايتا الامىز. جارىستىڭ العاشقى كۇنىندە 50 كگ سالماقتا كۇرەسكەن نۇرقانات سەرىكباەۆ  ايدى اسپانعا شىعارىپ، التىن مەدالدى اتويلاتىپ جەڭىپ اپەرگەن ەدى. بولاشاعىنان زور ءۇمىت كۇتتىرەتىن ءاپايتوس بالۋانىمىز فينالدا ەۋروپا چەمپيونى رومان ۆالديوەر پيكارونى الىپ ۇرىپ جەڭىسكە جەتتى. قىزدار اراسىندا 70 كگ سالماقتا فينالعا شىققان جەرلەسىمىز مادينا پاراگۋلگوۆا برازيليالىق بالۋانعا ەسە جىبەرىپ، كۇمىس مەدالدى قاناعات ەتتى. سونداي-اق، 40 كگ سالماقتا ءاليما جۇماعاليەۆا، 60 كگ سالماقتا ءادىل مارلەن،  تىلەگەن تىنارباي (66 كگ)، ايدار اراپوۆتار (81 كگ)  قولا جۇلدەلەردى جەڭىپ  اپەردى.

    اسىرەسە، الماتىداعى ك.احمەتوۆ اتىنداعى وليمپيادا رەزەرۆىنىڭ  رەسپۋبليكالىق مامانداندىرىلعان مەكتەپ-ينتەرنات-كوللەدجىنىڭ بالۋاندارى ەرلەدى. قازاقتىڭ بويىندا قايناعان نامىسى بار جاس جىگىتتەر بالۋان شولاق سپورت سارايىنا كەلگەن ءوز جانكۇيرەلەرىن جەرگە قاراتپادى. جاس بالۋاندارىمىز  قارسىلاستىرىنا قازاقتىڭ قانىنا سىڭگەن قايسار مىنەزىن كورسەتتى. ايتالىق، 60 جانە 66 كگ سالماقتاردا كۇرەسكەن ايتۋلى مەكتەپ-ينتەرنات-كوللەدجدىڭ  1 كۋرس ستۋدەنتتەرى ءادىل مارلەن مەن  تىنارباي تىلەگەندەر الەم چەمپيوناتىنىڭ قولا جۇلدەلەرىن يەلەنىپ، حالىقتى قۋانىشقا بولەدى. ءبىر عانا مەكتەپ-ينتەرنات-كوللەدجدىڭ ءجاسوسپىرىم بالۋاندارىنىڭ وسىنداي  تابىسقا جەتۋىنە ارينە، بىلىكتى باپكەرلەر مەن بىلگىر باسشىلىقتىڭ جۇيەلى جۇمىستارىنىڭ جەمىسى دەپ بىلەمىز. بۇل مەكتەپتە دزيۋدودادان ۇلكەن سپورت سارايى بار ەكەنىن تالاي رەت ايتىلىپ، جازىلعانى بولاتىن.   جاسوسپىرىمدەرگە زور كوڭىل بولگەن جەردە عانا ناتيجە بولارى ول زاڭدى. ايتۋلى مەكتەپ-ينتەرنات-كوللەدجىنىڭ ديرەكتورى سەيىلحان باقتىعالي ۇلى قاراقوۆ مىرزانىڭ بەلسەندى جۇمىسىنىڭ ناتيجەسىندە بوي كوتەرگەن ءزاۋلىم دزيۋدو اكادەمياسىندا بىلىكتى مامان باپكەرلەر توعىسقان. بۇل دزيۋدو كەشەنىندە جاتتىعاتىن ءجاسوسپىرىم بالۋاندار شەبەرلىكتەرىن  شىڭداي وتىرىپ، تاماشا ناتيجەلەرگە قول جەتكىزۋدە. قامقورلىقتىڭ ارقاسىندا جاس ورەندەردىڭ العا قويعان ماقساتتارى كۇن ساناپ ورىندالىپ كەلەدى. «ءبىر كىسى قازعان قۇدىقتان مىڭ كىسى سۋ ىشەدى»، – دەيدى بابالارىمىز سەيىلحان باقتىعالي ۇلىنىڭ تىكەلەي ۇيتقى بولۋىمەن اشىلعان بۇل كۇرەس اكادەمياسى ەلىمىزدە عانا ەمەس تمد كەڭىستىگىندە تەڭدەسى جوق زور عيماراتتىڭ ءبىرى بولىپ وتىر.

