Samboshy Ramazan Mamaev — álem chempıony

Mańǵystaý oblysynda sońǵy jyldary sambo jáne dzıýdo kúresteri erekshe qarqynmen damý ústinde. Ásirese, «Jas batyr» sport mektebiniń dırektory Manarbek Bısekenov  bastaǵan oblys samboshylary men dzıýdoshylary kúrestiń osy túrlerin damytýǵa bar úlesterin qosyp, bir jaǵadan bas, bir jeńnen qol shyǵaryp, eńbek etýde.

Mińe, sol eńbek óziniń alǵashqy jemisin berdi. Búgin Serbııanyń Novı-Sad qalasynda ótip jatqan sambodan jastar arasyndaǵy álem chempıonatynda mańǵystaýlyq samboshy Ramazan Mamaev – Mańǵystaý oblysy tarıhynda tuńǵysh ret álem chempıony atandy. Qazaq eliniń samboshylary jastar arasynda sońǵy 7 jylda álem birinshilikterinen altyn júldeni ala almaı júrgen bolatyn. Ramazan el úmitin aqtady.

Ramazan 62 kg salmaqta alǵashqy beldesýinde gollandııalyq palýandy utsa, ekinshi beldesýde bolgar jigitin qapy qaldyrdy. Fınalǵa shyǵar jolda tájikti jarys jolynan shyǵaryp, fınalda mońǵol palýanynan basym tústi. Sóıtip, óziniń álem chempıonatyndaǵy alǵashqy altyn júldesin jeńip aldy.

Ramazan buǵan deıin dzıýdo kúresinen Qazaqstan Respýblıkasynyń sport sheberi atanyp, Azııa jáne Eýropa kýbogynyń ıelengen edi. Sambo kúresinen Qazaqstannyń 3 dúrkin chempıony jáne kýbogynyń ıegeri atanyp, jastar oıyndaryn utyp, Azııa chempıony ataǵyn ıelendi.

«Jas batyr» sport mektebiniń dırektory Manarbek Bısekenov respýblıkalyq «Sport juldyzdary» jýrnalynyń bıylǵy №3 sanynda «Maqsatymyz – Azııa jáne Álem chempıondaryn tárbıelep shyǵarý» dep suhbat bergen bolatyn. Isker basshy, sheber uıymdastyrýshy, bilikti bapker Manarbek Bısekenov sózinde turdy. Ramazan Azııany da, álemdi de baǵyndyrdy. Bul mańǵystaýlyq samboshylar men dzıýdoshylardyń bolashaq jeńisterine bastaıtyn jol dep bilemiz. Endigi meje – Olımp shyńyn baǵyndyrý. Eger, munaıly túbekte sambo men dzıýdoǵa degen kózqaras dál búgingi baǵytta jalǵasa beretin bolsa, ol armanǵa da qol jetkizýge bolady dep bilemiz.

Erteń Serbııa boz kilemine 72 kg salmaqta Jalǵas Qasbaev degen taǵy bir mańǵystaýlyq palýan shyǵady. Ramazannyń jeńisti jolyn Jalǵasymyz jalǵastyryp áketse dep tileıik, aǵaıyn!

Musaǵalı TASQALIEV