رەسەي ورتالىق ازيا فۋتبول اسسوتسياتسياسى چەمپيوناتىنا قاتىسادى

ماۋسىم ايىندا رەسەيدىڭ ۇلتتىق قۇراما كومانداسى تاشكەنت پەن بىشكەك قالاسىندا وتەتىن ورتالىق ازيا فۋتبول اسسوتسياتسياسىنىڭ (CAFA) چەمپيوناتىنا قاتىسادى.

بۇل دودا 9-21 ماۋسىم ارالىعىندا العاش رەت وتەدى. چەمپيوناتتىڭ توپتىق كەزەڭدەگى ماتچتارى وزبەكستان مەن قىرعىزستاندا وتكىزۋ جوسپارلانىپ وتىر.

ال  CAFA ءوزىنىڭ بارلىق التى مۇشەسى – تاجىكستان، يران، وزبەكستان، قىرعىزستان، تۇرىكمەنستان جانە اۋعانستان كوماندالارىنىڭ تۋرنيرگە قاتىساتىندارىن انىقتاپ قويدى.

سونىمەن بىرگە CAFA تۋرنيرگە ازيا ەلدەرى ۇلتتىق قۇراما كومانداسىنىڭ ءبىرىن شاقىرعالى وتىر.

چەمپيوناتقا قاتىساتىن سەگىز كوماندا ءتورت-تورتتەن ەكى توپقا بولىنەدى. ماتچتار ءبىر اينالىمدىق جۇيە بويىنشا وتەدى. ەكى توپتىڭ ءبىرىنشى ورىن العان كوماندالارى ءوزارا فينالدىق ماتچتا كەزدەسەدى. ال توپتاردا ەكىنشى ورىنعا يە بولعان كوماندالار ءۇشىنشى ورىن ءۇشىن تالاسادى.

ۇيىمداستىرۋشىلاردىڭ حابارلاۋىنشا، تۋرنير جولداستىق كەزدەسۋلەر دەڭگەيىندە بولادى. سوندىقتان وعان رەسەي قۇراماسى ەشبىر مىندەتتەمەسىز قاتىسا الادى.

قازىرگى تاڭدا رەسەي كلۋبتارى مەن ۇلتتىق قۇراماسى فيفا مەن ۋەفا تاراپتارىنان سالىنعان سانكتسيالار سالدارىنان بىردە-ءبىر حالىقارالىق تۋرنيرگە قاتىسا الماي وتىر. سول سەبەپتى رفس اتقارۋ كوميتەتى وتكەن جىلدىڭ سوڭىندا ۋەفا-دان ازيا فۋتبول كونفەدەراتسياسىنا ءوتۋ ماسەلەسىمەن اينالىساتىن جۇمىس توبىن قۇردى. بۇل توپ ازياعا اۋىسۋدىڭ ارتىقشىلىعى مەن كەمشىن تۇستارىن زەرتتەيتىن بولادى. وسى ماقساتتا رەسەي ۇلتتىق قۇراماسى  CAFA تۋرنيرىنە قاتىسىپ كورگىسى كەلىپ وتىر.

Central Asian Football Association (CAFA) نەمەسە ورتالىق ازيا فۋتبول اسسوتسياتسياسى – ازيا فۋتبول فەدەراتسياسىنىڭ وسى ايماقتاعى فۋتبولدى باقىلاۋشى بولىمشەسى. وعان اۋعانستان، يران، قىرعىزستان، تاجىكستان، تۇرىكمەنستان جانە وزبەكستان فەدەراتسيالارى كىرەدى. بۇل ۇيىم بۇرىن تاياۋ شىعىس ەلدەرىمەن بىرگە ءبىر اسسوتسياتسيادا بولىپ، كەيىن بىرقاتار اراب ەلدەرى وكىلدەرىمەن كەلىسىمگە كەلە الماعان يراننىڭ باستاماسىمەن قۇرىلعان.

جاڭا فەدەراتسيا 2014 جىلى قۇرىلىپ، 2015 جىلدان جۇمىس ىستەي باستاعان.

داستان كەنجالين،

استانا