تاۋ تۇلعا اعامىزدىڭ ءتۋرنيرى (فوتو)

الماتىدا اتى الەمگە ءماشھۇر بالۋان، وليمپيادا جانە الەم چەمپيونى، «ەڭبەك ەرى» اتاعىنىڭ يەگەرى جاقسىلىق ۇشكەمپىروۆتى ەسكە الۋعا ارنالعان جاسوسپىرىمدەر اراسىندا رەسپۋبليكالىق ءتۋرنيردىڭ جالاۋى كوتەرىلدى.

جاقسىلىق اعامىزدى ارتىق ايتقانىمىز ەمەس، جاس تا كارى دە جاقسى كورۋشى ەدى. ويتكەنى، جاكەڭ مارقۇم جەتىمنىڭ باسىن سيپاپ، جەسىرگە جاردەم، ەلىنە دەمەۋ بولعان، حالىق ءسۇيىپ قۇرمەتتەيتىن ەرەكشى تۇلعا بولعانىن جاقسى بىلەمىز.

الىسقا بارماي-اق ءوز شارۋاشىلىعىن دوڭگەلەتىپ جاتقان مىڭباي اۋىلىن قالاي كوركەيتكەنىن اۋىل حالقى ساعىنا ىستىق ىقىلاسپەن ايتىپ وتىرادى. جالپى، جاقسىلىق اعامىزدىڭ شاراپاتىن كورمەگەن ادام كەمدە كەم شىعار. ادامدار اراسىندا اللانىڭ نۇرى قونعان، جاراتىلىسى ەرەك قايىرىمدى، مەيىرىمدى ءارى جومارت ادام كىم دەسە، جاقسىلىق اعانى كورسەتەر ەدىك.

ءيا، اللانىڭ ىسىنە شارا جوق، سۇم اجال اسقارتاۋداي اعامىزدى ورتامىزدان سۋىرىپ الىپ كەتتى. «ارتىندا بار اعارار» دەگەن اسىل اعامىزدىڭ سوڭىنان ەرگەن جەڭىس، جاندوس، ەلدوس سىندى ءۇش ۇلى اكەسىنىڭ اكە رۋحىن جاڭعىرتىپ يگىلىكتى ءىس شارا، جارىستاردى جاراسىممەن وتكىزىپ جالعاستىرىپ كەلەدى. «

«ورنىندا بار وڭالار» دەگەن وسى بولار. بۇگىنگى ارداقتى اعامىزدى ەسكە الۋعا ارنالعان الامان تۋرنيردە كىلەم تورىندە ايماقتارىنا اتى شىققان بوزبالا بوتا بالۋاندار جەڭىس ءۇشىن جانىن سالدى. ءتور توسىنەن ورىن العان قۇرمەتتى قوناقتاردىڭ اراسىندا وليمپيادا چەمپيوندارى ەرماحان يبرايموۆ، يۋري مەلنيچەنكو مەن بەلگىلى بىلعارى قولعاپ شەبەرى، كسروچەمپيونى كارىمجان ءابدىراحمانوۆ ءتۋرنيردىڭ اشىلۋ سالتاناتىندا بوي كورسەتىپ، جارىسقا قاتىستى اقتىلەكتەرىن جەتكىزدى. سونىمەن قاتار قوعام قايراتكەرى، گەنەرال ءسات توقپاقباەۆ، جاقسىلىق اعانىڭ قارىنداسى شىرىنكۇل ۇشكەمپىرقىزى امىراليەۆا ورتاعى شىعىپ، تۋرنيرگە قاتىسۋشىلارعا اق باتالارىن بەردى.

ايتۋلى جارىسقا ارنايى شاقىرىلعان «جەلتوقسان اقيقاتى» رەسپۋبليكالىق قوعامدىق بىرلەستىگىنىڭ توراعاسى بولات توقتاباي ۇلى قۇرىمباەۆ ۇيىمنىڭ اتىنان اتاقتى جاقسىلىق اعامىزدىڭ ۇلى ەلدوسقا «ۇلت پاتريوتى» اتتى وردەندى قۇرمەتپەن ماراپاتتاپ، العىس حاتتى تابىس ەتتى.

ابىز دا ايشىقتى اعامىزدىڭ تالاي رەت شاراپاتىن الىپ اماندىعىن سۇراستىرىپ جۇرەتىن ءىنىسى رەتىندە جۋىردا عانا جارىققا شىققان «قازاق كۇرەسىنىڭ قارا نارلارى» اتتى قازىنالى، قۇندى كىتابىمدى ۇلى ەلدوسقا مەن دە تارتۋ ەتتىم. ويتكەنى، كىتاپتا جاقسىلىق اعامىزدان قازاق كۇرەسى تۋرالى جازىپ العان كولەمدى سۇحبات ماقالام بار ەدى. سوندىقتان بۇل كىتاپتى تابىس ەتۋدىڭ ءوز ورنى بار ەدى دەپ ويلاعان ەدىم.

حوش، سونىمەن اتى ايگىلى تاۋ تۇلعا اعامىزدىڭ تۋرنيرىندە اس بەرىلىپ، قۇران وقىلدى. ەندى بوزكىلەمگە شىققان بوتا بالۋاندار جاقىلىق اتالارىنداي وليمپيادا جارىسىندا توپ جارۋ ءۇشىن بۇگىنگى تۋرنيردە بارىن سالىپ كوپتىڭ العىس، باتاسىن الۋعا تىرىسارى انىق.

جاقسىلىق اعامىز كوزى تىرىسىندە: «شىركىن، مەنىڭ ءىزىمدى باساتىن وليمپيادانى جەڭەتىن ءبىر قازاقتىڭ قارا دومالىق بالاسى شىقسا ەكەن»، دەپ ارمانداپ ءجۇرۋشى ەدى. كىم ءبىلسىن، اعامىزدىڭ ارمانى ورىندالىپ، وسى قارا دومالاقتاردىڭ اراسىنان وليمپيادا چەمپيونى شىعىپ قالۋى ابدەن مۇمكىن شىعار. اللا ءناسىپ ەتىپ، ول كۇننىڭ دە اۋىلى الىس ەمەس دەگەن ۇمىتتەمىز.

اقىن ورداباي ۇلى،

فوتو: بولات ەسىركەپوۆ

الماتى