Taý tulǵa aǵamyzdyń týrnıri (FOTO)

Almatyda aty álemge máshhúr balýan, Olımpıada jáne álem chempıony, «Eńbek eri» ataǵynyń ıegeri Jaqsylyq Úshkempirovty eske alýǵa arnalǵan jasóspirimder arasynda respýblıkalyq týrnırdiń jalaýy kóterildi.

Jaqsylyq aǵamyzdy artyq aıtqanymyz emes, jas ta kári de jaqsy kórýshi edi. О́ıtkeni, Jákeń marqum jetimniń basyn sıpap, jesirge járdem, eline demeý bolǵan, halyq súıip qurmetteıtin erekshi tulǵa bolǵanyn jaqsy bilemiz.

Alysqa barmaı-aq óz sharýashylyǵyn dóńgeletip jatqan Myńbaı aýylyn qalaı kórkeıtkenin aýyl halqy saǵyna ystyq yqylaspen aıtyp otyrady. Jalpy, Jaqsylyq aǵamyzdyń sharapatyn kórmegen adam kemde kem shyǵar. Adamdar arasynda Allanyń nury qonǵan, jaratylysy erek qaıyrymdy, meıirimdi ári jomart adam kim dese, Jaqsylyq aǵany kórseter edik.

Iá, Allanyń isine shara joq, sum ajal asqartaýdaı aǵamyzdy ortamyzdan sýyryp alyp ketti. «Artynda bar aǵarar» degen asyl aǵamyzdyń sońynan ergen Jeńis, Jandos, Eldos syndy úsh uly ákesiniń áke rýhyn jańǵyrtyp ıgilikti is shara, jarystardy jarasymmen ótkizip jalǵastyryp keledi. «

«Ornynda bar ońalar» degen osy bolar. Búgingi ardaqty aǵamyzdy eske alýǵa arnalǵan alaman týrnırde kilem tórinde aımaqtaryna aty shyqqan bozbala bota balýandar jeńis úshin janyn saldy. Tór tósinen oryn alǵan qurmetti qonaqtardyń arasynda Olımpıada chempıondary Ermahan Ibraımov, Iýrıı Melnıchenko men belgili bylǵary qolǵap sheberi, KSROchempıony Kárimjan Ábdirahmanov týrnırdiń ashylý saltanatynda boı kórsetip, jarysqa qatysty aqtilekterin jetkizdi. Sonymen qatar qoǵam qaıratkeri, general Sát Toqpaqbaev, Jaqsylyq aǵanyń qaryndasy Shyrynkúl Úshkempirqyzy Ámirálıeva ortaǵy shyǵyp, týrnırge qatysýshylarǵa aq batalaryn berdi.

Aıtýly jarysqa arnaıy shaqyrylǵan «Jeltoqsan aqıqaty» respýblıkalyq qoǵamdyq birlestiginiń tóraǵasy Bolat Toqtabaıuly Qurymbaev uıymnyń atynan ataqty Jaqsylyq aǵamyzdyń uly Eldosqa «Ult patrıoty» atty ordendi qurmetpen marapattap, alǵys hatty tabys etti.

Abyz da aıshyqty aǵamyzdyń talaı ret sharapatyn alyp amandyǵyn surastyryp júretin inisi retinde jýyrda ǵana jaryqqa shyqqan «Qazaq kúresiniń qara narlary» atty qazynaly, qundy kitabymdy uly Eldosqa men de tartý ettim. О́ıtkeni, kitapta Jaqsylyq aǵamyzdan qazaq kúresi týraly jazyp alǵan kólemdi suhbat maqalam bar edi. Sondyqtan bul kitapty tabys etýdiń óz orny bar edi dep oılaǵan edim.

Hosh, sonymen aty áıgili taý tulǵa aǵamyzdyń týrnırinde as berilip, quran oqyldy. Endi bozkilemge shyqqan bota balýandar Jaqylyq atalaryndaı Olımpıada jarysynda top jarý úshin búgingi týrnırde baryn salyp kóptiń alǵys, batasyn alýǵa tyrysary anyq.

Jaqsylyq aǵamyz kózi tirisinde: «Shirkin, meniń izimdi basatyn Olımpıadany jeńetin bir qazaqtyń qara domalyq balasy shyqsa eken», dep armandap júrýshi edi. Kim bilsin, aǵamyzdyń armany oryndalyp, osy qara domalaqtardyń arasynan Olımpıada chempıony shyǵyp qalýy ábden múmkin shyǵar. Alla násip etip, ol kúnniń de aýyly alys emes degen úmittemiz.

Aqyn ORDABAIULY,

Foto: Bolat ESIRKEPOV

ALMATY