Sensaııa: Marokko jartylaı fınalǵa shyqty

Fýtboldan Katarda ótip jatqan álem chempıonatynyń jartylaı fınalyna shyqqan taǵy bir komanda anyqtaldy. Ol — Marokko quramasy.

Shırek fınalda Marokkonyń jasaǵy Portýgalııa quramasyn 1: 0 esebimen jeńip, afrıkalyq komandalardyń arasynda alǵash ret ½ fınalǵa joldama aldy. Oıyndaǵy jalǵyz goldy 42-mınýtta Iýssef En-Nesırı saldy. Ol kezekti qarsy shabýyl kezinde dopty baspen uryp qaqpanyń toryna dál túsirdi. Onyń týra soqqan dobyn qaqpashy Dıogo Koshta qaıtara almady.

Komandalar myna quramda alańǵa shyqty:

Marokko: Býný – Attııat, El Iamık, Saıss (Darı, 58), Hakımı – Amalla (Keddıra, 65), Amrabat, Ýnahı – Býfal (Abýhlıal, 81), En-Nesırı (Banýn, 65), Zıesh (Jabran, 81)

Portýgalııa: Koshta – Gerreırý (Kanselý, 51), Pepe, Dıash, Dalot (Orta, 79) – Otavıo (Vıtınıa, 69), Nevesh (Ronaldý, 52), B. Sılva – Felısh, Ramýsh (Leaý, 69), Fernandesh.

Marokkolyqtar osy jeńisi arqyly Afrıka qurlyǵynan álem chempıonatynyń jartylaı fınalyna buryn-sońdy shyqqan eń alǵashqy qurama bolyp otyr.

Kezdesýde portýgal forvardy Krıshtıaný Ronaldý qurama sapyndaǵy óziniń 196-matchyn ótkizdi. Osy arqyly tarıhı rekordty jańartýǵa jaqyndady. Qazir ol bul kórsetkish jóninen Kýveıt quramasynyń oıynshysy Bader ál-Mýtavamen teńesti.

Marokko quramasy buǵan deıin, 1/8 fınaldyq matchta Ispanııa quramasymen 0:0 esebimen teń oınap, matchtan keıingi penaltıler serııasynda 3:0 esebimen jeńiske jetken edi. Al Portýgalııa sol joly Shveıarııa quramasyn 6:1 etip eńsiretip jeńgen bolatyn.

Taǵy bir aıta ketetin jaıt, Marokko jáne Portýgalııa quramalary buǵan deıin álem chempıonattarynda eki ret kezdesken. Onyń birinshisi 1986 jyly ótip, afrıkalyqtar irikteý tobynda qarsylastaryn 3:1 esebimen utyp ketken. Al 2018 jyly oryn alǵan ekinshi ushyrasýda eýropalyqtar toptyq saıysta básekelesterin 1:0 etip tize búktirgen.

Dastan KENJALIN,

ASTANA