ەكسپو اياسىندا كاراتە-دودان ازيا چەمپيوناتى وتەدى

ەلىمىزدە تۇڭعىش رەت كاراتە-دودان ازيا چەمپيوناتى وتەدى. دودا 10-17 شىلدە كۇندەرى استانادا جالاۋىن جەلبىرەتپەك، دەپ حابارلايدى قازاقپارات قر كاراتە-دو فەدەراتسياسىنىڭ ءباسپاسوز قىزمەتىنە سىلتەمە جاساپ.

ەلىمىزدە تۇڭعىش رەت وتكەلى تۇرعان بىرىنشىلىككە بايلانىستى كەشە ۇيىمداستىرۋ كوميتەتىنىڭ وتىرىسى ءوتتى.

جيىن بارىسىندا بەدەلدى باسەكەنى جوعارى دەڭگەيدە وتكىزۋگە قاتىستى بىرنەشە ماسەلە تالقىلاندى. جارىسقا 30 ەلدەن 800-دەن اسا قوناق كەلەدى. ەكسپو حالىقارالىق كورمەسى اياسىندا وتەتىن بىرىنشىلىككە قاتىسۋشىلار 9 شىلدەدەن باستاپ كەلەدى. 10-13 شىلدە ارالىعىندا جاسوسىپىرىمدەر اراسىندا جۇلدەلەر ساراپقا سالىنسا، 14-17 شىلدەدە استانا تاتاميىنە ەرەسەكتەر شىعادى. سونىمەن قاتار، وسى كۇندەرى ەلوردامىزدا تورەشىلەر سەمينارى وتەدى. حالىقارالىق ەمتيحاندى 200-دەن اسا مامان تاپسىرادى.

كاراتە-دودان ازيا چەمپيوناتىنىڭ اشىلۋ سالاتاناتىنا دايىندىق قازىردەن باستالىپ كەتتى. سالتاناتتى شارادا ەلىمىزدىڭ تاريحى، مادەنيەتى تانىستىرىلاتىنى جانە وعان بەلگىلى كومپوزيتور ەركەش شاكەەۆ اتسالىساتىنى بەلگىلى بولدى. وعان قوسا جيىندا قوناقتاردىڭ قاۋىپسىزدگى، ۆيزا ماسەلەسى تالقىلانىپ، ازيا چەمپيوناتىنىڭ مەدال ۇلگىسى بەكىتىلدى.

ۇيىمداستىرۋ كوميتەتىنىڭ وتىرىسىنا قاتىسقان «قازاتومپروم» ۇاك» اق توراعاسى اسقار جۇماعاليەۆ، قر باس پروكۋرورىنىڭ ورىنباسارى مارات احمەتجانوۆ، استانا قالاسى اكىمىنىڭ ورىنباسارى ەرمەك امانشاەۆ، قر مادەنيەت جانە سپورت ۆيتسە-ءمينيسترى ساكەن مۇسايبەكوۆ، «قازاقستان» تەلەاراديوكورپوراتسياسىنىڭ توراعاسى ەرلان قارين ازيا چەمپيوناتىنا جان-جاقتى قولداۋ كورسەتىپ، جارىستىڭ جوعارى دەڭگەيدە وتۋىنە ىقپال ەتەتىندەرىن جەتكىزدى.