• Қазақ
  •   
  • Qazaq
  •   
  • قازاق
  •   
  • Рус
  •   

    ازيا چەمپيوناتى: قازاقستان قۇراماسىندا 21 مەدال بار

    بوكستان قازاقستان ۇلتتىق قۇراما كومانداسى يوردانيانىڭ استاناسى اممان قالاسىندا ءوتىپ جاتقان XXXII ازيا چەمپيوناتىنان كەم دەگەندە 21 جۇلدەمەن ورالادى.

    كەشە، ازيا چەمپيوناتىنىڭ سەگىزىنشى كۇنى رينگكە شىققان بارلىق بوكسشىمىز جارتىلاي فينالعا جولداما الدى.

    اۋەلى ۇلتتىق قۇرامانىڭ كاپيتانى اسلانبەك شىمبەرگەنوۆ ۇندىستاندىق ءساچيندى ەش قيىندىقسىز تىزە بۇكتىردى. ونىڭ ءىزىن الا نۇرقانات رايىس قىرعىزستاندىق ساگىن ساتىبالدىۋلۋمەن كەزدەسىپ، ەكىنشى راۋندتا جەڭىسكە جەتتى. اعايىندى ايبەك پەن نۇربەك ورالبايلار دا جەڭىستى سەريانى ءساتتى جالعاستىردى. نۇربەك تايلاندتىق دجوندجوحو ۆيراپۋندى 3:1 ەسەبىمەن ۇتسا، ايبەك ۇندىستاندىق ناۆين كۋماردى ەكى رەت نوكداۋنعا ءتۇسىرىپ، تەحنيكالىق نوكاۋتپەن كەلەسى اينالىمعا شىقتى.

    اممان قالاسىندا العاش رەت ونەر كورسەتكەن ساعىندىق توعامباي (86 كگ) دا تاجىكستاندىق ناۆرۋز دجافوەۆتى ويسىراتا ۇتىپ، كەمى قولاعا قولا جۇلدەنى الاتىن بولادى. اۋەسقوي بوكسقا قايتا ورالعان اسا اۋىر سالماقتاعى قامشىبەك قوڭقاباەۆ وڭتۇستىك كورەيالىق دو حيون كيمدى ۇتتى. قامشىبەك وسى جەڭىسىن اناسىنىڭ تۋعان كۇنىنە ارنادى.

    كەشكى سەسسيادا ۇلتتىق قۇراما ساپىنان سىنعا تۇسكەن  ەكى دۇركىن الەم چەمپيونى نازىم قىزايباي تورەشىلەر شەشىمىمەن موڭعوليالىق بالسانگين مەنگەنساراننان باسىم ءتۇستى. ەسەپ – 3:2.

    قايرات ساتجانوۆ جاتتىقتىراتىن ەرلەر قۇراماسىنداعى 13 بوكسشىنىڭ 12-ءسى جارتىلاي فيناعا جولداما السا، وزبەكستاننىڭ 10 بوكسشىسى ½ فينالعا شىقتى.

    ال ايەلدەر باسەكەسىندە دە قازاقستان جەكە دارا كوش باستاپ كەلە جاتىر. وسى جولى 9 بوكسشىمىز جارتىلاي فينالدا ونەر كورسەتەدى.

    ازيا چەمپيوناتىنىڭ جارتىلاي فينالى 9-10 قاراشادا وتەدى. فينال 11-12 قاراشادا بولادى.

     

    داستان كەنجالين،

    استانا

    فوتو: ايان تولەگەن

     

    پىكىر جازۋ

    Your email address will not be published. Required fields are marked *

    *