رىباكينا مايامي ماستەرس ءتۋرنيرىنىڭ ءتورتىنشى اينالىمىنا شىقتى

قازاقستاننىڭ ءبىرىنشى، الەمنىڭ 7-راكەتكاسى ەلەنا رىباكينا اقش-تا ءوتىپ جاتقان مايامي WTA 1000 ءتۋرنيرىنىڭ ءتورتىنشى اينالىمىنا شىقتى.

رىباكينا ءۇشىنشى اينالىمدا الەمنىڭ بۇرىنعى ەكىنشى راكەتكاسى، قازىر دۇنيەجۇزىلىك رەيتينگتە 29-ورىندا تۇرعان يسپانيالىق پاۋلا بادوسامەن كەزدەستى.

ول بادوسانى ءوزى جەڭىمپاز اتانعان ينديان-ۋەللس ماستەرس جارىسىندا 6:3، 7:5 ەسەبىمەن ۇتقان بولاتىن. ال بۇل جولى ءبىرىنشى پارتيادا قارسىلاستار باستاپقىدا قوس-قوستان برەيك الماسقان ەدى. ەسەپ 3:3 بولعان كەزدە بادوسا تاعى ءبىر برەيك جاساپ، العا شىقتى. سوسىن سەتتى تاعى ءبىر برەيكپەن ءبىتىردى. ەسەپ – 6:3.

ەكىنشى سەتتە پاۋلا بادوسا برەيكپەن العا شىقتى. ەسەپ – 4:2. دەگەنمەن ەلەنا تارازى باسىن تەڭەستىرە الدى. سوسىن ەسەپ 5:4 بولىپ، رىباكينا دوپ بەرگەندە، يسپانيالىق تەننيسشى ماتچبولىن پايدالانا المادى. بۇدان كەيىن ەلەنا قاتارىنان 3 گەيمدى ءوز پايداسىنا شەشتى. ەسەپ  – 7:5.

ءۇشىنشى، شەشۋشى پارتيادا ەسەپ 3:3 بولعان كەزدە رىباكينا برەيك جاساي الدى. اقىرى ماتچتى تاعى ءبىر برەيكپەن تۇيىندەدى. ەسەپ – 6:3.

2،5 ساعاتتان اسا ۋاقىتقا سوزىلعان تارتىستى باسەكە بارىسىندا ەلەنا رىباكينا 12 ەيس جاساپ، 15 برەيك-پوينتتىڭ التاۋىن پايدالاندى. قارسىلاسى 4 ەيس، 5 برەيكپەن (15 برەيك-پوينت) كوزگە ءتۇستى.

وسىلايشا، ەلەنا قاتارىنان 10-جەڭىسىنە جەتتى.

ەندى رىباكينا جۇلدە قورى 8،8 ملن دوللارعا باعالانعان ماستەرس دوداسىنىڭ شيرەك فينالىنا شىعۋ ءۇشىن الەمنىڭ 39-راكەتكاسى، بەلگيالىق ەليزا مەرتەنس نەمەسە رەيتينگتە 41-ساتىداعى حورۆاتيالىق پەترا ءمارتيچتىڭ بىرەۋىمەن تالاسادى.

ەركەعالي بەيسەنوۆ،

استانا