SportPress.kz Qazaqstan sport jańalyqtary
Stýdentterdiń sporttyq sheberligi men jeńiske degen jigerin synaıtyn doda shyǵystyń ǵulama ǵalymy Ál-Farabıdiń 1150 jyldyǵyna arnalyp otyr. Ýnıversıada erler men qyzdar arasyndaǵy qysqy Prezıdenttik kópsaıystan bastaldy, dep habarlady Bilim jáne ǵylym mınıstrligi «Ulttyq ǵylymı-praktıkalyq dene tárbıesi ortalyǵynyń» baspasóz qyzmeti.
Onyń saltanatty ashylý rásimine ShQMTÝ rektory Jasulan Shaımardanov, Bilim jáne ǵylym mınıstrligi «Ulttyq ǵylymı-praktıkalyq dene tárbıesi ortalyǵynyń» bas dırektory Sadyq Mustafaev, Qazaqstan Ulttyq stýdenttik sport odaǵynyń bas hatshysy Jasnur Aqedilov, bas tóreshi Bolatbek Dúsipov qatysyp, sportty janyna serik etken jastarǵa sáttilik tiledi.
– Shyǵystyń kıeli jerine, kendi Altaı júregi О́skemen qalasyna qosh keldińizder. Bilimdi jastar jáne sportshylarymyz árqashanda eldiń abyroıyn asqaqtatyp, álemdik arenadaǵy bedelin saqtap, nyǵaıtýǵa úles qosyp keledi. Sizder solardyń izin basyp kele jatyrsyzdar. Tek qana jeńis tileımin, biz sizderge jankúıer bolamyz, – dedi ShQMTÝ rektory Jasulan Shaımardanov.
Qazaqstannyń túkpir-túkpirinen jınalǵan stýdentter úsh kún boıy sporttyń birneshe túri boıynsha saıysqa túsedi.
Búgin qatysýshylar shańǵymen jarys jolyna shyqty. Alda áli kúsh gımnastıkasy jáne oq atýdan jarys kútip tur. Ýnıversıada qorytyndysy boıynsha 2021 jyly ótetin XXX qysqy Ýnıversıada oıyndaryna sportshylar irikteletin bolady.
