كەڭەس راقىشەۆ جاس بوكسشىلارعا قوماقتى سىياقى تابىس ەتتى

بۇگىن الماتى قالاسىندا قازاقستان بوكس فەدەراتسياسىنىڭ پرەزيدەنتى كەڭەس راقىشەۆ بوكسشىلارعا قوماقتى سىياقى تابىس ەتتى.  

ول بىلتىر يسپانيانىڭ اليكانتە قالاسىندا وتكەن جاستار اراسىنداعى الەم چەمپيوناتىن جەڭىپ العان بوكسشىلار مەن جۇلدەگەرلەرگە قوشەمەت كورسەتتى. كەزدەسۋدە جۇلدەگەرلەردىڭ جەكە جاتتىۇ تىرۋشىلارى دا نازاردان تىس قالمادى. بوكسشىلار يمەن ولاردىڭ جاتتىقتىرۋشىلارى 20 ميلليون تەڭگە الدى.

ءبىزدىڭ جاستار قۇراماسى يسپانيادا جاقسى ناتيجە كورسەتتى. مەدالداردىڭ سانى بويىنشا ءۇشىنشى ورىن الدىق. ارادا كوپ ۋاقىت وتسە دە، جاس بوكسشىلارىمىزدى ۇمىتقان جوقپىز. ءبىز جاستارعا سەنىم ارتامىز. بولاشاقتا ولار ۇلتتىق قۇراما بوكسشىلارىنىڭ ورنىن باسادى. اسىرەسە، ايەلدەر بوكسىنداعى ناتيجەلەر ەرەكشە قۋانتادى. بوكس — ءبىزدىڭ ۇلتتىق سپورتىمىزعا اينالدى. قازىر اۋەسقوي بوكستا ءجۇرىپ، اتىڭدى شىعارۋعا بولادى. جاقسى اقشا  تابا الاسىڭ،- دەدى كەڭەس راقىشەۆ.

فەدەراتسيا پرەزيدەنتى الەم چەمپيوندارى ەلينا بازاروۆا (54 كگ) مەن باقىت سەيدىشكە (66 كگ) 3 ملن تەڭگەنىڭ سەرتيفيكاتتارىن بەردى. كۇمىس جۇلدەگەرلەر نۇربەك مۋرسال (67 كگ) مەن داۋلەت تولەمىسوۆ (75 كگ) 1،5 ملن تەڭگەدەن الدى. قولا جۇلدەگەرلەر گۇلناز بورىباەۆا (48 كگ)، اسەم تاڭاتار (63 كگ) مەن 81 كەلىدەن اسا سالماقتاعى اسەل توقتاسىن 1 ملن تەڭگەگە يە بولدى.

چەمپيونداردىڭ جەكە جاتتىقتىرۋشىلارى نۇربوتا سەيىتبەك پەن باعلان وماربەكوۆكە 500 مىڭ تەڭگەدەن بەرىلدى.

داستان كەنجالين،

استانا