فۋتزالدان چەمپيوندار ليگاسى: قازاقستان كلۋبتارى ەليتادا وينايدى

الماتىنىڭ «قايرات» كلۋبى مەن سەمەيدىڭ «سەمەي» كومانداسى UEFA چەمپيوندار ليگاسى ەليتالىق كەزەڭىندەگى العاشقى ويىندارىن وينادى.

بۇل جولى «قايرات» جاساعى سىرت الاڭدا بەلگيانىڭ «اندەرلەحت» كلۋبىمەن كۇش سىناستى.

ماتچ باستالعاندا الماتىنىڭ كومانداسى جىلدام گول سوعىپ ۇلگەردى. بۇل گولدى 1-مينۋتتا كايو رۋيز سوقتى. بەلگيالىق كوماندا دا قول قۋسىرىپ وتىرمادى. ولار ءۇش گولمەن جاۋاپ بەردى. رانجەل 2-مينۋتتا، گرەللو 3-مينۋتتا دوپتى تورعا تۋلاتسا، 10-مينۋتتا ەريك فانەس قاقپانى ءدال كوزدەدى.

دەگەنمەن «قايرات» ءوز قاقپاسىنان ءۇش دوپتى ساناپ السا دا  بىرىنشى تايم بىتكەنگە دەيىن ەسەپتى تەڭەستىرىپ ۇلگەردى. اتيرسون سيلۆا 11-مينۋتتا، لۋكاس وتانيا 12-مينۋتتا گولدىڭ اۆتورى اتاندى.

ەكىنشى تايمدا الماتىلىق كلۋب ويىن باسىندا تاعى گول سوقتى. داۋرەن تۇرساعۇلوۆ 21-مينۋتتا، اتيرسون سيلۆا 26-مينۋتتا، ءبىرجان ورازوۆ 29-مينۋتتا كوزگە ءتۇستى. ماتچتىڭ سوڭىندا لۋكاس وتانيا «اندەرلەحت» كومانداسىنىڭ بوس قالعان قاقپاسىنا گول سالىپ، ەسەپتى 7:3-كە جەتكىزدى.

الماتى قالاسىنىڭ كلۋبى نەگىزگى كەزەڭدە ءتورتىنشى توپتا كوسوۆونىڭ «پريشتينا» كومانداسىن 4:1، حورۆاتيانىڭ «نوۆو ۆريەمەنى» 3:2 ەسەبىمەن جەڭسە، پورتۋگاليانىڭ «سپورتينگ» كلۋبىنان 2:7 ەسەبىمەن جەڭىلىپ قالدى.

ەندى كوماندالار 5 جەلتوقساندا الماتىدا وينايدى.

«سەمەي» UEFA چەمپيوندار ليگاسى ەليتالىق كەزەڭىندە ءوز الاڭىندا پولشانىڭ «پياست» كلۋبىمەن 3:3 ەسەبىمەن تەڭ ءتۇستى.

بۇعان دەيىن ءتۋرنيردىڭ نەگىزگى كەزەڭىندەگى ءۇشىنشى توپتا سەمەيلىك كوماندا چەحيانىڭ «حرۋديم» كلۋبىن 9:5 ەسەبىمەن جەڭسە، فرانتسيانىڭ «ەتۋال» 3:4، يسپانيانىڭ «پالما» جاساقتارىنان 4:7 ەسەبىمەن جەڭىلگەن بولاتىن.

بيىل فۋتزالدان چەمپيوندار ليگاسىنىڭ ەليتالىق كەزەڭىنە وزگەرىستەر ەنگىزىلدى.

جارىستىڭ اتالعان ساتىسىندا 16 كوماندا سەگىز جۇپقا بولىنەدى. كوماندالار ءوز الاڭىندا جانە سىرت الاڭدا ءبىر-ءبىر ماتچتان وينايدى. بۇل ويىندار 2025 جىلدىڭ 24 قاراشا-6 جەلتوقسان ارالىعىنا بەلگىلەنگەن.

ودان كەيىن 2026 جىلدىڭ 23 اقپانى مەن 6 ناۋرىزى ارالىعىندا كوماندالار سول ەرەجە بويىنشا شيرەك فينالدا سىنعا تۇسەدى.

فينال 2026 جىلدىڭ مامىر ايىندا يتاليانىڭ پەسارو قالاسىندا بولادى. وندا ءتورت كوماندا وينايدى. الدىمەن جارتىلاي فينال بولسا، ودان كەيىن فينال مەن 3-ورىن ءۇشىن ماتچتار جوسپارلانىپ وتىر.

داستان كەنجالين،

استانا