«استانا» ءتورت دۇركىن ەل چەمپيونى اتاندى

«استانا» 33-تۋردا ورالدىڭ «اقجايىعىمەن» كەزدەسىپ، 2:0 ەسەبىمەن جەڭىسكە جەتتى. ويىنداعى ەكى گولدى دا جۋنيور كابانانگا سالدى. وسىلايشا «استانا» 79 ۇپاي جيناپ، قازاقستان پرەمەر-ليگاسىنىڭ 2017 جىلعى جەڭىمپازى اتاندى.

ەكىنشى ورىنعا «استانادان» ءبىر ۇپايعا كەم جيناعان الماتىنىڭ «قايراتى» جايعاستى. اتاپ وتەرلىك جايت، «استانا» وسىمەن فۋتبول بىرىنشىلىگىن ءتورت رەت قاتارىنان جەڭىپ وتىر.

«اقتوبە» 2007، 2008 جانە 2009 جىلدارى ءۇش رەت قاتارىنان چەمپيون بولىپ، وسىعان دەيىنگى رەكوردتىڭ اۆتورى بولىپ كەلگەن. قاتارىنان ەكى جىل جەڭىمپاز اتانعان 4 كلۋب بار: «ەلىماي» (1994، 1995)، «جەڭىس» (2000، 2001)، «ەرتىس» (2002، 2003) جانە «شاحتەر» (2011، 2012).

چەمپيوندىق تيتۋل بويىنشا بەس رەتتەن جەڭىمپاز اتانعان «ەرتىس» پەن «اقتوبە» ءبىرىنشى ورىندا. پاۆلودار كلۋبى 1993، 1997، 1999، 2002 جانە 2003 جىلدارى، ال اقتوبە 2005، 2007، 2008، 2009 جانە 2013 جىلدارى «التىن» يەلەنگەن.

چەمپيوندىق تيتۋل بويىنشا «استانا» ءۇشىنشى ورىندا. كلۋب ءتورت «التىنمەن» قاتار، ەكى رەت «كۇمىس» مەدال (2009 جانە 2013) يەلەنگەن. ءبىرىنشى ورىندا ەرتىس (5+4+6)، ال ەكىنشى ورىندا «اقتوبە» (5+3+3).

ءبىر قىزىعى، وسى بىرىنشىلىكتە «قايرات» تا رەكورد ورناتتى. ول قازاقستان پرەمەر-ليگاسى تاريحىندا ءۇش رەت قاتارىنان ەكىنشى ورىن يەلەنگەن العاشقى كلۋب اتاندى. وعان دەيىن ەكى ماۋسىم قاتارىنان «كۇمىس» العان ءۇش كلۋب بولعان: «قىزىلجار سك» (1999، 2000)، «اتىراۋ» (2001، 2002) جانە «توبىل» (2007، 2008).