SportPress.kz قازاقستان سپورت جاڭالىقتارى
سەمەي قالاسىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىندە مۇعالىمدەر مەن وقۋشىلار ەلىمىزدىڭ ماقتانىشى، داڭقتى بالۋان ايبەك نۇعىماروۆپەن كەزدەستى، دەپ حابارلادى سەمەي قالاسىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ ءباسپاسوز قىزمەتى
شارانىڭ وتۋىنە جاتاقحانا تاربيەشىلەرى ۇيىتقى بولدى. قازاق كۇرەسىنىڭ مايتالمانى، ەلىمىزدىڭ، ازيانىڭ بىرنەشە دۇركىن چەمپيونى، «قازاقستان بارىسى»، «ەۋرازيا بارىسى»، «الەم بارىسى» سىندى باسەكەلەردىڭ جەڭىمپازى ءارى جۇلدەگەرىمەن جۇزدەسۋ اسىرەسە، وقۋشىلار ءۇشىن اسەرلى ءوتتى.
–كەزدەسۋدى ۇيىمداستىرۋ كوپتەن ويىمىزدا جۇرگەن. ارىپتەسىم گۇلنار جومارتقىزى ەكەۋمىز اقىلداسا كەلىپ، ءبىر وزگەشە جۇزدەسۋ بولسىن دەگەن ويمەن ەركىن سۇحبات جاساۋدى ۇيعاردىق. ەل نامىسىن ابىرويمەن قورعاپ، حالقىنىڭ سۇيىكتى ۇلىنا اينالعان بالۋانمەن كەزدەسۋدەگى ماقساتىمىز – وسكەلەڭ ۇرپاققا ايبەك نۇعىماروۆتىڭ ءومىر جولىن ونەگە ەتۋ. سول ارقىلى سالاماتتى ءومىر سالتىن ناسيحاتتاۋ، شاكىرتتەرىمىزدى تۋعان ەلگە قىزمەت ەتۋگە تاربيەلەۋ، – دەيدى شارانى ۇيىمداستىرۋشىلاردىڭ ءبىرى، جاتاقحانا تاربيەشىسى ايجان مۇقاتوۆا.
باسقوسۋ باستالماس بۇرىن بالۋانعا مەكتەپ جاتاقحاناسىنىڭ بۇگىنگى تىنىس-تىرشىلىگى تانىستىرىلدى. جاتاقحانانىڭ شارۋاسىن مەڭگەرۋشى قالجان ومارباەۆا ءتۇسىندىرىپ، شاكىرتتەرىمىزدىڭ «ەكىنشى ءۇيى» جايلى مول ماعلۇمات بەردى. بالالار ءۇشىن جاسالىپ جاتقان قامقورلىققا ءوز تاڭدانىسىن جاسىرا الماعان قوناعىمىز ۇلگى الۋعا بولاتىن دۇنيەنىڭ كوپ ەكەندىگىن اتاپ ءوتتى.
–مەنى كەزدەسۋگە شاقىرۋشىلار كوپ. شاما كەلگەنشە مەسەلدەرىن قايتارماي بارۋعا تىرىسامىن. سونىڭ ىشىندە سىزدەردىڭ مەكتەپتەرىڭىزدىڭ شاقىرۋىن ارقاشان ىستىق ىقىلاسپەن قابىلدايمىن. ويتكەنى، سىزدەردە ءبىلىم الاتىن بالالاردىڭ دەنى ەرتەڭگى ەلىمىزدىڭ ءار سالادا دامۋىنا ۇلەس قوساتىن العىر شاكىرتتەر. مەن بۇگىنگى كەزدەسۋىمدە ءىنى-قارىنداستارىما اعالىق اقىلىمدى ايتىپ، بولاشاق ومىرلەرىنە ەرىك-جىگەر بەرسەم دەيمىن. ەلىمىزدەگى ءاربىر جاس وتانىمىز ءۇشىن ايانباي ەڭبەك ەتۋ كەرەك دەپ بىلەمىن، – دەيدى ايبەك سەرىكبول ۇلى ءوز سوزىندە.
«قۇرمەت» وردەنىنىڭ يەگەرى، قازاق كۇرەسىنەن قازاقستان رەسپۋبليكاسىنىڭ ەڭبەگى سىڭگەن سپورت شەبەرى اتانعان قوناعىمىزبەن جۇزدەسۋ شىنىمەن قىزىققا تولى بولدى. بالۋان جايلى وقۋشىلارىمىزدىڭ زەرتتەۋ جۇمىستارىنان مالىمەت بەرىلىپ، قۋىرشاق تەاترىنىڭ كۇشىمەن «مەنىڭ اتىم قوجا» فيلمىنەن ءۇزىندى كورسەتىلدى. كۇرەستى سەرىك ەتكەن وقۋشىلارىمىزعا شەبەرلىك ساعاتىن وتكىزگەن بالۋان قوناقكادە جاساۋدى دا ۇمىتپادى.
شاكىرتتەرىمىز اننەن شاشۋ شاشىپ، 7 سىنىپ وقۋشىسى شىڭعىس توقانوۆ ءوز ارناۋىن جۇرەكجاردى ولەڭ جولدارىمەن جەتكىزدى. سونداي-اق، ونەرلى وقۋشىلارىمىزدىڭ قولىنان شىققان بالۋاننىڭ پورترەتى سالىنعان سۋرەت ەستەلىككە تارتۋ ەتىلدى. شارا ەستەلىك فوتوعا تۇسۋمەن قورىتىندىلاندى.
