Golovkın men Alvares jekpe-jegi teń aıaqtaldy

Qazaqstandyq kásipqoı boksshy Gennadıı Golovkın (37-0-1, 33 KO) men meksıkalyq Saýl Alvares (49-1-2, 34 KO) AQSh-tyń Las-Vegas qalasyndaǵy T-Mobile Arena-da ótken jekpe-jek teń aıaqtaldy.

Bastapqy raýndtarda «Kanelo» belsendilik tanytyp, Golovkınge birneshe soqqysyn dartyta bildi. Degenmen, djeb soqqylary Alvareske dóp tıdi.

Úshinshi-tórtinshi raýndta Gennadıı jyldamdyǵyn arttyryp, jekpe-jekke kirise bastady. Alvarestiń osal tusyn taýyp, búıirden soqqylaýǵa tyrystyp baqty.

Besinshi raýndta Golovkın shabýyldy údete túsip, «Kanelony» buryshqa tyqsyryp, birneshe anyq soqqy jasady. Bul raýndta Alvares tek qorǵanyspen boldy. Gennadıı bul úsh mınýtty óz paıdasyna sheshti.

Altynshy raýndta Saýl biraz sharshaǵandaı kórindi. Buryshtan-buryshqa qashyp, qorǵanyspen júrdi. Biraq, reti kelgende Golovkınge soqqy jasap júrdi.

Aıqastyń naǵyz qyzǵan shaǵy segizinshi-toǵyzynshy raýndta boldy. Bul shaqta Golovkın qarsylasyn qyspaqqa alyp, meksıkalyq boksshyǵa soqqy jasaýǵa esh múmkindik bermedi. Bul eki raýndta da otandasymyz upaı sanymen basym boldy.

Kezdesý aıaqtalyp jatqanyn sezgen qos boksshy 10-raýndta upaı alý úshin kezek-kezek soqqy almasty. Ekeýi de alǵa umtylyp, birinshi nómirmen jumys isteýge tyrysqan boldy. Ashyq aıqastan qashqan joq.

Al sońǵy 12-raýndta Alvares birinshi raýndtaǵy basymdylyǵyn qaıta qolǵa aldy. Biraq, sońǵy úsh mınýttyń ortasyna kelgende «Kanelo» sharshap qaldy. Golovkındi qaıta-qaıta qushaqtap, ýaqyt sozýmen boldy. Osy arqyly ol Golovkınge soqqy jasaýǵa múmkindik bermedi. Bul da onyń taktıkalyq júrisi edi.

Osylaısha, kezdesý qorytyndysy tóreshilerdiń sheshimimen aıaqtaldy. Birinshi tóreshi jeńisti Alvareske berse, ekinshisi otandasymyzdy jeńiske jetti dep eseptegen eken. Al úshinshi tóreshi kezdesýdi teń degen sheshim shyǵardy.

Aıta keteıik, jekpe-jek Las-Vegastaǵy T-Mobile arenasynda ótti. Aıqasty kórý úshin zalǵa 22358 adam jınalyp, jańa rekord ornady.