Álem kýbogynda Qazaqstan rekordy tirkeldi

Almatyda short-trekten Álem kýbogynyń úshinshi kezeńi aıaqtaldy.

Sońǵy jarys kúni erler men áıelder jekeleı synda 500, 1500 metr men komandalyq estafetanyń jeńimpazdary men júldegerlerin anyqtady.

Denıs Nıkısha 500 metrge jarysta kúmis medal jeńip aldy. Bul bıylǵy Álem kýbogynyń úsh kezeńinde qazaqstandyq short-trekshiler qol jetkizgen 5-medal.

Abzal Ájiǵalıev 3-oryn (500 m, V fınaly). Sanjar Janysov óz tobynda 5-oryn (500 m, V fınaly). Olga Tıhonova 6-oryn, Alına Ajǵalıeva 7-oryn, Madına Janbosynova 8-oryn (1500 m, jartylaı fınal). Bul qashyqtyqta belgııalyq Hanne Desmet jeńimpaz atandy. Kúmis medaldi kanadalyq Kortnı Saronyń, qola júldeni germanııalyq Anna Zaıdel aldy. Iana Han óz tobynda 4-orynǵa (500 m, shırek fınal) shyqty. Ol búgin 500 metrde Qazaqstan rekordyn tirkedi (43.355 sekýnd).

Ádil Ǵalıahmetov 1-orynnan, Erkebulan Shamýhanov 2-orynnan, Nurtilek Qajǵalı 4-orynnan (1500 metrde V fınaly) kórindi. Munda koreıalyq Chjı Von Park pen Gıon Hvan Hon altyn men kúmis júldeni qorjynǵa salsa, kanadalyq Paskal Dıon úshtikti túıindedi.

Komandalyq estafetada erler quramasy V tobynda 2-oryn alsa, áıelder (V fınaly) 4-satyǵa turaqtady. Bul eki baǵdarlamada Kanada quramasynyń sportshylary eshkimge des bergen joq.

Kelesi 4-kezeń de 16-18 jeltoqsan aralyǵynda Almaty qalasynda ótedi.

Dastan KENJALIN,

ASTANA