ناميب ۋلترامارافون: جەلاياق جۋرناليست ۇزدىك بەستىكتەن كورىندى (فوتو)

بەلگىلى جۋرناليست، كاسىپكەر، بىلتىر اقش-تىڭ نيۋ-يورك قالاسىندا العاش بولىپ وتانداستارىمىزدىڭ اراسىندا التى مەيجور مارافوندى sub 3، ياعني 3 ساعات ىشىندە جۇگىرگەن ەرەنعايىپ قۋاتاي ۇلى افريكانىڭ ناميبيا ەلىندە وتكەن ۋلترامارافونعا قاتىسىپ، ۇزدىك بەستىكتەن كورىندى.

ول سوڭعى رەت ناۋرىز ايىندا پورتۋگاليانىڭ ليسسابون قالاسىندا جالاۋى جەلبىرەگەن Lisbon half marathon-2024 مارافونىنا قاتىسقان بولاتىن. سودان كەيىن افريكانىڭ ناميبيا مەملەكەتىنە بارىپ، تاعى دا باعىن سىناپ كوردى. بۇل جولى مارافونشى جەر-جۇزىندەگى ەڭ ىستىق ءشولدىڭ ءبىرى ناميب شولىندە 57 گرادۋس ىستىقتا 250 شاقىرىمدى جۇگىرىپ، 150-گە جۋىق ادامنىڭ اراسىنان جالپى ەسەپتە جارىستى بەسىنشى بولىپ اياقتادى.

التى كۇندىك الاماندى امان-ەسەن اياقتادىم. جۇمىر جەردەگى ەڭ ەجەلگى جانە ەڭ ىستىق ءشولدىڭ ءبىرى افريكانىڭ ناميب ءشولىن جۇگىرىپ ءوتۋ باقىتى بۇيىردى. 250 شاقىرىمدىق «ءولىم جارىسىنا» 47 ەلدەن 150-گە جۋىق ۋلترامارافونشى قاتىستى. 57 گرادۋس اپتاپ ىستىققا شىداماي ولاردىڭ 20 پايىزى جارىس جولىنان شىعۋعا ءماجبۇر بولدى. التى كۇن ءىشىپ-جەيتىن اس-سۋىڭدى، كورپە-جاستىعىڭدى ارقالاپ جۇگىرۋ ارينە وڭاي بولمادى. ارقاڭداعى ون كەلى جۇك ون تونناداي بولدى.

جالپى ەسەپتە بەسىنشى ورىنعا تۇراقتاپ، اۋەل باستاعى فينيشكە جەتۋ ماقساتىم ارتىعىمەن ورىندالدى، — دەدى ەرەنعايىپ قۋاتاي ۇلى.

مارافونشى كاسىپكەر ءارى جۋرناليست ەرەنعايىپ قۋاتاي ۇلى العاش بولىپ وتانداستارىمىزدىڭ اراسىندا 6 مەيجور مارافوندى sub 3، ياعني 3 ساعات ىشىندە جۇگىرگەن ازامات. ول بوستون، چيكاگو، نيۋ-يورك، بەرلين، لوندون، توكيو مارافوندارىندا، ياعني، 6 مەيجوردى جۇگىرگەن 6 ادامنىڭ ءبىرى.  سوڭعى رەت ول جوعارى اتاپ وتكەنىمىزدەي، ناۋرىز ايىندا پورتۋگاليانىڭ ليسسابون قالاسىندا جالاۋى جەلبىرەگەن Lisbon half marathon-2024 مارافونىندا مارەگە 1 ساعات 21 مينۋت 53 سەكۋندتتا جەتتى. ونىڭ ايتۋىنشا، ناتيجە جامان بولعان جوق. جالپى، ەۋروپادا ليسسابوننان باسقا تاعى 5 جارتى مارافون بار. ولار – پراگا، بەرلين، كارديفف، كوپەنگاگەن جانە ۆالەنتسيا.

داستان كەنجالين،

استانا