    بۇگىندە ايتۋلى دزيۋدو اكادەمياسىنىڭ ءىشى جالىندى كۇرەس قۇمار جاسوسپىرىمدەردەن ءبىر بوسامايتىنىن كوزىم كوردى. «اس – ادامنىڭ ارقاۋى»، دەيمىز. بۇل مەكتەپتە جاسوسپىرمدەرگە ۋاقتىلى 3 مەزگىل اس-تاعام بەرىلەدى. مامان اسپازدىڭ قولىنان ازىرلەنىپ داستارحانعا قويىلعان كالورياسى جوعارى ءارى  ءدامدى اس-دامدەر مەن ءتۇرلى جەمىس-جيدەكتەر وقۋشىلاردىڭ سپورتتاعى كۇش-قۋاتىن ارتتىرۋىنا زور اسەرىن بەرەتىن كورىنەدى. مەرەكەلىك كۇندەرى وقۋشىلارعا ۇلتتىق  اس-تاعامدار تارتۋ ەتىلىپ وتىرادى ەكەن. ويتكەنى، مەكتەپ  باسشىلىعى بالالاردىڭ  بۇل جەردە ءوز ۇيىندەگىدەي سەزىنۋدى ماقسات ەتىپتى. ال، 200 استام بالاعا دەپ تۇرعىزىلعان جاتاحانادا بۇگىنگى كۇنگى زامان اعىمىنا ساي قاجەتتىڭ ءبارى بارشىلىق دەسە بولعانداي. مۇنىڭ ءبارىن ءتىزىپ ايتىپ وتىرعان سەبەبىم، قامقورلىق بار جەردە تابىس تا بولارى حاق.

    كۇتىمى جاقسى الما اعاش جەمىسىن مولىنان بەرەتىن سياقتى جاعدايلارى تولىقتاي كۇتىممەن قولداۋعا كوزدەلگەن ايتۋلى مەكتەپتىڭ جاسوسپىرىمدەرى سەنىمدى اقتاپ، وسىلايشا الەم سايىستارىندا جۇلدە سالىپ، قازاقستاننىڭ مارتەبەسىن كوتەرۋدە. «كولىنە قاراي قازى، جەرىنە قاراي سازى»، – دەيدى بابالارىمىز. جاس تالانتتاردى توماعاسىن سىپىرىپ، ۇلى دۇبىرگە قوسىپ جاتقان بەرەكەلى بۇل مەكتەپتىڭ بولاشاعىنان زور ءۇمىت كۇتۋگە بولاتىنىنا كوزىمىزدى جەتكىزىپ كەلەدى. وعان دالەل ناقتى ءبىر مىسال، جوعارىدا ايتىپ وتكەن الماتىداعى بالۋان شولاق سپورت سارايىندا دزيۋدو كۇرەسىنەن كادەتتەر اراسىندا  وتكەن الەم چەمپيوناتى دەپ ايتامىز. سونىمەن بىرگە جۋىردا عانا ءۇندىستاننىڭ بانگلور قالاسىندا جۇزۋدەن جاسوسپىرىمدەر اراسىندا وتكەن ازيا بىرىنشىلىگىندە ايتۋلى سپورت مەكتەبىنىڭ 8 سىنىپ وقۋشىسى تىلەۋبەك  دياس براسس باعدارلاماسى بويىنشا 200 م  ءجۇزۋ جارىسىندا جۇلدەلى قولا مەدالدى جەڭىپ العان ەكەن. قاراكوز قازاق بالالارىنىڭ سۋ سپورتىنان دا العا سۋىرىلىپ شىعا باستاعانىنا قالاي عانا قۋانباسسىڭ. سونداي-اق، تاراز قالاسىندا قىركۇيەكتىڭ 8-10 ارالىعىندا دزيۋدو كۇرەسىنەن ۇل-قىزدار  اراسىندا كسرو سپورت شەبەرى باقىتجان تاشمەتوۆتى ەسكە الۋعا ارنالعان حالىقارالىق جارىستا ك.احمەتوۆ مەكتەبىنىڭ وقۋشىلارى ارۋجان ەرەجەپوۆا، تالعات دايانا، تاكيەۆا كارينا التىن جۇلدەلەردى جەڭىپ السا، زاكير ۇلان قولا جۇلدەگە يە بولىپتى. بۇل جەڭىس تە ءبىر مەكتەپ قانا ەمەس ەل ابىرويىن اسقاقاتاتا ءتۇسۋ دەپ ۇعامىز.

