«رولان گارروس» ءتۋرنيرى: قازاقستان قۇراماسى قانشا تابىس تاپتى؟

قازاقستان تەننيسشىلەرىنىڭ «رولان گارروس» تۋرنيرىندە قانشا تابىس تاپقانى بەلگىلى بولدى، دەپ حابارلادى قازاقستان تەننيس فەدەراتسياسى.

فرانتسيا اشىق چەمپيوناتىنا ەلىمىزدىڭ جەتى تەننيسشى قاتىستى. وسى تۋرنيردە سپورتشىلاردىڭ ءبارى ۇتىلسا دا 485 مىڭ ەۋرو (234،4 ملن تەڭگە) تابىس تاپتى. مىسالى، تابىس تابۋ جونىنەن يۋليا پۋتينتسەۆا الدا تۇر. ول جەكەلەي سىندا ءۇشىنشى اينالىمعا دەيىن جەتتى. جۇپتىق سىندا رەسەيلىك كاميللا راحيموۆامەن بىرگە العاشقى اينالىمنان اسا المادى.

بيىلعى تۋرنيردەن پۋتينتسەۆا 150 500 ەۋرو (8 500+142 000) الدى. ودان كەيىن ءۇشىنشى اينالىمعا دەيىن جەتكەن ەلەنا رىباكينا تۇر. ول 142 000 ەۋرو تاپتى.

قازاقستاننىڭ ءبىرىنشى راكەتكاسى رىباكينا سىرقاتتانىپ قالۋىنا بايلانىستى جارىستى جالعاستىرا المادى. جۇپتىق سىندا ول جارىسقا قاتىسقان جوق.

الەكساندر بۋبليك بيىلعى جارىستا 77 500 ەۋرو (8 500+69 000) الدى.  تيموفەي سكاتوۆ — 69 000 ەۋرو، الەكساندر نەدوۆەسوۆ — 21 500 ەۋرو، اننا دانيلينا — 16 000 ەۋۆرو (2 500+13 500)، اندرەي گولۋبەۆ 8 500 ەۋرو تاپتى.

بيىل «رولان گارروس» ءتۋرنيرىنىڭ جۇلدە قورى 49،6 ملن ەۋرو بولىپ وتىر.