Eset Qýanov — sambodan álem chempıony! (vıdeo)

Reseıdiń Sochı qalasynda sambo kúresi men áskerı sambodan erler men áıelder arasynda álem chempıonaty aıaqtaldy.

Álemniń 86 elinen kelgen samboshylardyń qatarynda Qazaq eliniń palýandary da qatysyp, baqtaryn synaǵan bolatyn. Bul joly el qorjynyna kópten kútken altyn júlde tústi. 62 kıloda beldesken Eset Qýanov Sochı aspanynda Qazaq eliniń ənuranyn asqaqtatty. Sóıtip, batyr ulymyz sambodan álem chempıony atandy.

Esettiń altyn júldesinen basqa bizdiń palýandar 8 qola júldege qol jetkizdi. Atap aıtar bolsaq, Beıimbet Qanjanov (52 kg), Álibek Zekenov (92 kg) jáne Gúlnur Erbolova (52 kg) álem chempıonatynda úshinshi orynǵa ıe bolsa, áskerı sambodan Raıhan Mádı (100 kg), Amandyq Asaýuly (62 kg), Temirlan Ihsanǵalıev (82 kg), Bolatbek Raıymqulov (52 kg) jáne Nurgeldi Qııalbekov (68 kg) qola júldeger atandy.

Samboshylar álem chempıonatynyń aldynda Aqtóbe qalasynda oqý-jattyǵý jıynyn ótkizip, Sochıge osy jaqtan jol tartqan bolatyn.

Aıta keteıik, sambo kúresinen Qazaqstanǵa eńbek sińirgen jattyqtyrýshy, Qurmetti sport qyzmetkeri Bolat Qojahmetov dúbirli dodaǵa shyǵaryp salyp turyp: «Aǵa, bul joly samboshylar mindetti túrde altyn júldemen oralady!» degen aq tilegimizdi aıtqan edik. Alla Taǵala tilegimizdi qabyl etip, Qazaq eliniń samboshylary el mereıin asyrdy. Júlde qutty bolsyn, Qazaq eli!

Musaǵalı TASQALIEV,

AQTО́BE