• Қазақ
  •   
  • Qazaq
  •   
  • قازاق
  •   
  • Рус
  •   

    Semeıde ataqty balýan balalarǵa keńes berdi

    Semeı qalasyndaǵy fızıka-matematıka baǵytyndaǵy Nazarbaev Zııatkerlik mektebinde muǵalimder men oqýshylar elimizdiń maqtanyshy, dańqty balýan Aıbek Nuǵymarovpen kezdesti, dep habarlady Semeı qalasyndaǵy fızıka-matematıka baǵytyndaǵy Nazarbaev Zııatkerlik mektebiniń baspasóz qyzmeti

    Sharanyń ótýine jataqhana tárbıeshileri uıytqy boldy. Qazaq kúresiniń maıtalmany, elimizdiń, Azııanyń birneshe dúrkin chempıony, «Qazaqstan barysy», «Eýrazııa barysy», «Álem barysy» syndy básekelerdiń jeńimpazy ári júldegerimen júzdesý ásirese, oqýshylar úshin áserli ótti.

    –Kezdesýdi uıymdastyrý kópten oıymyzda júrgen. Áriptesim Gúlnar Jomartqyzy ekeýmiz aqyldasa kelip, bir ózgeshe júzdesý bolsyn degen oımen erkin suhbat jasaýdy uıǵardyq. El namysyn abyroımen qorǵap, halqynyń súıikti ulyna aınalǵan balýanmen kezdesýdegi maqsatymyz – óskeleń urpaqqa Aıbek Nuǵymarovtyń ómir jolyn ónege etý. Sol arqyly salamatty ómir saltyn nasıhattaý, shákirtterimizdi týǵan elge qyzmet etýge tárbıeleý, – deıdi sharany uıymdastyrýshylardyń biri, jataqhana tárbıeshisi Aıjan Muqatova.

    Basqosý bastalmas buryn balýanǵa mektep jataqhanasynyń búgingi tynys-tirshiligi tanystyryldy. Jataqhananyń sharýasyn meńgerýshi Qaljan Omarbaeva túsindirip, shákirtterimizdiń «ekinshi úıi» jaıly mol maǵlumat berdi. Balalar úshin jasalyp jatqan qamqorlyqqa óz tańdanysyn jasyra almaǵan qonaǵymyz úlgi alýǵa bolatyn dúnıeniń kóp ekendigin atap ótti.

    –Meni kezdesýge shaqyrýshylar kóp. Shama kelgenshe meselderin qaıtarmaı barýǵa tyrysamyn. Sonyń ishinde sizderdiń mektepterińizdiń shaqyrýyn árqashan ystyq yqylaspen qabyldaımyn. О́ıtkeni, sizderde bilim alatyn balalardyń deni erteńgi elimizdiń ár salada damýyna úles qosatyn alǵyr shákirtter. Men búgingi kezdesýimde ini-qaryndastaryma aǵalyq aqylymdy aıtyp, bolashaq ómirlerine erik-jiger bersem deımin. Elimizdegi árbir jas Otanymyz úshin aıanbaı eńbek etý kerek dep bilemin, – deıdi Aıbek Serikboluly óz sózinde.

    «Qurmet» ordeniniń ıegeri, qazaq kúresinen Qazaqstan Respýblıkasynyń eńbegi sińgen sport sheberi atanǵan qonaǵymyzben júzdesý shynymen qyzyqqa toly boldy. Balýan jaıly oqýshylarymyzdyń zertteý jumystarynan málimet berilip, qýyrshaq teatrynyń kúshimen «Meniń atym Qoja» fılminen úzindi kórsetildi. Kúresti serik etken oqýshylarymyzǵa sheberlik saǵatyn ótkizgen balýan qonaqkáde jasaýdy da umytpady.

    Shákirtterimiz ánnen shashý shashyp, 7 synyp oqýshysy Shyńǵys Toqanov óz arnaýyn júrekjardy óleń joldarymen jetkizdi. Sondaı-aq, ónerli oqýshylarymyzdyń qolynan shyqqan balýannyń portreti salynǵan sýret estelikke tartý etildi. Shara estelik fotoǵa túsýmen qorytyndylandy.

    Pikir jazý

    Your email address will not be published. Required fields are marked *

    *