پارادزيۋدودان قازاقستان قۇراماسى ازيا چەمپيونى اتاندى

پارادزيۋدودان قازاقستاننىڭ ەرلەر جانە ايەلدەر قۇراماسى ازيا چەمپيوناتىنىڭ كوماندالىق جارىسىندا توپ جاردى. اينالمالى جۇيە بويىنشا وتكەن بەلدەسۋدە ەل قۇرامالارى قارسىلاس شاق كەلتىرمەي، ازيا چەمپيونى اتاندى.

قازاقستان پارادزيۋدو فەدەراتسياسىنىڭ حابارلاۋىنشا، قازاقستان ايەلدەر قۇراماسى فينالدا وزبەكستان كومانداسىن 3:1 ەسەبىمەن جەڭدى. الفيا تىلەكقابىل، اقمارال ناۋاتبەك جانە دينارا كۋجۋلوۆا قۇراماعا جەڭىس سىيلادى.

ال وزبەكستان قۇراماسى ەكىنشى ورىنعا يە بولسا، ءۇندىستان سپورتشىلارى ۇزدىك ۇشتىكتى قورىتىندىلادى.

قازاقستان ءۇشىن كوماندالىق جارىستاعى شەشۋشى بەلدەسۋ وزبەكستان قۇراماسىنا قارسى ءوتتى. پارادزيۋدو بويىنشا الەمدە مىقتى ەل بولىپ سانالاتىن وزبەكستاندى قازاقستاندىق سپورتشىلار 4:0 ەسەبىمەن ايقىن باسىمدىقپەن ۇتتى.

وسى كەزدەسۋدە ەڭ تارتىستى بەلدەسۋ ولجاس ورازالى مەن توكيو پلاراليمپياداسىنىڭ چەمپيونى فەرۋز سايدوۆ اراسىندا ءوتتى.

بەلدەسۋ باسىندا فەرۋز سايدوۆ ءبىرىنشى ۆازاري ۇپايىن ەنشىلەگەن. دەسە دە، نەگىزگى ۋاقىتتا وتانداسىمىز ءتيىمدى ءادىس قولدانىپ، ەسەپتى تەڭەستىرىپ ۇلگەردى. قوس بالۋاننىڭ كۇرەسى قوسىمشا ۋاقىتقا (گولدەن سكور) دەيىن جالعاستى. قوسىمشا ۋاقىتتا ولجاس ورازالى ۇلىنىڭ فەرۋز سايدوۆقا قولدانعان ءادىسى ناتيجەلى شىعىپ، قازاقستان قۇراماسى جەڭىسكە جەتتى.

فەرۋز سايدوۆ توكيودا وتكەن پاراليمپيادا ويىندارىنىڭ فينالىندا وتانداسىمىز داۋلەت تەمىرجاندى ۇتقان بولاتىن. بۇگىن ازيا چەمپيوناتىندا ولجاس كوماندالاسى داۋلەتتىڭ ەسەسىن قايتارىپ ۇلگەردى.

وسى كەزدەسۋدە ەرعالي شامەي، جانبوتا امانجول، ەرلان وتەپوۆ تە ءوز كەزەگىندە قارسىلاستارىنان باسىم ءتۇستى.

جارىس اينالمالى جۇيەدە وتكەندىكتەن ەل قۇراماسى وزبەكستاننان كەيىن موڭعوليا كومانداسىمەن كەزدەسىپ، ازيا چەمپيوناتىنىڭ كوماندالىق جارىسىندا جەڭىمپاز اتاندى.

كوماندالىق سىندا قازاقستان ەرلەر قۇراماسىندا ەرعالي شامەي (J1-73 كگ)، جانبوتا امانجول (J2-90 كگ)، ەرلان وتەپوۆ (J1+90 كگ)، ولجاس ورازالى ۇلى (J2-73 كگ)، ابىلاي ادىلبەكوۆ (J1-90 كگ)،  جانە ەرلان كونكيەۆ (J2 +90 كگ) ەل نامىسىن قورعادى.

ازيا چەمپيوناتىنىڭ كوماندالىق جارىسىنا ەرلەر اراسىندا بەس قۇراما قاتىستى. اينالمالى جۇيە بويىنشا بارلىق كوماندا ءبىر-بىرىمەن ءوزارا كۇرەسىپ شىعادى. جەڭىمپاز كوماندالاردىڭ جەڭىس سانىنا قاراي انىقتالادى. ءوز كەزەگىندە، قازاقستان تايلاند، تايپەي جانە يندونەزيا سپورتشىلارىنان قۇرالعان IBSA، ءۇندىستان، وزبەكستان جانە موڭعوليا قۇرامالارىن ۇتتى. ال وزبەكستان قۇراماسى ەكىنشى ورىنعا يە بولسا، موڭعوليا مەن ءۇندىستان سپورتشىلارى ۇزدىك ۇشتىكتى قورىتىندىلادى.

قازاقستان قۇراماسى ازيا چەمپيوناتىنىڭ جەكەلەي جارىسىندا ءتورت التىن، ءتورت كۇمىس جانە التى قولا جۇلدە جەڭىپ العان بولاتىن.

ازيا چەمپيوناتى استانادا جاقسىلىق ۇشكەمپىروۆ اتىنداعى جەكپە-جەك سارايىندا ءوتتى. قۇرلىقتىق بىرىنشىلىككە بارلىعى 11 ەل قاتىستى.