    ال، ەڭ باستى قۋانا جاريا ەتەتىن جاڭالىق، ەل سپورتىنىڭ تاريحىندا تۇڭعىش رەت ايتۋلى سپورت مەكتەبىنىڭ ۇيلەسىمدى ءجۇزۋ بولىمشەسىنىڭ وقۋشىلارى 13-15 جاس ارالىعىندا وتكەن الەم چەمپيوناتىنا قاتىسىپ  چەمپيون اتانىپ وتىر ەكەن. ناقتىراق ايتساق، سلوۆاكيانىڭ سامورين قالاسىندا 28 تامىز بەن 2 قىركۇيەك ارالىعىندا العاش رەت ۇيلەسىمدى جۇزۋدەن  الەم چەمپيوناتى وتكەن ەدى. سول بايرىقتى جارىستا ەلىمىزدىڭ نامىسىن قورعاعان ەدۋارد كيم، جاكلين ياكيموۆا مەن ۆالەريا ستولبۋنوۆا ارالاس دۋەت باعدارلاماسى بويىنشا توپجارىپ التىن جۇلدەلەردى جەڭىپ الدى.

    جاhاندىق جارىستا كوك تۋىمىزدى كوككە كوتەرتىپ، ەلىمىزدىڭ ءان ۇرانىن ويناتۋعا ءماجبۇر ەتكەن قوس ساڭلاعىمىز ك.احمەتوۆ اتىنداعى وليمپيادالىق رەزەرۆتەگى رەسپۋبليكالىق مامانداندىرىلعان مەكتەپ-ينتەرنات-كوللەدجدىڭ وقۋشىلارى. مىنە، ناعىز ەرلىك  دەپ ايتساق دۇرىس شىعار. بارلىق اتاق-ابىروي، قوشامەت-قۇرمەت، توككەن تەر تالماي ەتكەن ەڭبەكتىڭ ارقاسىندا كەلەدى.  «سۋلى جەر قۇراقسىز بولماس – تاۋلى جەر بۇلاقسىز بولماس»، دەمەكشى، قولداۋ، قامقورلىق جاسالىپ جاتقان جەردە، مىندەتتى تۇردە ەل نامىسىن ابىرويمەن قورعايتىن باتىر ۇل-قىزدار شىعىپ وتىرۋى زاڭدىلىق. بۇل مەكتەپتەن ءالى دە تالاي حالىقارالىق، الەمدىك، وليمپيادالىق جارىستاردا ەلىمىزدىڭ مەرەيىن اسقاقتاتىن قارىمدى دا الىمدى سپورتشىلار ءوسىپ شىعاتىنىنى نىق سەنىمدەمىز.

     

    اقىن ورداباي ۇلى،

    الماتى

    پىكىر جازۋ

    Your email address will not be published. Required fields are marked *

    *